ເຈົ້າໜ້າທີ່ຕຳຫຼວດ ແຂວງຫົວພັນ ກວດຄົ້ນເປົ້າໝາຍ ພົບຂອງກາງຢາເສບຕິດ ປະເພດຢາບ້າ ຈຳນວນ 203 ເມັດ ແລະ ເຮໂຣອິນ 5 ກ້ອນນ້ອຍ.

ເຈົ້າໜ້າທີ່ຕຳຫຼວດບໍລິການປະຊາຊົນ ກຸ່ມ3 ບ້ານນາໜອງບົວ ເມືອງຊຳເໜືອ ແຂວງຫົວພັນ ສົມທົບກັບອຳນາດການປົກຄອງບ້ານ ເຂົ້າຄວນຄົ້ນເຮືອນຂອງ ນາງ ເບົາຢ່າງ ອາຍຸ 50ປີ ປະຊາຊົນບ້ານຫົວຄັງ ເມືອງຊຳເໜືອ ແຂວງຫົວພັນ ພົບຂອງການຢາເສບຕິດ ປະເພດຢາບ້າຈຳນວນ 203 ເມັດ,ເຮໂຣອິນ 5 ກ້ອນນ້ອຍ,ຫີນອ່ອນ 500 ກິໂລກຼາມ ແລະ ຜູ້ມົ້ວສຸມ 5 ຄົນ ໃນເວລາທີ່ກຳລັງເສບຢາເສບຕິດຮ່ວມກັນ.

ເຈົ້າໜ້າທີ່ໃຫ້ຮູ້ວ່າ ພາຍຫຼັງໄດ້ຮັບການລາຍງານຈາກປະຊາຊົນວ່າ ນາງ ເບົາຢາງ ໃຊ້ເຮືອນຂອງຕົນເອງເປັນບ່ອນຈຳໜ່າຍຢາເສບຕິດ ພ້ອມອຳນວຍຄວາມສະດວກໃຫ້ກັບກຸ່ມໄວລຸ້ນເຂດບ້ານດັ່ງກ່າວເຂົ້າມົ້ວສຸມເສບ,ຈາກນັ້ນ ເຈົ້າໜ້າທີ່ຈື່ງປະສານສົມທົບກັບອຳນາດການປົກຄອງບ້ານຕິດຕາມການເຄື່ອນໄຫວຂອງຜູ້ກ່ຽວ ຜ່ານການຕິດຕາມເຫັນວ່າຜູ້ກ່ຽວແມ່ນ ເອົາຢາເສບຕິດມາເບື່ອເມົາບັນດາໄວລຸ້ນພາຍໃນບ້ານ. ມາຮອດວັນທີ 22 ພຶດສະພາ 2018 ຈື່ງໄດ້ມີການກວດຄົ້ນເຮືອນຂອງຜູ້ກ່ຽວພົບເຫັນຂອງກາງຢາເສບຕິດຈຳນວນດັ່ງກ່າວ ພ້ອມຜູ້ມົ້ວສຸມ ຈຳນວນ 5 ຄົນ.

ນາງເບົາຢາງ ໃຫ້ການສາລະພາບວ່າ: ໄດ້ເອົາຢາເສບຕິດມາຂາຍໃຫ້ກັບໄວລຸ້ນທີ່ຕ້ອງການເສບຢາພາຍໃນບ້ານ ແລະ ບ້ານໃກ້ຄຽງເລີ່ມແຕ່ຕົ້ນປີ2018.ສ່ວນຫຼາຍແມ່ນອຳນວຍຄວາມສະດວກໃຫ້ຜູ້ມາຊື້ເສບຢູ່ເຮືອນ ແລ້ວຈື່ງກັບເຮືອນ,ສ່ວນຫີນອ່ອນ ຈຳນວນ 500 ກິໂລກຼາມ ແມ່ນພວກໄວລຸ້ນເອົາມາແລກປ່ຽນຢາບ້າ. ປັດຈຸບັນ ຄະດີດັ່ງກ່າວຍັງຢູ່ໃນຂັ້ນຕອນການສຶບສວນສອບສວນຂອງເຈົ້າໜ້າທີ່ ເພື່ອຂະຫຍາຍຜົນຫາກຸ່ມແກ້ງຜູ້ຮ່ວມຂະບວນການມາຮັບໂທດຕາມຂັ້ນຕອນຂອງກົດໝາຍ.

ຂໍ້ມູນຈາກ : ນສພ ຄວາມສະຫງົບ.