ເກົາຫຼີເໜືອມອບຄວາມສຳເລັດການທົດລອງລູກສອນໄຟເປັນຂອງຂວັນວັນຊາດໃຫ້ແກ່ອາເມລິກາ

 

ເກົາຫຼີເໜືອປະກາດຄວາມສຳເລັດໃນການທົດສອບລູກສອນໄຟຂ້າມທະວີບ (ໄອຊີບີເອັມ) ຖືເປັນ “ຂອງຂວັນ” ໃຫ້ກັບອາເມລິກາເນື່ອງໃນໂອກາດວັນຊາດ ດ້ານລັດຖະບານວໍຊິງຕັນປະນາມເຫດການທີ່ເກີດຂຶ້ນຢ່າງໜັກ.

ສຳນັກຂ່າວຕ່າງປະເທດລາຍງານຈາກນະຄອນວໍຊິງຕັນ ປະເທດອາເມລິກາເມື່ອວັນທີ 4 ກໍລະກົດວ່າທ່ານ ເຣັກຊີ ທິວເລີສັນ ລັດຖະມົນຕີຊ່ວຍກະຊວງການຕ່າງປະເທດສະຫະລັດ ກ່າວເມື່ອວັນອັງຄານເຖິງການທີ່ເກົາຫຼີເໜືອປະກາດຄວາມສຳເລັດໃນການທົດສອບຂີປະນາວຸດຂ້າມທະວີບ (ໄອຊີບີເອັມ) ໄດ້ເປັນຄັ້ງທໍາອິດ ວ່າບໍ່ໄດ້ຖືເປັນການຍົກລະດັບຂອງ “ການຄຸມຄາມ ແລະ ການຂົ່ມຂູ່” ຈາກລັດຖະບານປຽງຢາງທີ່ມີຕໍ່ສະຫະລັດຢ່າງຊັດເຈນເທົ່ານັ້ນ ແຕ່ຍັງຖືເປັນ “ອັນຕະລາຍ” ຕໍ່ກັບໂລກອີກດ້ວຍ ລັດຖະບານວໍຊິງຕັນບໍ່ມີທາງຍອມຮັບເກົາຫຼີເໜືອໃນຖານະ “ລັດນິວເຄລຍ” ແລະ ຂໍຮຽກຮ້ອງໃຫ້ປະຊາຄົມໂລກຮ່ວມກັບຕໍ່ຕ້າຍຄວາມທະເຍີທະຍານດັ່ງກ່າວຂອງລັດຖະບານປຽງຢາງ.

ຂະນະທີ່ສຳນັກຂ່າວກາງເກົາຫຼີ (ເຄຊີເອັນເອ) ລາຍງານວ່າການທົດສອບລູກສອນໄຟ “ຮວາຊອງ-14” (ດາວອັງຄານ-14) ປະສົບຄວາມສໍາເລັດຢ່າງງົດງາມ ໝາຍຄວາມວ່ານັບຈາກນີ້ເກົາຫຼີເໜືອຄອບຄອງໄອຊີບີເອັມທີ່ມີສະກະຍະພາບໂຈມຕີເປົ້າໝາຍໄດ້ທຸກແຫ່ງ “ບໍ່ວ່າຈະຢູ່ບ່ອນໃດຂອງໂລກ” ໂດຍທ່ານ ຄິມ ຈອງ-ອຶນ ຜູ່ນຳສູງສຸດຂອງປະເທດ ເອີ້ນຂານລູກສອນໄຟຮວາຊອງ-14 ວ່າເປັນ “ຂອງຂວັນວັນຊາດອາເມລິກາ” ເນື່ອງຈາກການທົດສອບທີ່ເກີດຂຶ້ນເມື່ອວັນອັງຄານທີ່ຜ່ານມາຕາມເວລາທ້ອງຖິ່ນ ຖືວ່າກົງກັບວັນທີ 4 ກໍລະກົດເຊິ່ງເປັນວັັນຊາດຂອງອາເມລິກາພໍດີ ແລະ ຜູ່ຊ່ຽວຊານສ່ວນໃຫຍ່ຍອມຮັບວ່າສະກະຍະພາບຂອງລູກສອນໄຟ ຮວາຂອງ-14 ສາມາດໂຈມຕີໄດ້ໄກເຖິງລັດອະລາສກາເຖິງວ່າຍັງບໍ່ກົງເປົ້າພໍປານໃດກໍຕາມ.

ນອກຈາກນີ້ ການທົດສອບໄອຊີບີເອັມເກົາຫຼີເໜືອຍັງເກີດຂຶ້ນໃນລະຫວ່າງທີ່ປະທານາທິບໍດີ ສີ ຈິ້ງຜິງ ຜູ່ນຳຈີນຢາມລັດເຊຍຢ່າງເປັນທາງການເພື່ອພົບປະຫາລືກັບປະທານາທິບໍດີ ວະລາດິເມຍ ປູຕິນ ເຊິ່ງຜູ່ນຳທັງສອງປະເທດມີຖະແຫຼງການຮ່ວມກັນກ່ຽວກັບສະຖານະການທີ່ເກີດຂຶ້ນ ສະເໜີ “ຂໍແລກປ່ຽນ” ໂດຍການໃຫ້ອາເມລິກາຍຸຕິການຊ້ອມຮົບປະຈໍາປີກັບເກົາຫຼີໃຕ້ ໃນຂະນະທີ່ເກົາຫຼີເໜືອຕ້ອງຍຸຕິໂຄງການນິວເຄລຍຂອງຕົນເອງເຊັ່ນກັນ ເພື່ອປູທາງສູ່ການເຈລະຈາລະດັບພະຫຸພາຄີຕໍ່ໄປ.

ຢ່າງໃດກໍຕາມ ບໍ່ແມ່ນຄັ້ງທຳອິດທີ່ຈີນ ແລະ ລັດເຊຍຍື່ນຂໍ້ສະເໜີລັກສະນະດັ່ງກ່າວ ແລະ ນັບຕັ້ງແຕ່ຂຶ້ນຄອງອຳນາດເມື່ອປາຍປີ 2011 ທ່ານ ຄິມ ຈອງ-ອຶນ ສັ່ງທົດສອບລະເບີດນິວເຄລຍໄປແລ້ວ 3 ຄັ້ງ ໃນເດືອນກຸມພາ 2013 ເດືອນມັງກອນ 2016 ແລະ ເດືອນກັນຍາ 2016 ສ່ວນການທົດສອບລູກສອນໄຟ ຮວາຊອງ-14 ຖືເປັນການທົດສອບລູກສອນໄຟຄັ້ງທີ 12 ຂອງລັດຖະບານປຽງຢາງສະເພາະໃນປີນີ້.