ເກິດເຊຢືນຢັນລົມເລື່ອງຍ້າຍທີມແລ້ວ

 

ມາຣິໂຣ ເກິດເຊ ກອງກາງ ບາເຢິນ ມິວນິກ ຢືນຢັນເລື່ອງການລົມເລື່ອງອະນາຄົດກັບ ຄາໂລ ອັນເຊລັອດຕິ ນາຍໃຫຍ່ຄົນໃໝ່ແລ້ວແຕ່ບໍ່ຂໍໃຫ້ລາຍລະອຽດ ຍອມຮັບວ່າງົງຄືກັນວ່າສື່ຮູ້ເລື່ອງການລົມກັນໄດ້ຈັ່ງໃດ ບອກວ່າຕອນນີ້ຂໍທຸ່ມເທໃຫ້ກັບຕົ້ນສັງກັດເຕັມທີ່ ຫຼັງຍັງເຫຼືອເກມກັບ ດອດມູນ ໃນລາຍການ ເດເອຟເບ ໂພຄານ ຮອບຊິງຊະນະເລີດ.

 

ມາຣິໂອ ເກິດເຊ ມິດຟິວ ບາເຢິນ ມິວນິກ ແຊມ ບຸນເດສລີກາ ເຢຍລະມັນຢືນຢັນວ່າໄດ້ລົມກັບ ຄາໂລ ອັນເຊລັອດຕິ ວ່າທີ່ນາຍໃຍ່ “ເສືອໃຕ້” ຄົນໃໝ່ກ່ຽວກັບອະນາຄົດຂອງຕົນເອງແລ້ວ ຢ່າງໃດກໍຕາມເຂົາກໍຍັງບໍ່ຍອມບອກວ່າໄດ້ຮັບອະນຸຍາດໃຫ້ຍ້າຍອອກ ຫຼື ບໍ່.

 

ກອງກາງທີມຊາດເຢຍລະມັນທີ່ຍ້າຍຈາກ ດອດມູນ ມາຢູ່ກັບ ບາເຢິນ ເມື່ອປີ 2013 ຫຼຸດເປັນໂຕສໍາຮອງພາຍໃຕ້ການຄຸມທີມຂອງ ເປັບ ກວາດິໂອລາ ແລະ ມີຂ່າວລືວ່າ ລີເວີພູ, ເຊວຊີ ແລະ ດອດມູນ ຕ້ອງການດຶງໄປເສີມທັບຫຼັງຈາກທີ່ ອັນເຊລັອດຕິ ບໍ່ຮັບຮອງການໄດ້ຕຳແໜ່ງຕົວຈິງໃຫ້ເຂົາ.

 

ເກິດເຊ ທີ່ຍິງໄປ 3 ລູກຈາກການລົງເກມລີກ 14 ນັດໃນລະດູການນີ້ບອກວ່າ “ຂ້ອຍບໍ່ຮູ້ວ່າມີຄົນຮູ້ເລື່ອງກ່ຽວກັບການໂທລະສັບລົມກັນລະຫວ່າງຂ້ອຍກັບ ອັນເຊລັອດຕິ ມີບໍ່ເທົ່າໃດຄົນທີ່ຮູ້ວ່າພວກເຮົາລົມກັນ ພວກເຂົາຮູ້ອີກວ່າເຮົາລົມຫຍັງກັນ ແລະ ມັນກະພໍແລ້ວ ມັນບໍ່ໄດ້ມີຫຍັງຫຼາຍກວ່ານັ້ນ”.

 

“ເຮົາໄດ້ແຊມ ບຸນເດສລີກາ ແລະ ຂ້ອຍກໍໄດ້ແຊມລີກຄັ້ງທີ 5 ຂ້ອຍມີຄວາມສຸກ ຂ້ອຍມີສັນຍາຈົນຮອດເດືອນມິຖຸນາປີ 2017 ເຮົາຍັງມີເກມສຳຄັນກັບ ດອດມູນ ຂ້ອຍໃຫ້ສັນຍາວ່າຈະທຸ່ມເທເຕັມທີ່ໃນຮອບຊິງຊະນະເລີດ ເດເອຟເບ ໂພຄານ ແຕ່ວ່າຂ້ອຍບໍ່ສາມາດໃຫ້ສັນຍາຫຍັງກ່ຽວກັບລະດູການໜ້າ ຂ້ອຍຍັງມີສັນຍາ ແລະ ເຮົາຕ້ອງການເບິ່ງກັນຕໍ່ໄປວ່າອັນໃດຈະເກີດຂຶ້ນ” ເກິດເຊ ກ່າວ.