ເຈີຣາດ ຍົກ ຊົວເຣດ ພັດທະນາຈົນທຽບ ເມສຊີ ໂຣນັນໂດ້

ສະຕີເວັນ ເຈີຣາດ ມິດຟິວ ແອວເອ ກາແລັກຊີ ອອກມາຍ້ອງ ຟັນບໍ່ເຂົ້າ ຫຼຸຍ ຊົວເຣດ ດາວຍິງຈອມກັດຈາກ ບາເຊໂລນາ ວ່າຝີຕີນພັດທະນາໄປອີກຂັ້ນ ແລະ ຂຶ້ນໄປຕິດທັອບຂອງໂລກແລ້ວ ຍອມຮັບວ່າລູກຍິງບາງລູກຂອງດາວຍິງຄົນນີ້ບໍ່ມີໃຜສາມາດຍິງໄດ້ແບບນັ້ນ.

ສະຕີເວັນ ເຈີຣາດ ກອງກາງຂອງ ແອວເອ ກາແລັກຊີ ສະໂມສອນຊັ້ນນຳຈາກ ເມເຈີລີກ ຊັອກເກີ ອອກມາກ່າວເມື່ອວັນພຸດທີ 25 ພະຈິກວ່າ ເຂົາເຊື່ອວ່າ ຫຼຸຍ ຊົວເຣດ ຫົວຫອກຂອງ ບາເຊໂລນາ ທີມດັງຈາກ ລາ ລີກາ ສະເປນ ພັດທະນາໄປອີກແລ້ວ ແລະ ຕອນນີ້ຢູ່ໃນກຸ່ມ 3 ນັກເຕະທີ່ດີທີ່ສຸດໃນໂລກ.

ເຈີຣາດ ຫຼິ້ນກັບ ຊົວເຣດ ທີ່ ລີເວີພູ ແລະ ປະທັບໃຈກັບພັດທະນາຂອງສະຕາທີມຊາດ ອຸລຸກວາຍ ນັບຕັ້ງແຕ່ຍ້າຍໄປຟາດແຄ່ງໃນ ແຄັມນູ ເມື່ອປີ 2014 ແລະ ລ່າສຸດ ອະດີດກັບຕັນທີມຊາດ ອັງກິດ ກໍເຊື່ອວ່າອະດີດເພື່ອນທີມສົມຄວນທີ່ຈະຖືກຍົກໃຫ້ຢູ່ໃນລະດັບດຽວກັບ ລີໂອເນວ ເມສຊີ ແລະ ຄຣິສຕຽນໂນ້ ໂຣນັນໂດ 2 ຜູ້ທ້າຊິງລາງວັນ ຟີຟາ ບານລົງດໍ.

“ເຂົາເປັນນັກເຕະລະດັບໂລກ ແຕ່ເຂົາໄດ້ກ້າວໄປສູ່ອີກລະດັບ ບາງປະຕູທີ່ເຂົາຍິງມັນເປັນປະຕູທີ່ຂ້ອຍບໍ່ຄິດວ່າມີຄວາມເປັນໄປໄດ້” ເຂົາເບິ່ງຄືວ່າໄດ້ຢູ່ໃນບ່ອນທີ່ເຂົາຕ້ອງການ ແລະ ເຂົາກໍຄືສະບາຍໃຈ ເຂົາຢູ່ໃນ 3 ອັນດັບທຳອິດຂອງໂລກ” ເຈີຣາດ ກ່າວ.

....................................................................................................................................................