ຮືຮາ!! ຂຸນຄ້ອນທຸ່ມ 25 ລ້ານປອນຫວັງດຶງ ວາດີ

 

ສື່ຜູ້ດີຕີຂ່າວ ເວສແຮມ ຢູໄນເຕັດ ສ້າງປະຫຼາດໃຈໂດຍການກຽມຈົກເງິນຈຳນວນ 25 ລ້ານປອນເພື່ອດຶງ ເຈມີ ວາດີ ຫົວຫອກຂອງ ເລສເຕີ ຊີຕີ ມາຮ່ວມທັບໃນຮັງ ໂອລິມປິກ ສະເຕດຽມ ລະດູການໜ້າຫຼັງຈາກທີ່ນັກເຕະປ່ອຍຟອມເທບໄດ້ເໜືອຄວາມຄາດໝາຍໃນລະດູການນີ້.

 

“ລອນດອນ ອີວີນິງ ສະແຕນດາດ” ສື່ຊື່ດັງຂອງປະເທດອັງກິດລາຍງາຂ່າວວ່າ ເວສແຮມ ຢູໄນເຕັດ ສະໂມສອນດັງຈາກ ພຣີເມຍລີກ ອັງກິດ ກຳລັງພິຈາລະນາທີ່ຈະຍື່ນຂໍ້ສະເໜີສູງເຖິງ 25 ລ້ານປອນເພື່ອຫວັງທີ່ຈະດຶງ ເຈມີ ວາດີ ຫົວຫອກຂອງ ເລສເຕີ ມາເສີມຄົມໃນລະດູການໜ້າ.

 

ກອງໜ້າທີມຊາດອັງກິດເຮັດຜົນງານໄດ້ດີຈົນໄດ້ລາງວັນນັກເຕະດີເດັ່ນຂອງປີຂອງສະມາຄົມບານເຕະອັງກິດມາຄອງເມື່ອວັນທີ 2 ພຶດສະພາທີ່ຜ່ານມາ ແລະ ນັບເປັນຄີແມນຄົນສຳຄັນຊ່ວຍໃຫ້ “ຈິງຈອກເງິນ” ໄດ້ແຊມລີກຜູ້ດີລະດູການນີ້.

 

ຢ່າງໃດກໍຕາມເຖິງວ່າ ວາດີ ຫາກໍຕໍ່ສັນຍາໃໝ່ 3 ປີ ພ້ອມກັບຄ່າເມື່ອຍສູງເຖິງ 80,000 ປອນເມື່ອເດືອນກຸມພາ ແຕ່ຫຼ້າສຸດສື່ຈາກແດນຜູ້ດີອ້າງວ່າ “ພົນຄ້ອນຜູ້ດີ” ກຽມທົດສອບຄວາມອົດທົນຂອງ ເລສເຕີ ໂດຍການຍື່ນເງິນປະມານ 25 ລ້ານປອນເພື່ອດຶງອະດີດດາວເຕະ ຟິດວູດ ທາວ ມາໄດ້ໃນອ້ອມກອດໃຫ້ໄດ້.

 

ຂະນະດຽວກັນ “ລອນດອນ ອີວີນິງ ສະແຕນດາດ” ຕີຂ່າວອີກວ່າ ຄຣິສເຕຢັອງ ເບັນເຕເກ ຫົວຫອກ ລີເວີພູ ກຳລັງຕົກເປັນເປົ້າໝາຍຂອງ ເລສເຕີ ດ້ວຍເຊັ່ນກັນເຖິງວ່ານັກເຕະຈະຮັບຄ່າເມື່ອຍກັບ “ຫົງແດງ” ຫຼາຍເຖິງອາທິດລະ 120,000 ປອນກໍຕາມ.