ຮູ້ແລ້ວ!! ສາເຫດທີ່ຖັງແກັສລະເບີດ ທີ່ເຂື່ອນໄຟຟ້ານ້ຳງຽບ 1 ຍ້ອນແບບນີ້ !!

ການສືບສວນສອບສວນຫາສາເຫດຂອງຂອງຖັງແກັສອ໊ອກຊີເຈນຄວາມດັນສູງລະເບີດ ໃນເຂື່ອນໄຟຟ້ານ້ຳງຽບ1 ທີ່ກຳລັງກໍ່ສ້າງໄດ້ 80% ສົ່ງຜົນເຮັດໃຫ້ແຮງງານ 6 ຄົນເສຍຊີວິດ ແລະ ອີກ 2 ຄົນໄດ້ຮັບບາດເຈັບທີ່ເຂື່ອນໃຫຍ່ຂອງໂຄງການເຂື່ອນໄຟຟ້ານໍ້າງຽບ 1 ໃນທ້າຍເດືອນກໍລະກົດ 2017 ຜ່ານມາ.
ອຸປະຕິເຫດດັ່ງກ່າວ ເກີດຂຶ້ນໃນຕອນກາງຄືນຂອງວັນສຸກ ທີ28 ກໍລະກົດ 2017 ໃນຂະນະທີ່ຄົນງານ 2 ຄົນກຳລັງລຳລຽງຖັງອ໋ອກຊີເຈນ ແລະ ໄດ້ເກີດການລະເບີດຂຶ້ນຢ່າງແຮງ, ເຮັດໃຫ້ຄົນງານ 3 ຄົນເສຍຊີວິດຄາທີ່ ແລະ ອີກ 3 ຄົນໄດ້ຖືກນຳຕົວສົ່ງໂຮງໝໍທີ່ເມືອງປາກຊັນແລ້ວກໍເສຍຊີວິດໃນໄລຍະຕໍ່ມາ. ສ່ວນຄົນງານອີກ 5 ຄົນທີ່ຢູ່ໃກ້ກັນໄດ້ຮັບບາດເຈັບເຂົ້າຮັບການປິ່ນປົວທີ່ໂຮງໝໍ ເຊັ່ນກັນ. ນອກນັ້ນ, ພະນັກງານຫຼາຍກວ່າ 80 ຄົນທີ່ຢູ່ໃນເຂດໃກ້ຄຽງຂອງອຸບັດເຫດ ໄດ້ເຂົ້າຮັບການກວດປະສິດທິພາບຂອງການໄດ້ຍິນ ແລະ ກວດກາລະບົບການເຮັດວຽກຂອງສາຍຕາ ໃນນັ້ນ, ມີພະນັກງານສອງຄົນໄດ້ຮັບຄວາມເສຍຫາຍທີ່ເປັນອັນຕະລາຍຕໍ່ເຈ້ຍຫູຂອງເຂົາເຈົ້າ.
ສະຫຼຸບລວມແລ້ວ, ພະນັກງານທີ່ເສຍຊີວິດທັງ 6 ຄົນ ແມ່ນຄົນຫວຽດນາມ ແລະ ສັງກັດຢູ່ບໍລິສັດ ຊົງດາ 5 ເຊິ່ງເປັນໜຶ່ງໃນຜູ້ຮັບເໝົາຍ່ອຍຂອງໂຄງການໄຟຟ້ານ້ຳງຽບ 1. ສ່ວນຄອບຄົວຂອງຜູ້ເສຍຊີວິດກໍໄດ້ຮັບການຊົດເຊີຍໂດຍອີງຕາມກົດໝາຍຂອງລັດຖະບານປະເທດຫວຽດນາມ.
ຜູ້ຊ່ຽວຊານສາກົນພາຍນອກ ແລະ ຫຼັງຈາກການຄົ້ນຄວ້າວິໄຈຢ່າງລະອຽດກ່ຽວກັບອຸບັດເຫດທີ່ມີລັກສະນະຄ້າຍຄືກັນພົບວ່າ: ການລະເບີດເປັນຊິ້ນໆເປັນການລະເບີດທີ່ຜິດປົກກະຕິທີ່ສຸດ ເພາະວ່າໂດຍປົກກະຕິແລ້ວເມື່ອຖັງແກັສຕົກລົງ ຖັງຈະຍັງຄົງສະພາບເດີມ ຫຼື ບໍ່ກໍຈະຫັກ ຫຼື ແຕກຈີກອອກຈາກກັນ ແຕ່ຈະບໍ່ມີລັກສະນະການແຕກກະຈາຍຕົວເຊັ່ນກໍລະນີນີ້, ເຊິ່ງຜູ້ຊ່ຽວຊານໄດ້ເຫັນດີຢ່າງເປັນເອກະສັນໃນຂໍ້ສະຫລຸບຂອງເຂົາເຈົ້າ ແລະ ການທົດລອງຍັງຄົງດຳເນີນຕໍ່ໄປເພື່ອຢັ້ງຢືນວ່າ: ຄວາມແຂງແຮງ ແລະ ຄວາມທົນທານຂອງຖັງຈະຫຼຸດລົງຕາມອາຍຸຂອງຖັງ ແລະ ຈະເຮັດໃຫ້ຖັງເຫຼັກນັ້ນຜ່ອຍແຕກງ່າຍແທ້ບໍ່?.
ຜ່ານການສືບສວນສອບສວນ ແລະ ການວິໄຈ ໄດ້ສະຫຼຸບວ່າ: ການກະແທກຢ່າງກະທັນຫັນໄດ້ເປັນແຮງກະຕຸ້ນໃຫ້ຖັງແກັສລະເບີດແຕກກະຈາຍ ແລະ ເຖິງວ່າຈະໄດ້ສັງເກດເຫັນການເຂົ້າໝ້ຽງທັງຂ້າງໃນ ແລະ ຂ້າງນອກຂອງຊິ້ນສ່ວນຂອງຖັງແກັສທີ່ລະເບີດກໍຕາມ ແຕ່ບໍ່ໄດ້ສັງເກດເຫັນການເຂົ້າໝ້ຽງຫຼາຍຢູ່ຂ້າງນອກຖັງ.
ຜົນໄດ້ຮັບຈາກການທົດລອງໃນຫ້ອງວິໄຈຂອງຊິ້ນສ່ວນຂອງຖັງໃນເບື້ອງຕົ້ນໄດ້ຊີ້ໃຫ້ເຫັນແລ້ວວ່າຄ່າຄວາມແຂງແຮງແມ່ນຕ່ຳກວ່າທີ່ຄາດຄະເນ ແລະ ຈຳເປັນ. ໃນຂະນະທີ່ການທົດລອງທາງເຄມີໄດ້ສະແດງຜົນວ່າມັນຍັງຢູ່ໃນລະດັບມາດຕະຖານ. ສະນັ້ນ ມັນຈິ່ງເຮັດໃຫ້ຄິດໄດ້ວ່າ: ການເຂົ້າໝ້ຽງພາຍໃນຖັງ ອາດເປັນຜົນມາຈາກນ້ຳ ແລະ ສິ່ງເຈືອປົນທີ່ຕົກຄ້າງຢູ່ໃນຖັງຈາກການລ້າງ ແລະ ການໃຊ້ໃນການບັນຈຸແກັສຫຼາຍຊະນິດ ແລະ ຂອງແຫຼວມາເປັນເວລາຫຼາຍປີ.
ທ່ານ ໂຢຊິຮິໂຣ ຢາມາບາຢາຊິ (Mr. Yoshihiro Yamabayashi) ຜູ້ອຳນວຍການຂອງ ບໍລິສັດ ໄຟຟ້ານ້ຳງຽບ 1 ຈຳກັດ ກ່າວວ່າ: “ພາຍຫຼັງທີ່ອຸບັດເຫດໄດ້ເກີດຂຶ້ນ ແລະ ເພື່ອຮັບປະກັນຄວາມປອດໄພໃຫ້ແກ່ພະນັກງານຂອງ ບໍລິສັດ ໄຟຟ້ານ້ຳງຽບ 1 ຈຳກັດ ລວມເຖິງບັນດາຜູ້ຮັບເໝົາ ວຽກທຸກຢ່າງໄດ້ຢຸດລົງທັນທີ . ພາຍຫຼັງການສືບສວນສອບສວນໄດ້ດຳເນີນເປັນເວລາ 12 ວັນ ປັດຈຸບັນ ວຽກງານທັງໝົດໄດ້ຮັບການສືບຕໍ່ປະຕິບັດເປັນປົກກະຕິ ຍົກເວັ້ນວຽກທີ່ນຳໃຊ້ແກັສເຂົ້າໃນການຕັດເຫຼັກ ຈົນກວ່າຈະໄດ້ຮັບການກວດສອບ ແລະ ຢັ້ງຢືນວ່າສາມາດນໍາໃຊ້ໄດ້ຢ່າງປອດໄພ.”
ອຸບັດເຫດລັກສະນະນີ້ ຖືວ່າເປັນຄັ້ງທຳອິດທີ່ເກີດຢູ່ປະເທດລາວ. ເພື່ອຫຼີກເວັ້ນບໍ່ໃຫ້ເກີດເຫດການແບບນີ້ອີກໃນອະນາຄົດ ບໍລິສັດ ໄຟຟ້ານ້ຳງຽບ 1 ຈຳກັດ ຈະຮ່ວມເຮັດວຽກກັບບັນດາອົງການໃນລາວ ໃນການປຸກລະດົມຍົກສູງແນວຄິດເພື່ອໃຫ້ແລເຫັນວ່າ: ສີມືແຮງງານ ແລະ ການນຳໃຊ້ອຸປະກອນທີ່ມີມາດຕະຖານຕໍ່າ ອາດນຳໄປສູ່ອັນຕະລາຍຕໍ່ຄວາມປອດໄພທີ່ບໍ່ສາມາດເບິ່ງເຫັນໄດ້ໃນສະຖານທີ່ເຮັດວຽກ.

Cr: ຂ່າວເສດຖະກິດ-ການຄ້າ Lao Economic Daily