ເຂົ້າທາງຜູ້ໃຫຍ່!!ເປເອັດເຊຕິດຕໍ່ຫາບິດາເມສຊີຫວັງດຶງຮ່ວມທັບ

 

ສື່ປ່ອຍຂ່າວ!! ປາຣີ ແຊງ-ແຊັກແມັງ ໄດ້ຕິດຕໍ່ໄປຫາບິດາຂອງ ລີໂອເນວ ເມສຊີ ສຸດຍອດກອງໜ້າຂອງ ບາເຊໂລນາ ເພື່ອຫວັງດຶງໂຕນັກເຕະໄປຮ່ວມທັບໂດຍໃຊ້ ພາທຣິກ ໄຄລເວິດ ຜູ້ອຳນວຍການກິລາ ເປເອັດເຊ ເປັນຕົວກາງໃນການຈູງໃຈນັກເຕະໃຫ້ຍອມຍ້າຍອອກຈາກ ບາຊາ.

 

ປາຣີ ແຊງ-ແຊັກແມັງ ສະໂມສອນຍັກໃຫຍ່ຂອງ ລີກແອັງ ຝຣັ່ງຕົກເປັນຂ່າວວ່າໄດ້ຕິດຕໍ່ໄປຫາບິດາຂອງ ລີໂອເນວ ເມສຊີ ຍອດດາວຍິງຂອງ ບາເຊໂລນາ ມະຫາອຳນາດລູກໜັງຂອງ ລາ ລີກາ ສະເປນເພື່ອດຶງນັກເຕະມາຫຼິ້ນໃນ ປາກ ເດີ ແພຣງ ໃຫ້ໄດ້.

 

ເຊື່ອກັນວ່າກອງໜ້າກັບຕັນທີມຊາດອາເຈັນຕິນາອາຍຸ 29 ປີໄດ້ແຈ້ງໄປຍັງ “ບາຊາ” ບໍ່ສົນໃຈທີ່ຈະຕໍ່ສັນຍາສະບັບໃໝ່ຫຼັງຈາກທີ່ສັນຍາສະບັບປັດຈຸບັນຈະໝົດລົງໃນປີ 2018 ຫຼ້າສຸດມີລາຍງານລະບຸວ່າ ເປເອັດເຊ ໄດ້ຕິດຕໍ່ຫາພໍ່ຂອງ ເມສຊີ ເພື່ອຕ້ອງການດຶງນັກເຕະມາໃຫ້ໄດ້ ແລະ ໃຊ້ ພາທຣິກ ໄຄລເວິດ ຜູ້ອຳນວຍການທີມເປັນຕົວກາງໃນການໂນ້ມນ້າວໃຈໃຫ້ ເມສຊີ ຍ້າຍຫຼິ້ນໃນລີກນຳ້ຫອມ.