ຮິດດິງບໍ່ທົນ!! ຈວກແຟນບານກຽນດຶກຫຼຽນໃສ່ແຄ່ງ ເຮືອໃບ

 

ກຸສ ຮິດດິງ ນາຍໃຫຍ່ຂອງ ເຊວຊີ ອອກມາຕໍ່ວ່າແຟນບານກຸ່ມໜຶ່ງຂອງທີມທີ່ດຶກຫຼຽນໃສ່ນັກເຕະຂອງ ເຮືອໃບ ໃນເກມ ເອຟເອ ຄັບ ຮອບ 5 ນັດທີ່ທັງສອງທີມເຈີກັນ ພ້ອມກັບຊີ້ວ່າຄົນເຫຼົ່ານີ້ບໍ່ສົມຄວນໄດ້ເຂົ້າມາໃນສະໜາມ.

 

ກຸສ ຮິດດິງ ຜູ້ຈັດການທີມຊົ່ວຄາວຂອງ ເຊວຊີ ສະໂມສອນໃນ ພຣີເມຍລີກ ປະນາມແຟນບານຂອງທີມຫຼັງເຊື່ອວ່າກອງເຊຍ “ສິງໂຕນ້ຳເງິນ” ກຸ່ມໜຶ່ງດຶກຫຼຽນໃສ່ນັກເຕະ ແມນເຊສເຕີ ຊີຕີ ລະຫວ່າງເກມ ເອຟເອ ຄັບ ຮອບ 5 ນັດທີ່ທີມຮັກຂອງພວກເຂົາເປີດຮັງຊະນະ ຊີຕີ ໄປ 5-1 ເມື່ອວັນອາທິດທີ່ຜ່ານມາ.

ຕອນທີ່ບັນດາແຄ່ງທີມຢາມກຳລັງສະຫຼອງຢ່າງເຕັມທີ່ຫຼັງຈາກຕີສະເໝີໄດ້ໃນນາທີ 37 ນັ້ນ ພາບຊ້າຈາກກ້ອງໂທລະພາບສະໃຫ້ເຫັນວ່າມີຫຽນຫຼາຍຫຼຽນຖືກດຶກມາຕົກໃກ້ກັບຈຸດທີ່ບັນດານັກເຕະ ຊີຕີ ຢືນຢູ່ເຊິ່ງວ່ກຳມະການ ອັງເດຣ ມາຣິເນີ ກໍເກັບເອົາໄວ້ເປັນຫຼັກຖານແລ້ວ ຂະນະທີ່ໂຄສົກຂອງ ເຊວຊີ ກໍປະກາດວ່າຈະຈັບຕົວຜູ້ກະທຳຜິດໃຫ້ໄດ້ລວມເຖິງສັ່ງຫ້າມເຂົ້າສະໜາມດ້ວຍ.

 

ຮິດດິງ ເຜີຍວ່າ “ຂ້ອຍຮູ້ວ່າເກີດເລື່ອງນັ້ນຂຶ້ນ ແລະ ຂ້ອຍຕ້ອງການປະເຊີນໜ້າກັບຄວາມຈິງ ເຮົາຂໍປະນາມມັນ ຂ້ອຍຂໍຕຳນິເລື່ອງນີ້ຢ່າງເຕັມທີ່ ແລະ ເຊວຊີ ຈະຕອບໂຕ້ກັບເລື່ອງທີ່ເກີດຂຶ້ນ ຄົນເຫຼົ່ານີ້ຕ້ອງບໍ່ໄດ້ເຂົ້າໃນສະໜາມ”.

 

ບົດຄວາມໃຫມ່ໆ