ເຂື່ອນໄຟຟ້າແຂວງໄຊຍະບູລີຈະໄດ້ເປີດທົດລອງຜະລິດກະແສໄຟຟ້າໃນທ້າຍເດືອນ ຕຸລາ 2018 ນີ້

  ໃນວັນທີ 26ພຶດສະພາ ທີ່ຜ່ານມາ ທ່ານ ພັນຄຳ ວິພາວັນ ຮອງປະທານປະເທດແຫ່ງ ສປປ ລາວ ພ້ອມດ້ວຍຄະນະ ໄດ້ລົງຢ້ຽມຢາມໂຄງການກໍ່ສ້າງເຂື່ອນໄຟຟ້າ-ນ້ຳຂອງ ແຂວງໄຊນະບູລີ, ໃຫ້ການຕ້ອນຮັບໂດຍທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍການນຳຂອງແຂວງທີ່ໃຫ້ການຕ້ອນຮັບຢ່າງອົບອຸ່ນ ຢູ່ທີ່ຫ້ອງປະຊຸມ ບໍລິສັດໄຊຍະບູລີພາວເວີຈຳກັດ.

ທີມງານຂອງທ່ານ ຮອງປະທານປະເທດ ແມ່ນໄດ້ຮັບຟັງການລາຍງານ ການກໍ່ສ້າງເຂື່ອນໂດຍຫຍໍ້ ຈາກທ່ານ ອານຸພາບ ວົງລະຄອນ ຮອງຜູ້ຈັດການຂອງບໍລິສັດໄຊຍະບູລີພາວເວີ ທ່ານໄດ້ກ່າວວ່າ ການກໍ່ສ້າງເຂື່ອນໄຟຟ້າແຂວງໄຊຍະບູລີມາຮອດປັນຈຸບັນແມ່ນມີຄວາມສຳເລັດແລ້ວປະມານ 94%,ໂຄງການກໍ່ສ້າງເຂື່ອນໄຟຟ້າໄຊຍະບູລີແມ່ນໄດ້ເລີ່ມລົງມືແຕ່ປີ 2012 ແລະ ຄາດວ່າຈະໄດ້ເປີດການທົດລອງແລ່ນຈັກຜະລິດກະແສໄຟຟ້າໜ່ວຍທຳອິດໃນທ້າຍເດືອນ ຕຸລາ2018 ນີ ແລະ ຮອດປີ 2019 ແມ່ນຈະໄດ້ສຳເລັດເປີດເຄື່ອງຜະລິດໄຟຟ້າຈຳໜ່າຍຂາຍໃຫ້ກັບປະເທດໄທ ແລະ ອີກຈຳນວນໜື່ງແມ່ນຈະໃຊ້ພາຍໃນປະເທດ,ໂຄງການໄຟຟ້າໄຊຍະບູລີແມ່ນມີລັກສະນະເປັນເຂື່ອນນ້ຳໄຫຼໂດຍສະເລ່ຍການໄຫຼຂອງນ້ຳແມ່ນ 4,000ແມັດກ້ອນຕໍ່ວິນາທີ,ມີຄວາມສູງ 28,5ແມັດ,ຄວາມກວ້າງຂອງສັນເຂື່ອນ 820ແມັດ,ມີບານປະຕູລະບາຍນ້ຳ 7 ປ່ອງ,ບານປະຕູລະບາຍນ້ຳຕະກອນ 4 ປ່ອງ,ມີຊ່ອງທາງເຮືອຂື້ນລ່ອງກວ້າງ 12ແມັດ,ຍາວ700ແມັດ,ສາມາດຮັບຮອງເຮືອຂົນສົ່ງສິນຄ້າໄດ້ 500ໂຕນ,ເຂື່ອນດັ່ງກ່າວມີກຳລັງໄຟຟ້າທັງໝົດ 1,285 ເມກາວັດ ມີ 8ຊຸດ,ໃນນີ້ມີເຄື່ອງກຳເນີດໄຟຟ້າຂະໜາດ 175ເມກາວັດ ມີ 7ຊຸດ.ສົ່ງໄຟຟ້າຜ່ານລະບົບສາຍສົ່ງ 500 ກິໂລໂວນຂາຍໃຫ້ການຜະລິດໄຟຟ້າແຫ່ງປະເທດ ແລະ ເຄື່ອງກຳເນີດໄຟຟ້າ 60 ເມກາວັດຈຳນວນ1ຊຸດແມ່ນຈະໄດ້ສົ່ງຜ່ານສາຍສົ່ງ 115ກິໂລໂວນເພື່ອຮັບໃຊ້ພາຍໃນປະເທດ ສປປ ລາວ.

ລວມມູນຄ່າການກໍ່ສ້າງໂຄງການເຂື່ອນໄຟຟ້າພະລັງງານນ້ຳໄຊຍະບູລີທັງໝົດ 4 ຕື້ໂດລາສະຫະລັດ,ນອກຈາກນີ້ ທ່ານຮອງປະທານປະເທດ ໄດ້ເນັ້ນໃຫ້ບໍລິສັດຈົ່ງເອົາໃຈໃສ່ໃນການກໍ່ສ້າງເຂື່ອນດັ່ງກ່າວໃຫ້ສຳເລັດຕາມກຳນົດເວລາທີ່ກຳນົດໄວ້,ພ້ອມເອົາໃຈໃສ່ເບີ່ງແຍງຊີວິດການເປັນຢູ່ຂອງປະຊາຊົນທີ່ຖືກຜົນກະທົບ ໂດຍສະເພາະແມ່ນຄອບຄົວ,ບ້ານເຮືອນທີ່ຖືກຍົກຍ້າຍ ເຮັດໃຫ້ປະຊາຊົນກຸ່ມຄົນມີອາຊີບທີ່ຄົງທີ່,ເຮັດໃຫ້ປະຊາຊົນມີລາຍຮັບທີ່ແນ່ນອນ ຈາກນັ້ນ ທ່ານ ຮອງປະທານປະເທດ ພ້ອມຄະນະກໍ່ໄດ້ເຂົ້າຢ້ຽມຢາມເບີ່ງກວດກາໜ້າວຽກການກໍ່ສ້າງຕົວຈິງຢູ່ສັນເຂື່ອນເພີ່ມອີກ.