ຮອຍແຕກ!!ແຄ່ງຊຸດຂາວລັກນິນທາໂດ້ຫຼັງຟອມຕົກ

 

ຄິດຫາແຕ່ໂຕເອງ!!ສື່ກະທິງຕີຈາກບັນຫາປືນຝືດ ແລະ ວິທີການຫຼິ້ນແບບເຫັນແກ່ໂຕຂອງ ຄຣິສຕຽນໂນ ໂຣເນົາໂດ ສົ່ງຜົນໃຫ້ນັກເຕະ ເຣອັນ ມາດຣິດ ບາງຄົນສຸດທົນ ແລະ ເລີ່ມມີການນິທາເຂົາລັບຫຼັງໃນຫ້ອງແຕ່ງໂຕ.

 

ຟອມການຫຼິ້ນອັນຕົກຕຳ່ຂອງ ໂຣເນົາໂດ ດາວຍິງຂອງ ເຣອັນ ມາດຣິດ ທີມຍັກໃຫຍ່ຂອງ ລາ ລີກາ ສະເປນເປັນສາເຫດເຮັດໃຫ້ເກີດບັນຫາ ແລະ ຮອຍແຕກຂຶ້ນໃນຫ້ອງແຕ່ງໂຕຂອງ “ລາຊາຊຸດຂາວ” ຈາກລາຍງານຂອງສື່ແດນກະທິງເມື່ອວັນພຸດທີ່ຜ່ານມາ.

 

ດາວດັງທີມຊາດປັອກຕຸຍການຫາກໍຍິງໄດ້ພຽງ 4 ປະຕູເທົ່ານັ້ນໃນລະດູການນີ້ ຂະນະທີ່ເກມຊະນະ ແອັດເລຕິກ ບິນເບົາ 2-1 ເມື່ອວັນອາທິດທີ່ຜ່ານມາກໍຖືກແຟນບານສົ່ງສຽງໂຫ່ໃສ່ຫຼັງຈາກທີ່ເລືອກຍິງເອງຫຼາຍກວ່າສົ່ງບານໃຫ້ໝູ່ທັງທີ່ໝູ່ຢືນຢູ່ໂລ່ງໆ ສົ່ງຜົນໃຫ້ທີມພາດໂອກາດໄດ້ປະຕູຫຼາຍເທື່ອເຊິ່ງມີລາຍງານວ່າເພື່ອນຮ່ວມທີມບາງຄົນອອກອາການບໍ່ພໍໃຈ ແລະ ມີການນິນທາລັບຫຼັງ ໂຣເນົາໂດ ໃນຫ້ອງແຕ່ງໂຕ.

 

ປິປີ ເອສຕຣາດາ ນັກຂ່າວຂອງສະຖານີໂທລະພາບໃນນະຄອນມາດຣິດອອກມາປະນາມຄົນທີ່ນິນທາງໂຄດແຄ່ງອາຍຸ 31 ປີລັບຫຼັງວ່າ “ຖ້າມີໃຜຄົນໜຶ່ງເປັນຜູ້ນຳໃນການວິຈານ ໂຣເນົາໂດ ໃນຫ້ອງແຕ່ງໂຕ ເມື່ອນັ້ນເຂົາຄວນຈະເຮັດມັນຕໍ່ໜ້າ ຄຣິສຕຽນໂນ ມີສຽງນິນທາລັບຫຼັງຂຶ້ນເລື້ອຍໆ ຫ້ອງແຕ່ງໂຕຖືກນຳໄປຈາກບັນດາຜູ້ນຳ ແຕ່ເຮົາບໍ່ສາມາດປະຕິເສດໄດ້ວ່າ ມີບາງສິ່ງເຊິ່ງຈະຕ້ອງຂໍຄຳອະທິບາຍສຳລັບສິ່ງທີ່ເຮັດ”.

 

ທັງນີ້ ມຸນໂດ ເດປໍຕິໂບ ສື່ດັງແດນກະທິງລາຍງານວ່າ ການກະທົບກະທັ້ງກັນໃນການຝຶກຊ້ອມລະຫວ່າງ ໂຣເນົາໂດ ກັບ ຮາເມສ ໂຣດຣິເກດ ເມື່ອຕົ້ນເດືອນຕຸລາມີສະນວນເລີ່ມຕົ້ນມາຈາກຄວາມເຫັນແກ່ໂຕຂອງອະດີດເດັກປັ້ນ ສະປອດຕິງ ລິສບອນ.