ເຂດເສດຖະກິດພິເສດສະຫວັນ-ເຊໂນ ສ້າງວຽກເຮັດງານທຳແກ່ທ້ອງຖິ່ນໄດ້ກວ່າ 4 ພັນກວ່າຕຳແໜ່ງ

ເຂດເສດຖະກິດພິເສດສະຫວັນ-ເຊໂນ ເຊິ່ງເປັນເຂດເສດຖະກິດແຫ່ງທຳອິດຂອງປະເທດ ກາຍເປັນທ່າ ແຮງສຳຄັນໃນການພັດທະນາເສດຖະກິດ-ສັງຄົມຂອງປະເທດ, ເວົ້າສະເພາະແຂວງສະຫວັນນະເຂດ, ນັບແຕ່ການສ້າງຕັ້ງເຂດ ມາຮອດປະຈຸບັນສາມາດສ້າງວຽກເຮັດງານທຳແກ່ປະຊາຊົນໃນທ້ອງຖິ່ນແຂວງສະຫວັນນະເຂດຈຳນວນຫຼາຍພັນຕຳແໜ່ງ ເປັນອີກເງື່ອນໄຂສຳຄັນແກ່ການຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນກວ່າເກົ່າ.
ທ່ານ ທອງໃສ ໄຊຍະວົງຄຳດີ ກຳມະການພັກແຂວງ, ເລຂາໜ່ວຍພັກເຂດເສດຖະກິດພິເສດສະຫວັນ-ເຊໂນ ກ່າວລາຍງານໃນກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງສະຫວັນນະເຂດທີ່ໄຂຂຶ້ນໃນລະຫວ່າງວັນທີ 23-25 ກັນຍາ 2015ນີ້ວ່າ: ຄືດັ່ງທີ່ບັນດາທ່ານບັນດາສະຫາຍໄດ້ຮັບຊາບແລ້ວວ່າ: ພັກ-ລັດຖະບານ ມີແນວທາງນະໂຍບາຍເປີດກວ້າງປະເທດ ເພື່ອເຊື່ອມໂຍງເຂົ້າກັບເສດຖະກິດອະນຸພາກພື້ນ ແລະ ສາກົນ ໂດຍສຸມໃສ່ການສ້າງ ແລະ ປັບປຸງລະບົບນິຕິກຳໃຫ້ຄົບຖ້ວນສົມບູນ, ພັດທະນາພື້ນຖານໂຄງລ່າງ ແລະ ສິ່ງອຳນວຍຄວາມສະດວກ ເພື່ອຫັນປ່ຽນສະພາບປະເທດທີ່ບໍ່ມີທ່າເຮືອຕິດກັບທະເລ ມາເປັນປະເທດເຊື່ອມໂຍງເຂົ້າກັບບັນດາປະເທດຕ່າງໆ.

ໂດຍອີງໃສ່ສະພາບຈຸດພິເສດທ່າແຮງທີ່ຕັ້ງໄດ້ປຽບຂອງແຂວງສະຫວັນນະເຂດ ຊຶ່ງເປັນທາງຜ່ານແລວທາງເຊື່ອມໂຍງເສດຖະກິດຕາເວັນອອກ-ຕາເວັນຕົກ, ລັດຖະບານໄດ້ຕົກລົງສ້າງຕັ້ງ ຂສສຊ ເປັນເຂດເສດຖະກິດພິເສດແຫ່ງທຳອິດຂອງປະເທດ ຕາມດຳລັດຂອງນາຍົກລັດຖະມົນຕີ ສະບັບເລກທີ 148/ນຍ, ລົງວັນທີ 29 ກັນຍາ 2003. ຈຸດປະສົງຕົ້ນຕໍຂອງການພັດທະນາ ຂສສຊ ນີ້ ເພື່ອເປັນການສ້າງເງື່ອນໄຂສະພາບແວດລ້ອມເອື້ອອຳນວຍສົ່ງເສີມ-ດຶງດູດການລົງທຶນ, ຮອງຮັບການຖ່າຍທອດທຶນຮອນ-ເທັກໂນໂລຊີ-ຄວາມຮູ້ວິຊາການ ແລະ ສ້າງວຽກເຮັດງານທຳໃຫ້ຊຸມຊົນທ້ອງຖິ່ນ ເພື່ອໃຫ້ເຂົາເຈົ້າມີອາຊີບຖາວອນ, ມີລາຍໄດ້ໝັ້ນຄົງ, ຍົກລະດັບຊີວິດການເປັນຢູ່ໃຫ້ດີຂຶ້ນ ໃຫ້ເປັນໜໍ່ແໜງການຫັນເປັນອຸດສາຫະກຳ ແລະ ທັນສະໄໝ ໂດຍຫັນຈາກການນຳໃຊ້ເຄື່ອງມືຫັດຖະກຳ, ໃຊ້ແຮງງານເຕັກນິກລ້າຫຼັງ, ສະມັດຕະພາບ ປະສິດທິຜົນຕ່ຳ ໄປສູ່ພື້ນຖານເສດຖະກິດທີ່ມີສະມັດຕະພາບ, ຄຸນະພາບ ແລະ ປະສິດທິຜົນສູງ ອີງໃສ່ວິທີການຜະລິດແບບອຸດສາຫະກຳ ໂດຍນຳໃຊ້ວິທະຍາສາດ-ເຕັກໂນໂລຊີໃໝ່ ທີ່ລ້ຳຍຸກ ໂດຍມີວິໄສທັດສ້າງໃຫ້ເປັນສູນກາງການຄ້າ, ການລົງທຶນ ແລະ ການບໍລິການຂອງປະເທດ ແລະ ອະນຸພາກພື້ນ.
ໃນເບື້ອງຕົ້ນພວກເຮົາມີພຽງ 2 ເຂດຄື: ເຂດ A ແລະ B ມີເນື້ອທີ່ລວມກັນ 325 ເຮັກຕາ, ຕໍ່ມາເພື່ອຕອບສະໜອງຄວາມຮຽກຮ້ອງຕ້ອງການຂອງຜູ້ລົງທຶນ ລັດຖະບານຈຶ່ງໄດ້ຕົກລົງຂະຫຍາຍເພີ່ມອີກ 3 ເຂດຄື: C, D ແລະ B1 ມີເນື້ອທີ່ລວມກັນ 705 ເຮັກຕາ, ປະຈຸບັນ ຍັງຢູ່ໃນຂັ້ນຕອນພິຈາລະນາອະນຸມັດເພີ່ມເຕີມພື້ນທີ່ 300 ເຮັກຕາໃຫ້ເຂດ C ແລະ ຮັບຮອງເຂດໃໝ່ເຂດ E ຕື່ມອີກ. ຍ້ອນການເອົາໃຈໃສ່ຊີ້ນຳ-ນຳພາຢ່າງໃກ້ຊິດຕິດແທດຈາກພັກ ແລະ ລັດຖະບານ ກໍ່ຄືອຳນາດການປົກຄອງທ້ອງຖິ່ນ ທັງໄດ້ຮັບການຮ່ວມມືສະໜັບສະໜູນຈາກບັນດາແໜງການກ່ຽວຂ້ອງ ຂສສຊ ຂອງພວກເຮົາຈິ່ງໄດ້ຮັບການພັດທະນາ ປະສົບຜົນສຳເລັດເປັນຮູບປະທຳໃນເບື້ອງຕົ້ນ ໂດຍມີຄວາມພ້ອມທາງດ້ານນິຕິກຳ, ບຸກຄະລາກອນ, ລະບົບພື້ນຖານໂຄງລ່າງ ແລະ ສິິ່ງເອື້ອອຳນວຍຄວາມສະດວກໃນຂັ້ນພື້ນຖານ. ຜ່ານການຈັດຕັ້ງປະຕິບັດວຽກງານໂຄສະນາຂົນຂວາຍດຶງດູດການລົງທຶນ, ມາເຖິງປະຈຸບັນມີຈຳນວນ 65 ບໍລິສັດ ໄດ້ມາຈົດທະບຽນສ້າງຕັ້ງວິສາຫະກິດຢູ່ໃນເຂດ, ຫຼາຍກວ່າເຄິ່ງແລ້ວໄດ້ດຳເນີນທຸລະກິດຜະລິດ ແລະ ໃຫ້ການບໍລິການໃນນັ້ນພົ້ນເດັ່ນແມ່ນມີ 8 ບໍລິສັດທີ່ມີຊື່ສຽງຈາກຕ່າງປະເທດມາລົງທຶນຄື: ມີ 5 ບໍລິສັດມາຈາກປະເທດຍີ່ປຸ່ນຄື: ບໍລິສັດ ນິຄອນ ລາວຈຳກັດ, ດຳເນີນທຸລະກິດ ປະກອບກ້ອງຖ່າຍຮູບດີຈິຕອນ, ບໍລິສັດໂກໂຢລາວຈຳກັດ, ປະກອບຊິ້ນສ່ວນກ້ອງຖ່າຍຮູບ, ບໍລິສັດໂຕໂຢຕາໂບຊຸກຸລາວຈຳກັດ ຜະລິດຜ້າຫຸ້ມເບາະລົດຍົນ, ບໍລິສັດອາເດີຣານສ໌ລາວ ຈຳກັດ ຜະລິດຜົນປອມ, ບໍລິສັດເຄພີບິວຈຳກັດ ຜະລິດເຄື່ອງສຳອາງ ແລະ ເຄື່ອງຫຼິ້ນເດັກນ້ອຍ, ບໍລິສັດຊີເລັດສ໌ຕີກາລາວຈຳກັດ ປະເທດການາດາ ຜະລິດເຄື່ອງອຸປະກອນອີເລັກໂທຼນິກລວມທັງອຸປະກອນ ແລະ ບໍລິສັດແອໂຣເວີກລາວຈຳກັດ ຈາກປະເທດເນເທີແລນ ຜະລິດຊີ້ນສ່ວນ-ອຸປະກອນເຮືອບິນສະໜອງໃຫ້ໂຮງງານປະກອບເຮືອບິນໂບອີ້ງ-ແອບັສ. 


ຜ່ານຈາກການສັງລວມຕົວເລກສະຖິຕິຂອງບັນດາບໍລິສັດທີ່ໄດ້ລົງທຶນໃນເຂດເຫັນວ່າ ມາເຖິງປະຈຸບັນບໍລິສັດເຫຼົ່ານັ້ນ ໄດ້ສ້າງແຮງງານທ້ອງຖິ່ນຈຳນວນ 4.500 ຕຳແໜ່ງງານ ແລະ ຍັງມີຄວາມຕ້ອງການແຕ່ນີ້ເຖິງປີ 2020 ອີກ 15.000 ຄົນ, ໄດ້ມີການສົ່ງອອກສິນຄ້າແລ້ວດ້ວຍມູນຄ່າ 181 ລ້ານໂດລາສະຫະລັດ, ຊຶ່ງໄດ້ປະກອບສ່ວນສ້າງລາຍຮັບໂດຍກົງໃຫ້ລັດຖະບານດ້ານພາສີ-ອາກອນ ແລະ ຄ່າທຳນຽມອື່ນໆ 8,6 ຕື້ກີບ, ນອກນີ້ ຍັງໄດ້ກໍ່ໃຫ້ເກີດມີທຸລະກິດການບໍລິການທີ່ປິ່ນອ້ອມອີກຫຼາຍຢ່າງ ທີ່ຈະເປັນຖານລາຍຮັບໃຫ້ງົບປະມານແຫ່ງລັດຕື່ມອີກເຊັ່ນ: ທຸລະກິດດ້ານອາຫານ, ທີ່ພັກໂຮງແຮມ, ການຂົນສົ່ງ, ໂທລະຄົມ, ການສະໜອງການບໍລິການ ແລະ ສິນຄ້າອື່ນໆ.
ການພັດທະນາທະນາ ຂສສຊ ໄດ້ປະກອບສ່ວນເຮັດໃຫ້ພາບພົດຊື່ສຽງຂອງແຂວງສະຫວັນນະເຂດເດັ່ນຂຶ້ນໃນເວທີອະນຸພາກພື້້ນ ແລະ ເວທີສາກົນ ໂດຍເຫັນໄດ້ຈາກການມາພົບປະຢ້ຽມຢາມຂອງບັນດາການນຳຂັ້ນສູງທັງພາຍໃນ ແລະ ສາກົນ ທີ່ມີແນວໂນ້ມສົນໃຈຂະຫຍາຍການລົງທຶນດຳເນີນທຸລະກິດຢູ່ໃນເຂດຫຼາຍຂຶ້ນ. ຜົນສຳ ເລັດດັ່ງກ່າວມານັ້ນ, ເກີດຂຶ້ນໄດ້ຍ້ອນມີແນວທາງນະໂຍບາຍຖືກຕ້ອງຂອງພັກ-ລັດ, ມີການຊີ້ນຳໆພາໃກ້ຊິດຕິດ ແທດຈາກການນຳທຸກຂັ້ນ, ມີນິຕິກຳນະໂຍບາຍສົ່ງເສີມການລົງທຶນທີ່ດຶງດູດ, ມີສະພາບທີ່ຕັ້ງຍຸດທະສາດແທດ ເໝາະ, ປະສົມກັບການທຸ້ມເທເຫື່ອແຮງ ແລະ ສະຕິປັນຍາຂອງຄະນະພັກ, ຄະນະນຳ, ສະມາຊິກພັກ, ອ້າຍນ້ອງພະນັກງານຂອງເຂດ ຕະຫຼອດເຖິງການຮ່ວມມືສະໜັບສະໜູນຂອງບັນດາຂະແໜງການກ່ຽວຂ້ອງທັງສູນກາງ ແລະ ທ້ອງຖິ່ນເປັນຢ່າງດີ.

ທີ່ມາ Savanhphuttana News