ເກືອບ 50 ຄົນ ຢືນຢັນວ່າ ເສຍຊີວິດ ຍ້ອນນຳ້ຖ້ວມ ໃນ ມຽນມາ

ບັນດາ​ເຈົ້າ​ໜ້າ​ທີ່​ມຽນມາ ກ່າວ​ວ່າ 46 ຄົນ​ໄດ້​ເສຍ​ຊີວິດ ຫລັງ​ຈາກ​ເກີດ​ໄພ​ນຳ້​ຖ້ວມຊຸ ​ແລະ​ດິນ​ເຈື່​ອນ​ເປັນ​ເວລາ​ຫລາຍມື້.

ກະຊວງ​ບັນ​ເທົາ​ທຸກ ​ແລະ​ຕັ້ງ​ຖິ່ນ​ຖານ ​ໄດ້​ປະກາດ​ໃນວັນ​ຈັນ​ວານ​ນີ້​ວ່າ ປະຊາ ຊົນປະມານ 200,000 ຄົນ ຢູ່​ທາງ​ພາກ​ເໜືອ​ແລະ​ພາກ​ຕາ​ເວັນ​ຕົກ ຂອງ​ມຽນມາ ​ໄດ້​ຮັບ​ຜົນ​ກະທົບ​ຈາກໄພພິບັດ ​ໃນ​ຂະນະ​ທີ່ ລັດຖະບານ ​ທະຫານ ​ແລະ​ບັນດາ​ອົງການ​ບັນ​ເທົາ​ທຸກ ພາກັນ​ເລັ່ງລັດການປະຕິບັດ​ງາ​ນ​ກູ້​ໄພ ​ແລະ​ໃຫ້ການ​ຊ່ວຍ​ເຫລືອ.

ຜູ້ນຳ​ຝ່າ​ຍຄ້ານຂອງມຽນມາ ທ່ານ​ນາງ Aung San Suu Kyi ໄດ້​ໄປຢ້ຽມ ຢາມ ເຂດທີ່ໄດ້​ຮັບຜົນ​ກະທົບແຫ່ງນຶ່ງ​ຂອງ​ປະ​ເທດ ໃນ​ວັນ​ຈັນ​ວານ​ນີ້.

ປະທານ​າມທິບໍດີ Thein Sein ​ໄດ້​ເດີນທາງໃນ​ວັນ​ເສົາ​ຜ່ານ​ມາ ໄປຍັງ​ເຂດ Sagaingທາງ​ພາກ​ເໜືອ​ຂອງ​ຂອງ​ມຽນມາ ນຶ່ງ​ໃນ​ສີ່​ເຂດ ທີ່​ທ່ານ​ໄດ້​ປະກາດ ພາວະ​ສຸກ​ເສີນ.

ປະທາ​ນາ​ທິບໍດີ Thein Sein ກ່າວ​ວ່າ “ທົ່ງ​ນາ​ຫລາຍໆ​ແຫ່ງ​ໄດ້​ຮັບຄວາມເສຍ ຫາຍ.ຂ້າພະ​ເຈົ້າ ຢູ່​ທີ່​ນີ້​ກັບ​ບັນດາ​ຜູ້​ເຄາະ​ຮ້າຍໄພນຳ້ຖ້ວມ ​ເພື່ອຊອກ​ຫາ​ຊ່ອງ​ທາງ​ທີ່​ເປັນ​ໄປ​ໄດ້ໃນ​ການ​ສະໜັບສະໜູນ ​ແລະ​ທົດ​ແທນຄວາມ​ເສຍ​ຫາຍ​ຂອງ​ເຂົາ​ເຈົ້າ. ລະດັບ​ນຳ້ກຳລັງ​ເລີ້ມ​ລົດ​ລົງ​ຢ່າງ​ຊ້າໆຄະນະປະຕິບັດງານຂອງລັດ ຖະບານ​ມຽນມາ ຈະ​ພະຍາຍ​າມ​ ໃຫ້ການ​ຊ່ວຍ​ເຫລືອ​ຢ່າງດີ​ທີ່ສຸດ​ແກ່​ເຂົາ​ເຈົ້າ ໃນ​ການຕັ້ງ​ຖິ່ນ​ຖານ ​ແລະ​ຂັ້ນຕອນການກັບ​ຄືນ​ສູ່​ສະພາບ​ເດີມ.”

​ຝົນຕົກ​ໜັກເປັນເວລາຫຼາຍອາທິດ ສົມທົບໃສ່ກັບລົມພາຍຸໄຊໂຄລນເຮັດ ໃຫ້ສະຖານະການ​ຮ້າຍ​ແຮງ​ໃນ​ທ້າຍ​ອາທິດ​ແລ້ວ​ນີ້ ໂດຍພາໃຫ້​ເກີດ​ໄພນຳ້ຖ້ວມ ​ແລ​ະ ດິນ​ເຈື່ອນ ຢູ່ໃນ​ພາກ​ຕາ​ເວັນ​ຕົກ​ຂອງ​ປະ​ເທດ​ຢ່າງ​ໜັກ. ຢູຸ່ໃນບາງເຂດໄດ້ເກີດໄພ​ນຳ້​ຖ້ວມ​ເລິກ​ຫລາຍ​ແມັດ.

ທີ່ມາ http://lao.voanews.com/

ບົດຄວາມໃຫມ່ໆ