ເຈົ້າໜ້າທີ່ນະຄອນຫຼວງວຽງຈັນທຳລາຍຊິ້ນສ່ວນສັດປ່າທີ່ຜິດກົດໝາຍ

     ກອງກວດກາປ່າໄມ້ ນະຄອນຫຼວງວຽງຈັນ ຮ່ວມກັບອົງການປົກຄອງເມືອງໄຊທານີ ຈັດຕັ້ງພິທີຈູດທຳລາຍສັດປ່າ ແລະ ຊິ້ນສ່ວນສັດປ່າ ຂຶ້ນວັນທີ 12 ຕຸລາ 2016 ທີ່ຕະຫຼາດຂຸດສາມບາດ ເມືອງໄຊທານີ ນະຄອນຫຼວງວຽງຈັນ (ນວ) ເຂົ້າຮ່ວມມີທ່ານ ໜູກິ ສີຫາລາດ ຮອງເຈົ້າເມືອງໄຊທານີ ທ່ານ ແສງອາລຸນ ສຸລິຍະວົງ ຫົວໜ້າກອງກວດກາປ່າໄມ້ ນະຄອນຫຼວງວຽງຈັນ ພ້ອມດ້ວຍພະນັກງານວິຊາການຕ່າງໆ ຈາກຂະແໜງການກ່ຽວຂ້ອງ ນາຍບ້ານ ຕະຫຼອດຮອດພໍ່ຄ້າ ແມ່ຄ້າ ແລະ ນ້ອງນັກຮຽນ.
      ທ່ານ ແສງອາລຸນ ສຸລິຍະວົງ ກ່າວວ່າ: ສົກປີ 2015-2016 ການດຳເນີນວຽກງານກວດກາ ແລະ ການສະກັດກັ້ນຂອງເຈົ້າໜ້າທີ່ປ່າໄມ້ ນວ ໄດ້ຈຳນວນ 25 ຄັ້ງ ສາມາດຢຶດຊິ້ນສ່ວນຊາກສັດ ແລະ ສັດນ້ຳ-ສັດປ່າ ສັດທີ່ມີຊີວິດ ທັງໝົດ 446 ຊິ້ນສ່ວນ ນ້ຳໜັກ 612 ກິໂລ ມີ 20 ກວ່າຊະນິດ ສັດນ້ຳ-ສັດປ່າ ໃນນັ້ນ ສັດປ່າທີ່ມີຊີວິດ ຈຳນວນ 239 ໂຕ ນ້ຳໜັກ 486,1 ກິໂລ ແມ່ນໄດ້ປ່ອຍຄືນສູ່ທຳມະຊາດແລ້ວ ແລະ ອີກຈຳນວນໜຶ່ງແມ່ນໄດ້ມອບໃຫ້ສູນຟື້ນຟູ ແລະ ບຳບັດສັດປ່າ ສວນສັດບ້ານເກິນ ເມືອງທຸລະຄົມ ແຂວງວຽງຈັນ ມີໝີຄວາຍ ຈຳນວນ 2 ໂຕ ນ້ຳໜັກ 160 ກິໂລ ລິ່ນ 52 ໂຕ ນ້ຳໜັກ 300 ກິໂລ ແມ່ນໄດ້ປ່ອຍຢູ່ປ່າສະຫງວນແຫ່ງຊາດ ພູເຂົາຄວາຍ ພູພະນັງ ນອກນີ້ ໃນພິທີໄດ້ຈູດທຳລາຍຖິ້ມຊິ້ນສ່ວນສັດຕາຍ ຈຳນວນ 207 ຊິ້ນສ່ວນໂຕ ນ້ຳໜັກ 125,9 ກິໂລ.

ແຫຼ່ງຂ່າວ: ສໍານັກຂ່າວສານປະເທດລາວ.