ຮ່ວມເຊຍນາງສາວນະຄອນຫຼວງ 20 ຄົນສຸດທ້າຍ ເຂົ້າສູ່ຮອບຊິງຕົ້ນເດືອນໜ້າ

ມື້ນີ້ 16 ມີນາ ກອງປະກວດນາງສາວ ນະຄອນຫຼວງວຽງຈັນ ໄດ້ເປີດຕົວນາງສາວງາມ 20 ຄົນສຸດທ້າຍຜູ້ເຂົ້າຮ່ວມປະກວດປີ 2019 ເພື່ອກຽມເຂົ້າສູ່ການເກັບຕົວ ແລະຮຽນຮູ້ບຸກຂະລິກກະພາບຕ່າງໆ ກ່ອນມື້ຊີງຊະນະເລີດຢ່າງເປັນທາງການ  ພ້ອມນີ້ຍັງໄດ້ເປີດໂຕມົງກຸດຂອງນາງສາວນະຄອນຫຼວງປີນີ້ ທີ່ອຸປະຖຳໂດຍຮ້ານຄຳພູວົງ ໂດຍມີຄະນະກອງປະກວດ, ຕາງໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ນະຄອນຫຼວງ, ບັນດາຜູ້ໃຫ້ການສະໜັບສະໜູນ ແລະສື່ມວນຊົນເຂົ້າຮ່ວມ.

ເຊິ່ງນາງສາວນະຄອນຫຼວງ 20 ຄົນສຸດທ້າຍນີ້ຈະເລີ່ມເຂົ້າສູ່ຂະບວນການກະກຽມການປິກວດຢ່າງເປັນທາງການເປັນຕົ້ນ ການເກັບຕົວເຮັດກິດຈະກຳຕ່າງໆ, ຝຶກຊ້ອງບຸກຄະລິກກະພາບ, ມາລະຍາດ, ຄວາມຮູ້ດ້ານວັດທະນະທຳ, ຄວາມເປັນແມ່ຍິງລາວ ແລະການຊ້ອມສະແດງຕ່າງໆນັບແຕ່ວັນທີ 23 ມີນາ 2019 ນີ້ເປັນຕົ້ນໄປຈົນເຖິງວັນທີ 5 ເມສາ ແລະຈະເຂົ້າສູ່ຮອບຊີງຊະນະເລີດໃນວັນທີ 6 ເມສາ 2019.

ທ່ານ ສາລີ ນັນທະວົງ ຕາງໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວນະຄອນຫຼວງວຽງຈັນ ໄດ້ກ່າວແນະນຳບັນດານ້ອງນາງສາວໃນມື້ເປີດໂຕນີ້ວ່າ: ຂໍໃຫ້ 20 ນ້ອງທີ່ໄດ້ຮັບຄັດເລືອກຈົ່ງຕັ້ງໃຈຝຶກຊ້ອມຮຽນຮູ້ ແລະຕ້ອງຮູ້ແທ້ກ່ຽວກັບຮີດຄອງປະເພນີ ແລະຄວາມໂດດເດັ່ນຂອງແມ່ຍິງລາວເປັນຕົ້ນການນຸ່ງຖື, ການປາກເວົ້າ ແລະຕ້ອນຮັບແຂກບ້ານແຂກເມືອງອື່ນໆ.

ເຊັ່ນດຽວກັບທ່ານ ນາງອໍລະໄທ ສັນຕິຄົງຄາ ຜູ້ຈັດການທົ່ວໄປ, ຕາງໜ້າກຸ່ມບໍລິສັດກິດຕິພົງ ປະທານກອງປະກວດນາງສາວນະຄອນຫຼວງວຽງຈັນ ກໍ່ມີຄຳເຫັນແນະນຳຜູ້ເຂົ້າປະກວດ 20 ນາງສາວວ່າ: ເວທີການປະກວດໃນນະຄອນຫຼວງວຽງຈັນນີ້ຖືເປັນພື້ນຖານຂອງການກ້າວສູ່ເວທີນາງງາມ ແຕ່ຫຼັງຈາກນີ້ຖ້າໄດ້ຮັບຕຳແໜ່ງກໍ່ຈະໄດ້ເຂົ້າເວທີສາກົນທີ່ທ້າທາຍ ແລະແຂງແກ່ນກວ່າ ສະນັ້ນ ນາງສາວທຸກຄົນຈົ່ງຕັ້ງໃຈຝຶກຝົນຕົນເອງໃຫ້ດີ ຮູ້ຈັກອ່ອນນ້ອມຖ່ອມຕົນ ແຕ່ໃນເວລາດຽວກັນນາງງາມຕ້ອງເປັນຜູ້ທີ່ມີຄວາມຮູ້ຄວາມສາມາດຈິ່ງສາມາດເຮັດໜ້າທີ່ນີ້ໄດ້.

 

ທ່ານຍັງກ່າວອີກວ່າ: ນາງສາວນະຄອນຫຼວງຕ້ອງຝຶກຕົນໃຫ້ເປັນຜູ້ທີ່ພຽບພ້ອມດ້ານຄວາມງາມທາງຮູບຮ່າງໜ້າຕາ, ມີຄວາມຮູ້ຄວາມສາມາດ ຄວບຄູ່ກັບການເຮັດໜ້າທີ່ໃນການເຜີຍແຜ່ວັດທະນະທຳ, ຮີດຄອງປະເພນີ ແລະແຫຼ່ງທ່ອງທ່ຽວຕ່າງໆໃນນະຄອນຫຼວງວຽງຈັນອອກສູ່ສາຍຕາມວນຊົນທາງພາຍໃນ ແລະຕ່າງປະເທດຢ່າງມີປະສິດທິພາບ.

ສຳລັບຜູ້ໃດທີ່ເປັນແຟນໆນາງງາມ ໂດຍສະເພາະນາງສາວນະຄອນຫຼວງວຽງຈັນທ່ານສາມາດມີສ່ວນຮ່ວມໃນການໃຫ້ຄະແນນນ້ອງໆໄດ້ ຜ່ານເຄືອຂ່າຍມືຖືຂອງອີທີແອວ ດ້ວຍການພິມ MVT ……ຕາມດ້ວຍໝາຍເລກທີ່ທ່ານເຊຍ “.....”ຕາມດ້ວຍຈຳນວນ ແລະສົ່ງໄປທີ່ເບີ 2018 ຕົວຢ່າງ MVT 99*1 ຈະໄດ້ 1 ຄະແນນ 800 ກີບຕໍ່ຄັ້ງຫຼື Supper Vote MVT99 *10 ຈະໄດ້ 10 ຄະແນນ( 8.000 ກີບຕໍ່ຄັ້ງ) ເພິ່ນໄດ້ເປີດໃຫ້ໂຫວດຕັ້ງແຕ່ວັນທີ 1 ມີນາ 2019 ເປັນຕົ້ນໄປຈົນຮອດວັນທີ 6 ເມສາ 2019.