ເຈົ້າໜ້າທີ່ຈະເຂົ້າກວດຄົ້ນ ທີ່ພັກ ແລະ ຊັບສິນຂອງ ທ້າວ ໄຊຊະນະ ໄວໆນີ້

ຕອນຄ່ຳຂອງວັນທີ 19 ມັງກອນ 2017 ວານນີ້ ເຈົ້າໜ້າທີ່ຕຳຫຼວດຊຸດປາບຢາເສບຕິດຂອງໄທ ໄດ້ຈັບກຸມຄຸມໂຕທ້າວ ໄຊຊະນະ ແກ້ວພິມພາ ທີ່ສະໜາມບິນສາກົນສຸວັນນະພູມ ປະເທດໄທ ໃນຂໍ້ຫາເປັນຫົວໜ້າເຄືອຂ່າຍຄ້າຢາເສບຕິດຂ້າມຊາດລາຍໃຫຍ່ ມີການພົວພັນກັບກຸ່ມຄ້າຢາລາຍໃຫຍ່ ໃນພາກໃຕ້ຂອງໄທ.

ຂ່າວການຈັບກຸມດັ່ງກ່າວ ເປັນຂ່າວໃຫຍ່ທີ່ໂດ່ງດັງໄປທົ່ວປະເທດລາວ ແລະ ໄທ ໂດຍສະເພາະແມ່ນໃນຂ່າວອອນລາຍ ໂດຍລະບຸວ່າຜູ້ກ່ຽວເປັນປະຊາຊົນລາວ ອາໄສຢູ່ເມືອງຫິນບຸນ ແຂວງຄຳມ່ວນ ໂດຍຜູ້ກ່ຽວມີຖານະລ້ຳລວຍແບບຜິດປົກກະຕິ ມີລົດຫຼູຫຼາລາຄາແພງໆ ຢູ່ຫຼາຍຄັນ.

ມື້ນີ້, ວັນທີ 20 ມັງກອນ 2017 ເຈົ້າໜ້າທີ່ທີ່ກ່ຽວຂ້ອງ ທີ່ບໍ່ປະສົງອອກນາມໄດ້ລາຍງານຕໍ່ນັກຂ່າວລາວໂພສຕ໌ພວກເຮົາວ່າ ທາງເຈົ້າໜ້າທີ່ກຳລັງວາງແຜນຈະເຂົ້າກວດຄົ້ນຊັບສິນແລະທີ່ຢູ່ອາໄສຂອງ ທ້າວ ໄຊຊະນະ ແກ້ວພິມມາ ທີ່ເມືອງຫິນບຸນ ແຂວງຄຳມ່ວນ ໃນໄວໆນີ້ ແລະເຈົ້າໜ້າທີ່ຄົນດັ່ງກ່າວກໍບໍ່ໄດ້ຢືນຢັນວ່າຈະປະຕິບັດການໃນວັນແລະເວລາໃດແທ້.

ພ້ອມກັນນັ້ນ, ກໍຍັງບໍ່ຢືນຢັນວ່າຜູ້ກ່ຽວເປັນພໍ່ຄ້າຢາເສບຕິດລາຍໃຫຍ່ຕາມທີ່ເປັນຂ່າວຫຼືບໍ່ ເພາະຕ້ອງລໍຖ້າການສືບສວນສອບສວນ ແລະພະຍານຫຼັກຖານຕ່າງໆ ຕາມຂະບວນການຂອງກົດໝາຍ.

ທີ່ມາ: http://www.laopost.com/2017/01/20/83146