ຮອບທີ 3!!ມູຖືກຕັ້ງຂໍ້ຫາຄະດີເຕະຕຸກນຳ້

 

ເອຟເອ ຕັ້ງຂໍ້ຫາປະພຶດຕົນບໍ່ເໝາະສົມກັບ ໂຊເຊ ມູຣິນໂຢ ກຸນຊື ແມນ ຢູໄນເຕັດ ໂທດຖານເຕະຕຸກນຳ້ໃນເກມທີ່ສະເໝີກັບ ເວສແຮມ ໂດຍເຂົາມີເວລາຈົນຮອດວັນທີ 1 ທັນວານີ້ໃນການເລືອກວ່າຈະເຮັດຈັ່ງໃດກັບຂໍ້ຫານີ້ຕໍ່ໄປ.

 

ໂຊເຊ ມູຣິນໂຢ ຜູ້ຈັດການທີມ ແມນເຊສເຕີ ຢູໄນເຕັດ ຖືກສະມາຄົມບານເຕະອັງກິດ ຫຼື ເອຟເອ ຕັ້ງຂໍ້ຫາສະແດງຄວາມປະພຶດບໍ່ເໝາະສົມຈາກການກະທຳຂອງເຂົາໃນເກມ ພຣີເມຍລີກ ນັດທີ່ “ຜີສາດແດງ” ເຮັດໄດ້ພຽງສະເໝີກັບ ເວສແຮມ ຢູໄນເຕັດ 1-1 ເມື່ອວັນອາທິດທີ່ຜ່ານມາ.

 

ໃນນັດດັ່ງກ່າວ ໂຈນາທານ ມອສ ແຈກໃບເຫຼືອງໃຫ້ກັບ ປໍ ປັອກບາ ກອງກາງຂອງ ແມນ ຢູໄນເຕັດ ຈາກການທີ່ເຂົາເຮັດພຸ່ງລົ້ມເຊິ່ງ ມູຣິນໂຢ ບໍ່ພໍໃຈກັບການຕັດສິນຄັ້ງນີ້ໂຄດໆຈົນເຕະຕຸກນຳ້ທີ່ຂ້າງສະໜາມເພື່ອລະບາຍອາລົມ.

 

ທັນທີທີ່ກໍ່ເຫດການນັ້ນ ມູຣິນໂຢ ກໍຖືກ ມອສ ໄລ່ອອກຈາກການຄຸມທີ່ຂ້າງສະໜາມທັນທີຈົນເຮັດໃຫ້ເຂົາຖືກຕັ້ງຂໍ້ຫາໃນເບື້ອງຕົ້ນເຊິ່ງນີ້ຖືເປັນເທື່ອທີ 3 ປະຈຳລະດູການນີ້ແລ້ວທີ່ເຂົາຖືກ ເອຟເອ ຕັ້ງຂໍ້ຫາ ແລະ ກຸນຊືຝອຍທອງກໍອາດຈະຖືກສັ່ງແບນເປັນເວລາດົນໂທດຖານທີ່ກໍ່ຄວາມຜິດຊຳ້ໆ ໂດຍເຂົາມີເວລາເລືອກວ່າຈະຍອມຮັບ ຫຼື ອຸທອນຂໍ້ຫານີ້ ຫຼື ບໍ່ຈົນຮອດວັນພະຫັດທີ 1 ທັນວານີ້.

 

ບົດຄວາມໃຫມ່ໆ