ຮາກຣີບບອກຜີຄວນຊື້ດີບາລາຫຼາຍກວ່າກຣິສມັນ

 

ໂອເວັນ ຮາກຣີບ ອະດິດມິດຟິວຄົນດັງລະບຸ ແມນ ຢູໄນເຕັດ ຄວນຈະຊື້ ເປົາໂລ ດີບາລາ ດາວຍິງຂອງ ຢູເວັນຕຸດ ຫຼາຍກວ່າ ອັອງຕວນ ກຣິສມັນ ຫົວຫອກຂອງ ແອັດ ມາດຣິດ ຊີ້ “ຜີສາດແດງ” ຕ້ອງການນັກເຕະແບບ ດີບາລາ ສຸດໆ.

 

ໂອເວັນ ຮາກຣິບ ອະດີດກອງກາງອັງກິດສະແດງຄວາມເຊື່ອວ່າ ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ຄວນຈະໄປທຸ່ມເງິນຊື້ ເປົາໂລ ດີບາລາ ກອງໜ້າຄົນເກັ່ງຂອງ ຢູເວັນຕຸດ ມາຮ່ວມທີມຫຼາຍກວ່າ ອັອງຕວນ ກຣິສມັນ ດາວຍິງ ແອັດ ມາດຣິດ.

 

ແມນ ຢູໄນເຕັດ ຕົກເປັນຂ່າວກັບ ກຣິສມັນ ຢ່າງໜັກຫຼັງຈາກທີ່ເຈົາມີຜົນງານທີ່ດີກັບ ແອັດ ມາດຣິດ ໂດຍລະດູການນີ້ກໍຍິງໄປແລ້ວ 25 ປະຕູຈາກການລົງຫຼິ້ນໃນທຸກລາຍການ ແລະ ຍັງເຮັດຜົນງານໄດ້ໜ້າປະທັບໃຈກັບທີມຊາດຝຣັ່ງອີກ ເຊິ່ງມັນກໍເບິ່ງວ່າເຂົາຈະເຂົ້າກັບ “ຜີສາດແດງ” ໄດ້ຢ່າງສົມບູນແບບ.

 

ທັງນີ້ “ຜີສາດແດງ” ເອງກໍກຳລັງເບິ່ງຫາກອງໜ້າຊັ້ນນຳເຊັ່ນກັນເພື່ອທີ່ຈະແກ້ບັນຫາໃນເກມບຸກ ຫຼັງຈາກທີ່ ຊະລາຕັນ ອິບຣາຮິໂມວິດ ເຈັບໜັກຈົນຕ້ອງພັກເປັນເວລາດົນສ່ວນຄົນອື່ນໆກໍມີຜົນງານທີ່ບໍ່ດີເທົ່າທີ່ຄວນ ເຖິງແບບນັ້ນ ຮາກຣີບ ກໍຮູ້ສຶກວ່າ ແມນ ຢູໄນເຕັດ ຄວນທີ່ຈະໄປລ່າຕົວ ດີບາລາ ຫຼາຍກວ່າເພາະວ່າ “ຜີສາດແດງ” ກຳລັງຕ້ອງການນັກເຕະແບບນັ້ນ.