ຮູ້ຫລືບໍ່ ກິນໄຂ່ດິບໝັກຊອດ ອາດເຮັດໃຫ້ເປັນພະຍາດອາຫານເປັນພິດ

ຊ່ວງ​ນີ້​ຟີດ​ໃນ​ເຟດ​ບຸ໊ກ​ຂອງ​ໃຜ​ຫຼາຍ​ໆ​ຄົນ​ອາດຈະ​ເຫັນ​ຄົນ​ແຊ​ຣ​​ສູດ​ເຮັດ​ໄຂ່​ດິບ​ດອງ​ຊອດ​ ເມ​ນູ​ສຸດ​ຮິດ​ຂອງ​ຄົນ​ຍີ່​ປຸ່ນ​ ໃຜທີ່​ຢາກ​ກິນ​ອາຫານ​ຍີ່​ປຸ່ນ​ທັງ​ງ່າຍ​ທັງ​ແຊບ​ແບບ​ນີ້​ເລີຍ​ແຊ​ຣ​ສູດ​ກັນ​​ ແຕ່​ແພດ​ຫຼາຍ​ທ່ານ​ໄດ້​ອອກ​ມາ​ເຕືອນ​ເລື່ອງ​ຂອງ​ການ​ກິນ​ໄຂ່​ດິບ​(ທີ່​ບໍ່​ຜ່ານ​ຄວາມ​ຮ້ອນ​ເລີຍ​) ວ່າ​ ອາດ​ເຮັດໃຫ້​ເປັນ​ພະຍາດ​ອາຫານ​ເປັນ​ພິດ​ໄດ້​.

ໂດຍ​ເຊື້ອ​ແບັກ​ທີ​ເລຍ​ ສາ​ເຫດ​ທີ່​ເຮັດໃຫ້​ເກີດ​ພະຍາດ​ອາຫານ​ເປັນ​ພິດ​ນັ້ນ​ມີ​ຊື່​ວ່າ​ ແຊວ​ໂມ​ເນນ​ລາ​(Salmonella)ພົບ​ໄດ້​ທີ່​ເປືອກ​ໄຂ່​ແລະ​ພາຍ​ໃນ​ໄຂ່​ ແຖມ​ຍັງ​ຈະເລີນ​ເຕີບໃຫຍ່​ ເພີ່ມ​ຈຳນວນ​ແລະ​ຜະລິດ​ສານ​ພິດ​ໄດ້​ຢ່າງ​ວ່ອງໄວ​ໃນ​ອຸນຫະພູມ​ຫ້ອງ​ອີກ​ດ້ວຍ.​

ອາການ​ຂອງ​ພະຍາດ​ອາຫານ​ເປັນ​ພິດ​ ຈາກ​ເຊື້ອ​ແຊວ​ໂມ​ເນນ​ລາ​

1. ຢາກຮາກ,​ ປວດ​​ລຳ​ໄສ້​ແລະ​ອ່ອນ​ເພຍ​ຫລາຍ.​
2. ຖອກທ້ອງ, ຖ່າຍ​ເປັນ​ນ້ຳ​ຫລື​ອາດ​ມີ​ມູກ​ເລືອດ​ປົນ​ຢູ່​ດ້ວຍ.​
3. ຮ່າງກາຍ​ເສຍ​ນ້ຳ​ຫລາຍ​ ເຮັດໃຫ້​ອຸນຫະພູມ​ໃນ​ຮ່າງກາຍ​ຕ່ຳ​ກວ່າປົກກະ​ຕິ.​
4. ອາດ​ມີ​ອາການ​ຄວາມ​ດັນ​ເລືອດ​ຕ່ຳ​.
5. ໃນບາງຄົນ​ອາດ​ມີ​ໄຂ້​ໜາວ​ສັ່ນ.​

ແຕ່​ຖ້າ​ໃຜ​ສົງ​ໄສວ່າ​: ເປັນຫຍັງ​ຄົນ​ຍີ່​ປຸ່ນ​ກິນ​​ຢູ່​ເລື້ອຍໆ​ ບໍ່​ເຫັນ​ເປັນ​ຫຍັງ​ອາດຈະ​ມີ​ປັດ​ໄຈ​ອື່ນ​ເຊັ່ນ​ ຄວາມ​ສົດ​ແລະ​ຄວາມ​ສະ​ອາດ​ຂອງ​ໄຂ່​ ແຕ່​ເຖິງ​ແນວ​ນັ້ນ​ຄົົນທີ່​ມັກ​ກິນໄຂ່​ດິບ​ກໍ່​ຍັງມີ​ໂອ​ກາດ​ໄດ້​ກິນຢ່າງ​ປອດໄ​ພ​ຫລາຍ​ຍິ່ງ​ຂຶ້ນ​ຫາກ​ປະຕິບັດ​ຕາມ​ນີ້.​

ວິທີຫຼຸດ​ຄວາມ​ສ່ຽງ​ໃນ​ການ​ຕິດ​ເຊື້ອ​ແບັກ​ທີ​ເລຍ​ຈາກ​ໄຂ່​ດິບ​

1. ເກັບ​ໄຂ່​ໄວ້​ໃນ​ຕູ້​ເຢັນ​ທີ່​ມີ​ອຸນຫະພູມ​ຕ່ຳ​ກວ່າ​ 4 ອົງ​ສາ​​ ເພາະ​ສາມາດ​ຢັບ​ຢັ້ງ​ການ​ຈະເລີນ​ເຕີບໃຫຍ່ຂອງ​ເຊື້ອ​ແບັກ​ທີ​ເລຍ​ນີ້​ໄດ້​.
2. ບໍ່​ຄວນ​ວາງ​ໄຂ່​ໄວ້​ນອກ​ຕູ້​ເຢັນ​ຫລື​ວາງ​ໄວ້​ໃນ​ອຸນຫະພູມ​ຫ້ອງ​ດົນ​ກວ່າ​ 2 ຊົ່ວ​ໂມງ​
3. ລ້າງ​ຫລື​ເຊັດ​ເປືອກ​ໄຂ່​ໃຫ້​ສະ​ອາດ​ ຫາກ​ພົບ​ໄຂ່​ທີ່​ເປືອກ​ໄຂ່​ມີ​ຮອຍ​ແຕກ​ບໍ່​ຄວນ​ນຳ​ມາ​ຮັບປະທານ​.
ບາດ​ນີ້​ກ່ອນ​ຈະ​ດອງ​ໄຂ່​ໃນ​ຊີ​ອິ້ວ​ແບບ​ຊາວ​ຍີ່​ປຸ່ນ​ ກໍ່​ເລືອກ​ໄຂ່​ທີ່​ຈະ​ນຳ​ມາ​ກິນ​​ໃຫ້​ດີ​ໆ​ຈະ​ໄດ້​ທັງແຊບ​ ທັງ​ມີ​ປະໂຫຍດ​ກັນ​ຢ່າງ​ເຕັມ​ທີ່​ແທ້ໆ.

=================================================================================================================================