ຮູ້ທັນປ້ອງກັນໄດ້!!! ພະຍາດອັກເສບຕັບ A

       ອີງ​ຕາມ​ການ​ລາຍ​ງານ​ຂອງ ພະ​ແນກ​ສາທາລະນະ​ສຸກ ນະຄອນ​ຫຼວງ​ວຽງ​ຈັນ (ນວ) ໃນກອງ​ປະຊຸມ​ປຶກສາ​ຫາລື​ກະກຽມຄວາມ​ພ້ອມ​ ໃນ​ການ​ເຝົ້າ​ລະວັງ ແລະ ຕອບ​ໂຕ້​ພະຍາດ​ອັກເສບຕັບ A ຮູ້​ວ່າ: ພະຍາດ​ອັກເສບ​ຕັບ A ແມ່ນ​ຕິດແປດ​ໄດ້​ງ່າຍ ແຕ່​ບໍ່ມີ​ຄວາມ​ຮຸນ​ແຮງ ແລະ ມີ​ອັດຕາການ​ຕາຍ​ພຽງ​ແຕ່ 0,3% ສະນັ້ນ ປະຊາຊົນບັນດາເຜົ່າ​ຈຶ່ງ​ບໍ່ຄວນ​ແຕກ​ຕື່ນ​ຕໍ່​ພະຍາດ​ດັ່ງກ່າວ ແຕ່​ຕ້ອງ​ມີ​ມາດ​ຕະການ​ຄຸມ​ເຂັ້ມ ທຸກ​ຄົນ​ຕ້ອງ​ເອົາໃຈໃສ່​ພ້ອມ​ກັນຮັກສາ​ສຸ​ຂະ​ອະນາໄມ.

ພະຍາດ​ອັກເສບ​ຕັບ A ແມ່ນຕິດເຊື້ອ​ພະຍາດ​ໄດ້​ງ່າຍ​ໂດຍ ການ​ຈັບບາຍ ຫຼື ສຳຜັດ​ໂດຍ​ກົງກັບ​ຜູ້​ທີ່​ກຳລັງ​ຕິດເຊື້ອ ຈາກ​ການກິນ​ອາຫານ ແລະ ຈາກ​ການ​ນຳໃຊ້​ນ້ຳ​ທີ່​ປົນ​ເປື້ອນ​ເຊື້ອ​ພະຍາດເຂົ້າ​ທາງ​ປາກ ບໍ່​ນຳ​ໃຊ້​ວິດຖ່າຍຮ່ວມ​ກັນ ການ​ປະຕິບັດ​ຫຼັກການອະນາໄມ​ສາມ​ສະອາດ​ບໍ່​ໄດ້​ດີ ແລະ ອື່ນໆ ເຊິ່ງ​ການ​ຕິດ​ພະຍາດ​ດັ່ງກ່າວ​ນີ້ ​ຜູ້​ໃຫຍ່​ຈະ​ສະແດງ​ອອກ​ເລີ່ມ​ຕົ້ນ​ດ້ວຍ​ການ​ມີ​ໄຂ້ ອິດເມື່ອຍ ບໍ່​ຢາກກິນເຂົ້າ ຖອກທ້ອງ ປວດຮາກ ທ້ອງ​ເບັງ ຍ່ຽວເປັນ​ສີເຫຼືອງ ຜິວໜັງ​ເຫຼືອງ ແຕ່ຖ້າ​ເປັນ​ເດັກນ້ອຍ​ສ່ວນ​ຫຼາຍຈະມີ​ອາການ​ແບບ​ເບົາບາງ ແລະ ບໍ່ມີ​ອາການ​ເຫຼືອງ ພະຍາດ​ດັ່ງກ່າວ​ຈະ​ບໍ່​ມີ​ຢາ​ປິ່ນປົວ ແຕ່​ຜູ້​ເປັນພະຍາດ​ຈະ​ສາມາດ​ຫາຍ​ດີ​ເອງໄດ້​ພາຍໃນ 1 ເດືອນ ແຕ່​ຕ້ອງ​ໄປ​ຫາ​ແພດ​ໝໍ ເພື່ອ​ໃຫ້​ຄຳ​ແນະນຳ ແລະ ປິ່ນປົວ.

        ສ່ວນ​ວິທີ​ປ້ອງ​ກັນ​ທີ່​ຖືກຕ້ອງນັ້ນ ຕ້ອງ​ລ້າງ​ມື​ໃຫ້​ສະອາດ ​ດ້ວຍການ​ໃສ່​ສະບູ​ທຸກ​ຄັ້ງ​ຖ້າ​ມີ​ການຈັບບາຍ ຫຼື ສຳຜັດ​ກັບ​ຄົນ​ເຈັບ ຫຼັງ​ໃຊ້​ວິດຖ່າຍ ແລະ ກ່ອນ​ປຸງ​ອາຫານ ນອກ​ນີ້ຍັງ​ຕ້ອງ​ດື່ມນ້ຳ​ສະອາດ ຫຼື ນ້ຳ​ຕົ້ມ​ທີ່​ສຸກ ກິນ​ອາຫານ​ທີ່​ປຸງ​ແຕ່ງ​ສຸກ ແລະ ສະອາດ ອັນ​ສຳຄັນ​ໜຶ່ງ​ອີກ​ຜູ້​ທີ່​ຕິດເຊື້ອ​ພະຍາດ​ດັ່ງກ່າວ​ ບໍ່​ຄວນ​ປຸງແຕ່ງອາຫານ​ໃຫ້​ຄົນ​ອື່ນ​ກິນ ແລະ ຫຼີກ​ລ່ຽງ​ການ​ນຳ​ໃຊ້​ອຸປະກອນ​ຮ່ວມ​ກັນ ​ເປັນຕົ້ນ ແປງ​ຖູແຂ້ວ ມີດແຖ​ໜວດ ຖ້ວຍ ບ່ວງ ຈອກ​ນ້ຳ ຜ້າ​ເຊັດ​ໂຕ ແລະ ອື່ນໆ ແລະ ຜູ້​ທີ່​ມີ​ອາການ​ຄ້າຍ​ກັບ​ທີ່ກ່າວ​ມາ​ຂ້າງ​ເທິງ​ນີ້ ​ແມ່ນ​ໃຫ້​ໄປຫາ​ໂຮງໝໍ​ດ່ວນ.

ແຫຼ່ງຂ່າວ: ໜັງສືພິມວຽງຈັນໃໝ່