ຮິດເຟລດ ຟັນທຸງ ເປບ ລາ "ເສືອໃຕ້" ນັ່ງຕັກ "ເຮືອໃບ"

ອັອດມາ ຮິດເຟລດ ອະດີດຜູ້ຈັດການທີມຊື່ດັງສະນັ່ນໂລກຟັນທຸງ ເປັບ ກວາດິໂອລາ ນາຍໃຫຍ່ ບາເຢິນ ມິວນິກ ຕັດສິນໃຈທີ່ຈະຈົບຊີວິດການຄຸມບັງຫຽນ “ເສືອໃຕ້” ແລ້ວໂດຍຄາດວ່າຈະຍ້າຍໄປເຮັດໜ້າທີ່ຄຸມທັບ “ເຮືອໃບ” ແມນເຊສເຕີ ຊີຕີ ຫຼັງຈາກຈົບລະດູການນີ້.

ອັອດມາ ຮິດເຟລດ ຕຳນານຜູ້ຈັດການ ບາເຢິນ ມິວນິກ ມະຫາອຳນາດຈາກ ບຸນເດສລີກາ ເຢຍລະມັນ ເຊື່ອວ່າ ໂຈເຊບ ກວາດິໂອລາ ຜູ້ຈັດການຄົນເກັ່ງຕັດສິນໃຈຍົກມືລາ “ເສືອໃຕ້” ແລ້ວ ແລະ ມີຄວາມເປັນໄປທີ່ຈະຍ້າຍໄປຄຸມທັບ ແມນເຊສເຕີ ຊີຕີ ທີມດັງໃນເມືອງຜູ້ດີ.

ໂດຍທີ່ນາຍໃຫຍ່ຊາດ ສະເປນ ຈະໝົດສັນຍາໃນການຄຸມທັບໃນຖິ່ນ ເອລິອັນ ອາຣີນາ ຫຼັງຈາກຈົບລະດູການນີ້ ໂດຍທີ່ໃນໄລຍະຜ່ານເຂົາກໍຍັງບໍ່ຍອມຂະຫຍາຍສັນຍາໃໝ່ກັບຕົ້ນສັງກັດ ພ້ອມທັງຍັງມີລາຍງານອອກມາເປັນຊ່ວງວ່າ ກວາດິໂອລາ ໄດ້ຕົກລົງເງື່ອນໄຂທີ່ຈະເຂົ້າໄປຄຸມທັບ “ເຮືອໃບສີຟ້າ” ແທນນາຍໃຫຍ່ ມານູເອວ ເປເຢກຣິນີ.

ຮິດເຟລດ ເຊິ່ງເຄີຍນຳ ບາເຢິນ ຄວ້າແຊມລີກເມືອງເບຍ 5 ສະໄໝ ແລະ ຢູຟາ ແຊມປຽນລີກ ໃນຊ່ວງທີ່ຄຸມທີມ 2 ໄລຍະ ເຊື່ອວ່າຕອນນີ້ ອະດີດນາຍໃຫຍ່ ບາເຊໂລນາ ພ້ອມທີ່ຈະອອກຈາກທີມຫຼັງຈາກຈົບລະດູການນີ້ “ຂ້ອຍຄາດວ່າ ເປບ ອາດຈະອຳລາ ບາເຢິນ ແນ່ນອນ ເພາະ ແມນເຊສເຕີ ຊີຕີ ພ້ອມທີ່ຈະທຸ່ມເງິນມະຫາສານ ບໍ່ມີເຫດຜົນທີ່ຕ້ອງຖ້າຈົນຮອດເດືອນທັນວາສຳລັບການຕັດສິນໃຈໃນເລື່ອງນີ້”.

........................................................................................................................................................