ເຈົ້າບ້ານເຮ ໂຕໂຍຕ້າເປີດບ້ານດັບລ້ານຊ້າງ 3-1

ການ​ແຂ່ງຂັນ​ ລະຫວ່າງ ລາວ​ໂຕ​ໂຍຕ້າ ກັບ ລ້ານ​ຊ້າງ ຢູ​ໄນ​ເຕັດ ​ໃນ​ວັນ​ທີ 23 ກັນຍາ ຢູ່ ສະໜາມກິລາ​ມະຫາວິທະຍາ​ໄລ​ແຫ່ງ​ຊາດ ​ເຊິ່ງ​ເປັນນັດ​ທີ່​ຫລາຍ​ຄົນ​ລໍຄອຍ ​ແລະ ນັດ​ນີ້ ຍັງ​ສ້າງ​ສະຖິ​ໃໝ່​ໃຫ້​ວົງ​ການ​ແຂ່ງຂັນ​ເຕະບານ​ລາວ​ພຣີ​ເມຍ​ລີກ ​​ເພາະມີ​ກອງ​ເຊຍ​ທັງ​ສອງ​ທີ​ມ​ເຂົ້າ​ຊົມ​ເຖິງ 5.000 ຄົນ, ຜ່ານ​ການ​ແຂ່ງຂັນ​ທີ່​ມ່ວນ​ຊື່ນ​ປາກົດ​ວ່າ ທີ​ມ ລາວ​ໂຕ​ໂຍຕ້າ ຍາດ​ເອົາ​ຊະນະ​ຈາກ ທີ​ມ ລ້ານ​ຊ້າງ ຢູ​ໄນ​ເຕັດ​ໄດ້ ດ້ວຍຜົນ 3-1.

​ໃນ​ນັດ​ນີ້ ທີ​ມ ລາວ​ໂຕ​ໂຍຕ້າ ຖືກ​ຍອມຮັບ​ວ່າ​ຫລິ້ນ​ໄດ້​ດີ​ຫລາຍ ​ເພາະ​ນັກ​ກິລາ​ທຸກ​ຄົນ​ພາຍ​ໃນ​ທີ​ມສາມາດ​ຫລິ້ນ​ບານ​ເປັນອັນ​ໜຶ່ງ​ອັນ​ດຽວກັນ ​ແລະ ​ແຂ່ງຂັນ​ຢູ່​ບ້ານ​ຕົນ​ເອງ ຈຶ່ງ​ໄດ້​ປຽບ​ທັງ​ກອງ​ເຊຍ ​ແລະ ສະພາບ​ແວດ​ລ້ອມ ຈຶ່ງ​ເປັນ​ຝ່າຍ​ທີ່​ຫລິ້ນ​ບານ​ໄດ້​ເໜືອກ​ວ່າ ທີ​ມ ລ້ານ​ຊ້າງ ຢູ​ໄນ​ເຕັດ ຢ່າງ​ຈະ​ແຈ້ງ ຈົນ​ເອົາ​ຊະນະ 3-1 ຍາດ​ໄດ້ 3 ຄະ​ແນນ​ມາ​ເພີ່ມ ພ້ອມ​ຂຶ້ນ​ເປັນອັນ​ດັບ​ທີ 1 ​ແທນ​ທີ່ ທີ​ມ ລ້ານ​ຊ້າງ ຢູ​ໄນ ​ເຖິງ​ແມ່ນວ່າ ມີ 36 ​ຄະ​ແນນ​​ເທົ່າ​ກັນ​ກໍ​ຕາມ, ຂະນະ​ທີ່ ທີ​ມ ລ້ານ​ຊ້າງ ຢູ​ໄນ​ເຕັດ ກໍ​ຕົກລົງ​ມາ​ຢູ່​ອັນ​ດັບ​ທີ 2 ຕາມ​ລະບຽບ.

ສ່ວນການ​ແຂ່ງຂັນລາວ​ພຣີ​ເມຍ​ລີກ ​ໃນ​ວັນ​ທີ 26 ກັນຍາ ນີ້ ​ເວລາ 18:00 ​ໂມງ ທີ​ມ ລ້ານ​ຊ້າງ ຢູ​ໄນ​ເຕັດ ພົບ ທີ​ມ ​ເອສຣາ ທີ່ ສະໜາມ ລ້ານ​ຊ້າງ ​ແລະ ວັນ​ທີ 27 ກັນຍາ ມີ​ 3 ຄູ່ ຄື: ທີ​ມ ລາວ​ໂຕ​ໂຍຕ້າ ພົບ ທີ​ມ ຮວ່າງ​ແອັງ​ອັດ​ຕະປື ​​ເວລາ 17:00 ​ໂມງ ຢູ່ ສະໜາມກິລາ​ມະຫາວິທະຍາ​ໄລ​ແຫ່ງ​ຊາດ, ທີ​ມ ອິສ​ເຕິ​ນສະຕາ ພົບ ທີ​ມ ​ໄອ​ດີ​ຊີ ຈຳປາ​ສັກ ​ເວລາ 17:00 ​ໂມງ ຢູ່ ສະໜາມ​ລ້ານ​ຊ້າງ ​ແລະ ​ເວລາ 16:00 ​ໂມງ ທີ​ມ ສະຫວັນ ​ເປີດ​ສະໜາມ​ແຂວງ ສະຫວັນ​ນະ​ເຂດ ຕ້ອນຮັບ​ທີ​ມ ປກສ

ທີ່ມາ http://kpl.gov.la/