ເຈົ້າຄອງນະຄອນຫຼວງ ຕິດຕາມໂຄງການປະຕິສັງຂອນພະທາດຫຼວງ

ຄະນະຮັບຜິດຊອບລະດັບຊາດປະຕິສັງຂອນພິພິທະພັນພະທາດຫຼວງວຽງຈັນ ຄັ້ງທີ IV ນຳໂດຍທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເຈົ້າຄອງນະຄອນຫຼວງວຽງຈັນ ທັງ ເປັນປະທານຄະນະກຳມະ ການປະຕິສັງຂອນພິພິທະພັນ ພະທາດຫຼວງວຽງຈັນ ລົງຕິດ ຕາມກວດກາຄວາມຄືບໜ້າ ແລະ ຊີ້ນຳການປະຕິສັງຂອນ ພະທາດຫຼວງວຽງຈັນ ຄັ້ງທີ IV ເມື່ອວັນທີ 17 ພຶດສະພານີ້ ທີ່ ເດີ່ນພະທາດຫຼວງວຽງຈັນ ຖືກຕ້ອນຮັບໂດຍທ່ານ ຄຳປະດິດ ເຂັມມານິດ ຫົວໜ້າພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ, ມີພະນັກງານວິຊາ ການກ່ຽວຂ້ອງ. ເພື່ອຕິດຕາມກວດກາຄືນ ຄວາມສຳເລັດຂອງການປະຕິ ສັງຂອນພະທາດຫຼວງ ຄັ້ງທີ IV ໄລຍະທີ I ແລະ ໄລຍະທີ II ພ້ອມທັງຕິດຕາມຄວາມຄືບ ໜ້າຂອງການປະຕິສັງຂອນໄລ ຍະທີ III ແລະ IV ເປັນຕົ້ນວຽກ ສ້ອມແປງຫໍໄຫວ້ ແລະ ມີບັນດາປະຕູໃຫຍ່ເບື້ອງທິດຕາເວັນ ຕົກທີ່ກຳລັງດຳເນີນການສ້ອມ ແປງ, ຈາກນັ້ນ ຄະນະກຳມະການລະດັບຊາດໄດ້ກວດກາ ບັນດາລະບົບຮ່ອງລະບາຍນ້ຳ ທີ່ຢູ່ດ້ານໃນ ແລະ ດ້ານນອກ ຂອງກົມມະລຽນພະທາດຫຼວງ ຊຶ່ງເນັ້ນໃຫ້ປັບປຸງ ແລະ ອະນາໄມຮ່ອງລະບາຍນ້ຳໃຫ້ມີຄວາມ ສະອາດບໍ່ໃຫ້ນ້ຳຖ້ວມຂັງ, ໄຫຼສະດວກສະບາຍ, ພ້ອມນັ້ນ ກໍແນະນຳໃຫ້ປັບປຸງເດີ່ນ ພະທາດຫຼວງທາງທິດເໜືອ ເພື່ອໃຫ້ຄົນຍ່າງໄປມາສະດວກສະບາຍ ແລະ ແນະນຳ ໃຫ້ປູກຫຍ້າໃສ່ເດີ່ນກົມມະລຽນບາງຈຸດ ເພື່ອໃຫ້ເປັນພື້ນ ຫຍ້າສີຂຽວ ແລະ ອື່ນໆ. ທ່ານ ບຸນມີ ສອນມີໄຊ ປະທານບໍລິສັດມີພູນຊັບກໍ່ສ້າງຈຳກັດກ່າວວ່າ: ການດຳເນີນໂຄງການປະຕິສັງຂອນພະທາດຫຼວງ ຄັ້ງທີ IV ໄລຍະທີ III ແລະ IV ປະກອບມີວຽກມຸງຫຼັງຄາ,ທາສີຝາກົມມະລຽນ, ສ້ອມແປງຫໍໄຫວ້ ແລະ ມີບັນດາປະຕູໃຫຍ່ ເບື້ອງທິດຕາເວັນຕົກ, ວຽກຮ່ອງລະບາຍນ້ຳ, ໄຟຟ້າ, ສະໜາມຫຍ້າ, ຈັດວາງສະແດງວັດຖຸພັນ ແລະ ລະບົບປ້ອງກັນການຕິດຕັ້ງກ້ອງວົງຈອນປິດ ດ້ານໃນ ແລະ ດ້ານນອກກົມມະລຽນ. ຜ່ານການລົງມືປະຕິບັດຕົວຈິງມາຮອດປັດຈຸບັນສຳເລັດແລ້ວ 95% ຊຶ່ງວຽກທີ່ ກຳລັງດຳເນີນການປະຕິສັງ ຂອນປະກອບມີ ສ້ອມແປງປ່ຽນຖ່າຍໄມ້ທີ່ໂດກຂອງຫໍ ໄຫວ້ ແລະ ປະຕູໃຫຍ່ເບື້ອງທິດຕາເວັນຕົກ, ທາສີຝາ-ຂັດ ພື້ນກົມມະລຽນໃຫ້ມີຄວາມສະອາດ ແລະ ວຽກເກັບເລັມ ໃຫ້ລະອຽດ ຄາດວ່າທ້າຍເດືອນ ຕຸລາ 2017 ຈະໃຫ້ສຳເລັດ 100%, ສຳລັບການລົງຕິດ ຕາມກວດກາຂອງທ່ານເຈົ້າ ຄອງພ້ອມດ້ວຍຄະນະຄັ້ງນີ້ ທ່ານໄດ້ໃຫ້ທິດຊີ້ນຳ ໂດຍເນັ້ນ ໃສ່ໜ້າວຽກປູກຫຍ້າໃສ່ເດີ່ນ ກົມມະລຽນພະທາດຫຼວງໃຫ້ ເປັນພື້ນສີຂຽວອະນາໄມ ພ້ອມ ທັງສ້ອມແປງຮ່ອງລະບາຍນ້ຳ ໃຫ້ນ້ຳໄຫຼສະດວກສະບາຍທັນ ກັບລະດູຝົນທີ່ຈະມາເຖິງນີ້.

Cr: http://www.pasaxon.org.la