ເກັບຄ່າເຂົ້າຊົມຄອນພະເພັງ ແລະ ວັດພູ ປະເດັນຫລັກສາຍດ່ວນຈາກຈຳປາສັກ

ບັນຫາການເກັບຄ່າບໍລິການເຂົ້າແຫຼ່ງທ່ອງທ່ຽວຄອນພະເພັງ ແລະ ມໍລະດົກໂລກຜາສາດຫີນວັດພູແຂວງຈໍາປາສັກ ຖືເປັນປະເດັນສໍາຄັນທີ່ບັນດາສະມາຊິກສະພາປະຊາຊົນທ້ອງຖິ່ນ ແລະໂທລະສັບສາຍດ່ວນຂອງມວນຊົນ ໄດ້ສະເໜີຕໍ່ສະພາປະຊາຊົນແຂວງຈໍາປາສັກແກ້ໄຂໃນວາລະການດໍາເນີນກອງປະຊຸມສະໄໝສາມັນມື້ວານນີ້.

ວັນທີ 5 ມັງກອນ 2017 ແມ່ນມື້ທີສາມຂອງການດໍາເນີນກອງປະຊຸມສະໄໝສາມັນເທື່ອທີ 2 ຂອງສານປະຊາຊົນ ແຂວງຈໍາປາສັກ ຊຶ່ງບັນດາສະມາຊີກ ສສຂ ຕ່າງກໍໄດ້ມີການເຈາະຈີ້ມສອບຖາມຫຼາຍບັນຫາສໍາຄັນທີ່ເຫັນວ່າຍັງມີຂໍ້ຄົງຄ້າງ ແລະ ບໍ່ທັນສອດຄ່ອງກັບສະພາບຄວາມເປັນຈິງ, ບັນຫາທີ່ເຮັດໃຫ້ມີ ຜົນກະທົບຕໍ່ການພັດທະນາເສດຖະກິດ-ສັງຄົມຂອງແຂວງ, ກະທົບຕໍ່ຄວາມສະຫງົບສຸກບ້ານເມືອງຄື:

  1.  ແມ່ນບັນຫາການຄຸ້ມຄອງຮ້ານອາຫານ, ຮ້ານກິນດື່ມ ແລະຮ້ານບັນເທີງທີ່ມີການກໍ່ສ້າງໃກ້ກັບສະຖາບັນການສຶກສາ

  2.  ບັນຫາການຄຸ້ມຄອງການໃຫ້ບໍລິການເປີດ-ປິດຮ້ານອາຫານ, ຮ້ານກິນດື່ມ ແລະຮ້ານບັນເທີງທີ່ຍັງຝ່າຝືນໂມງ ເວລາທີ່ກົດໝາຍກໍານົດ

  3.  ບັນຫາການຄຸ້ມຄອງການເຂົ້າມົ້ວສຸມສິ່ງມຶນເມົາຂອງຊາວໜຸ່ມເຍົາວະຊົນຕາມຮ້ານອາຫານ-ຮ້ານກິນດື່ມ

  4.  ບັນຫາການສໍາປະທານແຫຼ່ງທ່ອງທ່ຽວຢູ່ເມືອງປາກຊ່ອງບໍ່ປະຕິບັດລະບຽບວິໄນຕາມທີ່ກໍານົດ (ເວລາເຈົ້າໜ້າທີ່ເຂົ້າໄປພົວພັນເອົາຜູ້ໃຫຍ່ມາອ້າງອີງ)

  5.  ບັນຫາການຄຸ້ມຄອງຫໍ ພັກນັກສຶກສາທີ່ມີການມົ້ວສຸມ

  6.  ບັນຫາການໃຫ້ບໍລິການຂອງແພດໝໍຂາດ ຈັນຍາບັນຕໍ່ໜ້າທີ່ໃຫ້ບໍລິການຄົນເຈັບ.

ຢ່າງໃດກໍຕາມບັນຫາທີ່ ສສຂ ໃຫ້ຄວາມສໍາຄັນເປັນພິເສດ ລວມທັງສາຍ ດ່ວນຈາກສັງຄົມໃຫ້ຄວາມສົນໃຈ ແລະ ສະເໜີຕໍ່ສະພາປະຊາຊົນແຂວງຈໍາປາສັກໃຫ້ແກ້ໄຂຢ່າງຈິງຈັງຄື: ການເກັບຄ່າບໍລິການຜ່ານເຂົ້າແຫຼ່ງທ່ອງທ່ຽວ ຄອນພະເພັງ ແລະ ເຂົ້າແຫຼ່ງທ່ອງທ່ຽວມໍລະດົກໂລກຜາສາດຫິນວັດພູ ຊຶ່ງບັນດາສະມາຊິກ ສສຂ ຫຼາຍທ່ານໄດ້ຍົກຂຶ້ນມາວ່າ: ການເກັບຜ່ານດັ່ງກ່າວໄດ້ມີຜົນກະທົບບໍ່ໜ້ອຍຕໍ່ການເກັບລາຍຮັບເຂົ້າງົບປະມານ, ເນື່ອງຈາກວ່າເຮັດໃຫ້ຈໍາ ນວນນັກທ່ອງທ່ຽວຫຼຸດລົງ, ຕົວເລກການເກັບລາຍຮັບປີ 2016 ໂດຍສະເລ່ຍ ໄດ້ປະມານ 2 ຕື້ກວ່າກີບ ໃນຂະນະທີ່ປີຜ່ານມາເກັບລາຍຮັບໄດ້້ໃນລະດັບຕໍ່າສຸດ 5 ຕື້ກີບ ຂອງຂະແໜງການທ່ອງທ່ຽວ ຊຶ່ງໃນນັ້ນຈໍານວນນັກທ່ອງທ່ຽວພາຍ ໃນຫຼຸດລົງເປັນຈໍານວນຫຼາຍພໍສົມ, ເນື່ອງຈາກເຂົາເຈົ້າໄດ້ຮັບຜົນກະທົບກໍຄືການເກີດຄວາມບໍ່ພໍໃຈຕໍ່ມາດຕາການເສຍຄ່າຜ່ານ ແລະຄົນລາວເອງເສຍໃນ ລາຄາທີ່ສູງເກີດຄວາມເປັນຈິງກັບມູນຄ່າການພັດທະນາແຫຼ່ງທ່ອງທ່ຽວຂອງຜູ້ສໍາປະທານ, ນອກນີ້ບັນດາສະມາຊິກ ສສຂ ໄດ້ເຈາະຈີ້ມ ແລະໃຫ້ເຫດຜົນວ່າ: ຄວນມີການປະມູນແຫຼ່ງທ່ອງທ່ຽວບ່ອນທີ່ເຫັນວ່າບໍ່ມີການພັດທະນາ, ຄວນໃຫ້ບໍລິສັດໃໝ່ທີ່ມີຄວາມສາມາດໃນການບໍລິຫານຈັດການ, ສາມາດດຶງດູດເອົານັກ ທ່ອງທ່ຽວເຂົ້າມາໃຫ້ຫຼາຍຂຶ້ນ ແລະສາມາດສ້າງລາຍຮັບໃຫ້ສູງຂຶ້ນ ໂດຍປັດສະຈາກການຢຶດເຢື້ອຍາວນານກັບບໍລິສັດ ໃນປະຈຸບັນ ພ້ອມດຽວກັນນີ້ສາຍດ່ວນ ຈາກສັງຄົມໄດ້ຮຽກຮ້ອງຕໍ່ສະພາປະຊາຊົນຈໍາປາສັກບຸນວັດພູປີ 2017 ບໍ່ຄວນເກັບຄ່າຜ່ານປະຕູເປີດໃຫ້ປວງຊົນລາວສາມາດເຂົ້າບູຊາບັນພະບຸລຸດໄດ້ຄືກັບເຂົາເຈົ້າເຄີຍປະຕິບັດມາແຕ່ບູຮານ.

 

ທີ່ມາ: ເສດຖະກິດ-ສັງຄົມ