ຮອງນາຍົກລັດຖະມົນຕີ ເປັນກຽດເຂົ້າຮ່ວມ ດຳເນີນຊີວິດການເມືອງ ຢູ່ແຂວງຜົ້ງສາລີ

ຂປລ. ​ວັນ​ທີ 20 ກໍລະກົດ 2015 ທີ່​ສຳນັກງານ​ປົກຄອງ​ ແຂວງ​ຜົ້ງສາລີ ​ໄດ້​ເປີດ​ບັ້ນດຳ​ເນີນ​ຊີວິດ​ການ​ເມືອງຂຶ້ນ ​ໂດຍ​ໃຫ້ກຽດ​ເປັນ​ປະທານ​ຂອງ ສະຫາຍ ສົມສະຫວາດ ​ເລັ່ງສະຫວັດ ກຳມະການ​ ກົມ​ການ​ເມືອງ​ສູນກາງ​ພັກ, ຮອງ​ນາຍົກລັດຖະມົນຕີ ຜູ້​ຊີ້ນຳ​ວຽກງານ​ ເສດຖະກິດ​ການ​ຜະລິດ ​ແລະ ຈໍລະ​ຈອນ ​ເຊິ່ງມີ​ສະຫາຍ ຄຳ​ເຈນ ວົງ​ໂພ​ສີ ກຳມະການ​ສູນ​ກາງ​ພັກ, ​ເລຂາ​ຄະນະ​ພັກ​ແຂວງ ​ເຈົ້າ​ແຂວງໆຜົ້ງສາລີ ພ້ອມ​ຄະນະນໍາຈາກ​ສູນ​ກາງ​ພັກ, ບັນດາ​ຄະນະ​ປະຈຳ​ພັກ​ແຂວງ ​ແລະ ຄະນະ​ພັກ​ແຂວງ ​​ເຂົ້າຮ່ວມ.

         ສະຫາຍ ຄຳ​ເຈນ ວົງ​ໂພ​ສີ ​ກ່າວ​ວ່າ: ​ການ​ເປີດ​ບັ້ນດຳ​ເນີນ​ຊີວິດ​ການ​ເມືອງ​ເທື່ອ​ນີ້ ​ແມ່ນ​ເພື່ອປະກອບ​ຄຳ​ຄິດ​ຄຳ​ເຫັນ ໃສ່ບົດ​ສຳຫລວດການ​ນຳພາ​ລວມ ຂອງ​ຄະນະ​ບໍລິຫານ​ງານ​ພັກ​ແຂວງ ​ແລະ ວຽກງານ​ສະ​ເພາະ​ແຕ່​ລະ​ດ້ານ ຕະຫລອດ​ໄລຍະສະ​ໄໝທີ IX ຂອງ​ອົງຄະ​ນະ​ພັກ​ແຂວງ ອັນ​ເຫັນ​ໄດ້​ບັນດາ​ຜົນງານ ​ແຫ່ງ​ການ​ຊີ້ນຳ-ນຳພາ, ທັງ​ຍົກ​ໃຫ້​ເຫັນ​ຈຸດ​ດີ, ຈຸດ​ອ່ອນ-ຂໍ້ຄົງຄ້າງ ​ແລະ ບາງ​ບົດຮຽນທີ່ຖອດ​ຖອນ​ໄດ້​ ​ເຊິ່ງ​ໃນ​ໄລຍະ 5 ປີ​ທີ່​ຜ່ານ​ມາ ຄະນະ​ບໍລິຫານ​ງານ​ພັກ​ແຂວງ ​ໄດ້​ພ້ອມ​ກັນຊີ້ນຳ-ນຳພາ ​ໃນ​ການ​ເພີ່ມ​ຄວາມ​ເອົາ​ໃຈ​ໃສ່ ແລະ ສຸມ​ທຶນຮອນ​ເຂົ້າ​ໃນ​ ການ​ປັບປຸງ​ກໍ່ສ້າງ​ພື້ນຖານ​ໂຄງ​ລ່າງ​ ທາງ​ດ້ານ​ເສດຖະກິດຫລາຍຂຶ້ນ ​ເປັນຕົ້ນ​ ເສັ້ນທາງ​ຄົມມະນາຄົມ, ​ເຄຫາ​ຜັງ​ເມືອງ, ​ໄຟຟ້າ, ຊົນລະປະທານ ​ແລະ ອື່ນໆ. ການກໍ່ສ້າງ​ເທສະບານ​ແຂວງ​ແຫ່ງ​ໃໝ່ ກໍໄດ້ດຳເນີນດ້ວຍ​ຄວາມ​ພະຍາຍາມ ​ແລະ ສຳ​ເລັດ​ກວ່າ 11%, ​ເອົາ​ໃຈ​ໃສ່​ປັບປຸງ​ແກ້​ໄຂ​ກົນ​ໄກ​ດຶງ​ດູດ​ການ​ລົງທຶນ ​ແລະ ຄຸ້ມ​ຄອງ​ການ​ລົງທຶນ​ ​ໃຫ້​ປະຕິບັດ​ຖືກຕ້ອງ​ຕາມ​ກົດໝາຍ ສອດຄ່ອງ​ກັບ​ສະພາບ​ຈຸດ​ພິ​ເສດ​ຂອງ​ທ້ອງ​ຖິ່ນ ດັ່ງນັ້ນ, ​ເສດຖະກິດ​ຂອງ​ແຂວງ ຈຶ່ງ​​ໄດ້​ສືບຕໍ່ ຂະຫຍາຍຕົວຢ່າງ​ຕໍ່​ເນື່ອງ ສະ​ເລ່ຍ 8,18% ຕໍ່ປີ, ລວມຍອດ​ຜະລິດ​ຕະພັນ​ ພາຍ​ໃນລື່ນ​ຄາດໝາຍ ສະ​ເລ່ຍ 798 ​ໂດ​ລາ​ສະຫະລັດ​ຕໍ່ຄົນ​ຕໍ່ປີ. ການ​ຜະລິດ​​ດ້ານ​ກະສິກຳ-ປ່າ​ໄມ້​ ເປັນ​ສິນຄ້າ ກໍ່ໃຫ້​ເກີດ​ມີ​ຄອບຄົວ​ຕົວ​ແບບ ຫລາຍຂຶ້ນ ເດັ່ນກວ່າໝູ່​ແມ່ນ​ຊາ, ໝາກ​ແໜ່ງ, ກາ​ເຟ, ພືດ​ລະດູ​ແລ້ງ, ການ​ລ້ຽງສັດ​ໃຫຍ່ ແລະ ອື່ນໆ ພ້ອມນີ້ ໄດ້​ມີ​ການ​ເຕົ້າ​ໂຮມ​ເອົາ​ບ້ານ​ນ້ອຍ ໃຫ້​ກາຍ​ເປັນ​ບ້ານ​ໃຫຍ່ ຕິດ​ພັນ​ກັບ​ການຈັດ​ສັນພູ​ມລຳ​ເນົາ ​ແລະ ອາຊີບ​ຄົງ​ທີ່ ​ໂດຍ​ມີ​ການ​ປະສານ​ສົມທົບ​ຢ່າງ​ກົມກຽວ ກັບ​ການຈັດຕັ້ງປະຕິບັດ ບັນດາ​ໂຄງການ​ຂອງ​ລັດຖະບານ ​ເຮັດ​ໃຫ້​ຊີວິດ​ການ​ເປັນ​ຢູ່​ ຂອງ​ປະຊາຊົນ​ບັນດາ​ເຜົ່າ ​ໄດ້​ຮັບ​ການ​ຍົກ​ລະດັບ​ດີ​ຂຶ້ນ​ເປັນ​ກ້າວໆ ​ເຮັດ​ໃຫ້​ອັດຕາ​ຄວາມທຸກ​ຍາກນັບ​ມື້ນັບຫລຸດລົງ.

........................................................................................................................................................

ທີ່​ມາ:​ http://kpl.gov.la/detail.aspx?id=4918