ຮ່ວມພະລັງນໍ້າໃຈ ຊ່ວຍເຫຼືອໄພນໍ້າຖ້ວມ ແຂວງບໍລິຄໍາໄຊ

ວັນທີ 9 ສິງຫານີ້, ທີ່ຫ້ອງວ່າການແຂວງບໍລິຄໍາໄຊ, ມີ ວິທະຍຸສາກົນແຫ່ງປະເທດຈີນ CRI ປະຈໍາລາວ, ບໍລິສັດປະກາດ, ໂທລະພາບລາວສະຕາ, ບໍລິສັດລາວໂພດ, ສະມາຄົມອາສາກູ້ໄພນະຄອນຫຼວງວຽງຈັນ ແລະ ໜັງສືພິມກອງທັບປະຊາຊົນລາວ ໄດ້ນໍາວັດຖຸປັດໄຈເຄື່ອງອຸປະໂພກ, ບໍລິໂພກ ທີ່ໄດ້ຮັບການບໍລິຈາກ ເຊິ່ງໄດ້ຈາກການລະດົມແຕ່ວັນທີ 5-8 ສິງຫາ 2015, ໃນນັ້ນ, ມີ ສູນການຄ້າວຽງຈັນເຊັນເຕີ, ບໍລິສັດເອວິກ ( Avic Town House ) ແລະ ພາກສ່ວນບຸກຄົນ ແລະ ເພື່ອນຄົນຈີນຢູ່ສປ. ຈີນ. ໄປມອບໃຫ້ແຂວງບໍລິຄໍາໄຊ ທີ່ຫ້ອງວ່າການປົກຄອງແຂວງ. 
ການມອບເຄື່ອງຊ່ວຍເຫຼືອດັ່ງກ່າວ, ທ່ານ ລໍາເງິນ ວົງພະຈັນ, ພ້ອມດ້ວຍຄະນະ ໄດ້ຮັບການຕ້ອນຮັບ ແລະ ກ່າວຮັບເຄື່ອງຊ່ວຍເຫຼືອ, ໂດຍທ່ານ ດຣ. ກອງແກ້ວ ໄຊສົງຄາມ ເຈົ້າແຂວງ-ແຂວງບໍລິຄໍາໄຊ ແລະ ຄະນະອານຸກໍາມະການຊ່ວຍເຫຼືອໄພນໍ້າຖ້ວມຂອງແຂວງ. ທ່ານເຈົ້າແຂວງກໍໄດ້ກ່າວຂອບໃຈ ບັນດາພາກສ່ວນຕ່າງໆທີ່ໃຫ້ການຊ່ວຍເຫຼືອພໍ່ແມ່ປະຊາຊົນແຂວງບໍລິຄໍາໄຊ, ທ່ານຍັງໃຫ້ຮູ້ຕື່ມອີກວ່າ: ມາຮອດປະຈຸບັນນໍ້າໄດ້ຫຼຸດລົງເປັນປົກກະຕິແລ້ວ ພວກເຮົາໄດ້ຈັດຕັ້ງກອງເພດເຄື່ອນທີ່ ແລະ ລະດົມພໍ່ແມ່ປະຊາຊົນປູກພືດໄລຍະສັ້ນ ເພື່ອໃຫ້ເຂົ້າເຈົ້າໄດ້ຟື້ນຟູຊີວິດການເປັນຢູ່ເປັນປົກກະຕິ (ສ່ວນມູນຄ່າການເສຍຫາຍແມ່ນຍັງຢູ່ໃນໄລຍະປະເມີນຜົນ). ທ່ານເຈົ້າແຂວງຍັງໃຫ້ຮູ້ອີກວ່າ: ວັນທີ 11-12 ສິງຫາ 2015, ຈະມີກິດຈະກໍາຮັບບໍລິຈາກ ເພື່ອຊ່ວຍເຫຼືອຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມ ທີ່ສະໂມສອນຂອງແຂວງ ຂໍເຊີນຊວນພາກສ່ວນຕ່າງໆ ເຂົ້າຮ່ວມກິດຈະກໍາດັ່ງກ່າວ.
ທ່ານ ລໍາເງິນ ວົງພະຈັນ ຕາງຫນ້າຄະນະກ່າວວ່າ: ເຄື່ອງທີ່ເອົາມາຊ່ວຍເຫລືຶອຄັ້ງນີ້ ມີ: ເຂົ້າສານ, ປ໋ອງປາ, ຫມີ່, ນົມ, ນໍ້າດື່ມ, ຢາປົວພະຍາດ ແລະ ເຄື່ອງໃຊ້ທີ່ຈຳເປັນ ລວມມູນຄ່າ 26,300,000 ກີບ. ຫຼັງຈາກນັ້ນ, ຄະນະສື່ມວນຊົນ ແລະ ສະມາຄົມອາສາກູ້ໄພນະຄອນຫຼວງວຽງຈັນ ຍັງໄດ້ນໍາເອົາເຄື່ອງຊ່ວຍເຫຼືອຈໍານວນໜື່ງລົງໄປມອບໃຫ້ ປະຊາຊົນ ບ້ານຊົມຊື່ນ ເຊິ່ງເປັນບ້ານວັດທະນະທໍາຂອງເມືອງບໍລິຄັນ ທີ່ຖືກນໍ້າຖ້ວມ ໃນໄລຍະຜ່ານມາ. ທີ່ຫໍປະຊຸມບ້ານ ທ່ານ ລໍາເງິນ ວົງພະຈັນ ຫົວໜ້າສະມາຄົມອາສາກູ້ໄພນະຄອນຫຼວງວຽງຈັນ ຕາງໜ້າຄະນະມອບໃຫ້ອໍານາດການປົກຄອງ, ພໍ່ແມ່ປະຊາຊົນພາຍໃນບ້ານດັ່ງກ່າວ ແລະ ກ່າວສະແດງຄວາມຂອບໃຈໂດຍ ທ່ານ ຈາວ ນາຍບ້ານ-ບ້ານຊົມຊື່ນ. ເຄື່ອງຊ່ວຍເຫຼືອທີ່ໄດ້ລົງໄປມອບຄັ້ງນີ້ ມີທັງໝົດ 235 ຖົງ, ໂດຍມອບໃຫ້ຄອບຄົວລະຖົງ.
ການລະດົມທຶນຊ່ວຍເຫຼືອຄັ້ງນີ້, ຫົວໜ້າ, ພ້ອມດ້ວຍພະນັກງານລັດຖະກອນ ວິທະຍຸສາກົນແຫ່ງປະເທດຈີນປະຈໍາລາວ ກໍໄດ້ປະກອບສ່ວນຊ່ວຍເຫຼືອມີ: ນໍ້າ, ໝີ່, ຢາປົວພະຍາດ ຈໍານວນໜື່ງ ມູນຄ່າ 2,000,000 ກີບ.

ທີ່ມາ CRI-FM93