ຮອງນາຍົກລັດຖະມົນຕີ ສຳເລັດການເຂົ້າຮ່ວມ ງານວາງສະແດງສິນຄ້າ ຈີນ-ອາຊຽນ ຢູ່ ສປ ຈີນ

 ທ່ານ ສົມ​ສະຫວາ​ດ ​ເລັ່ງສະຫວັດ ຮອງ​ນາ​ຍົກ ລັດຖະມົນຕີ ​ແຫ່ງ ສປປ ລາວ ​ໄດ້​ສຳ​ເລັດ​ການ​ເຂົ້າ​ຮ່ວມ ງານ​ວາງສະ​ແດງ​ສິນຄ້າ ຈີນ-ອາ​ຊຽນ ​ແລະ ​ກອງ​ປະ​ຊຸມ​ ສຸດ​ຍອດ​ ການ​ຄ້າ-ການ​ລົງ​ທຶນ ຄັ​້ງທີ 12 ຢູ່​ເມືອງ​ນານ​ໜິງ ​ແຂວງ ກວາງຊີ ສປ ຈີນ ທີ່​ໄດ້​ຈັດ​ຂຶ້ນ​​ໃນ ລະຫວ່າງ​ວັນ​ທີ 18-22 ກັນຍາ 2015 ນີ້.

ໃນ​ໂອກາດ ​ເປີດງານ ​ວາງສະ​ແດງ​ສິນຄ້າ ຈີນ-ອາ​ຊຽນ ຄັ້ງ​ທີ 12 ຢ່າງ​ເປັນ​ທາງ​ການ ​ໃນ​ວັນ​ທີ 18 ກັນຍາ 2015 ທ່ານ ສົມ​ສະຫວາ​ດ ​ເລັ່ງສະຫວັດ ​ຂຶ້ນ​ມີ​ຄຳ​ເຫັນ ​ໂດຍ​ເນັ້ນ​ເຖິງ ​ບັນ​ຫາ​ທີ່​ພົ້ນ​ເດັ່ນ ​ໃນ​ກາ​ນຮ່ວມ​ມື ຈີນ-ອາ​ຊຽນ, ​ໂດຍ​ສະ​ເພາະ​ການ​ຂະ​ຫຍາ​ຍຕົວ​ ທາງ​ດ້ານ​ ການ​ຄ້າ-ການ​ລົງທຶນ ​ແລະ ການທ່ອງທ່ຽວ ​ເຊິ່ງປັດຈຸ​ບັນ ສປ ຈີ​ນ ​ເປັນປະ​ເທດ ​ຄູ່​ຄ້າ​ອັນ​ດັບ​ໜຶ່ງ ​ຂອງ​ອາ​ຊຽນ, ສ່ວນກາ​ນຮ່ວມ​ມື​ ສອງ​ຝ່າຍ ລາວ-ຈີນ ​ໃນ​ດ້ານ​ຕ່າງໆ ​ກໍ​ເຫັນ​ວ່າ​ ມີ​ການ​ຂະຫຍາຍ ຕົວຢ່າງ​ບໍ່​ຢຸດ​ຢັ້ງ, ອັນ​ພົ້ນ​ເດັ່ນ​ທີ່​ສຸດ ​​ແມ່ນ​ສອງ​ຝ່າຍ ​ຈະ​ໄດ້​ຮ່ວມ​ກັນ​ ສົ່ງ​ດາວ​ທຽມ​ ດວງ​ທຳ​ອິດ​ ຂອງ​ລາວ ຂຶ້ນ​ສູ່​ວົງ​ໂຄຈອນ ​ແລະ ສ້າງ​ເສັ້ນທາງ​ ລົດ​ໄຟ​ເຊື່​ອມຕໍ່ ຈີ​ນ-ລາວ ​ແລະ ​ໄປ​ສູ່​ບັນດາ​ ປະ​ເທດ​ອາ​ຊຽນ ​ເຊິ່ງທັງ​ສອງ ​​ໂຄງການ ​ດັ່ງກ່າວ ພາຍຫລັງ​ ສຳ​ເລັດ ຈະ​ເປັນ​ການ ຊ່ວຍ​ຫັນ ​ສປປ ລາວ ຈາກ​ປະ​ເທດ ​ທີ່​ບໍ່​ມີ​ຊາຍ​​ແດນ​ ຕິດ​ກັບ​ທະ​​ເລ ກາຍ​ເປັນ​ປະ​ເທດເຊື່ອ​ມ ຈອດ.

 

​ໃນ​ໄລຍະ ​ເຂົ້າ​ຮ່ວມ ​ງານ​ວາງສະ​ແດງ ດັ່ງ​ກ່າວ ​​ ທ່ານ ສົມ​ສະຫວາ​ດ ​ເລັ່ງສະຫວັດ ​ໄດ້​ພົບ​ປະ​ສອງ​ຝ່າ​ຍ ກັບ​ທ່ານ ຈ່າງ​ ກ່າວ​ລີ້ ຮອງ​ນາຍົກ ລັດຖະມົນຕີ ​ແຫ່ງ ສປ ຈີນ, ທ່ານ ຫງວຽນ ຊວນ​ຟຸກ ຮອງ​ນາຍົກ ລັດຖະມົນຕີ ​ແຫ່ງ ສສ ຫວຽດນາມ ​ແລະ ທ່ານ ທະນະ​ສັກ ປຣະຕິ​ມາ​ປະກອນ ຮອງ​ນາຍົກ ລັດຖະມົນຕີ ​ແຫ່ງ ຣາຊະ​ອານາຈັກ​ໄທ ນອກນັ້ນ ຍັງ​ໄດ້​ຕ້ອນຮັບ​ການ​ເຂົ້າ​ຢ້ຽມ ​ຄຳນັບ ​ຂອງ​ທ່ານ ​ເສີນ​ອູ ​ເຈົ້າ​ແຂວງ​ກວາງຊີ ສປ ຈີນ ​ເຊິ່ງ​ໄດ້​ປຶກສາ ​ຫາ​ລືກັນ​ໃນ​ຫລາຍ​ບັນຫາ ​ທີ່​ທັງ​ສອງ​ຝ່າຍ​ ມີ​ຄວາມ​ສົນ​ໃຈ ຮ່ວມ​ກັນ ​ແນ​ໃສ່​ຮັດ​ແໜ​້ນ ການ​ພົວພັນ ​ແລະ ກາ​ນຮ່ວມ​ມື​ ສອງ​ຝ່າ​ຍ​ໃຫ້​ ແໜ້ນ​ແຟ້ນ ຍິ່ງ​ໆຂຶ້ນ. ສຳ​ລັບ​ກາ​ນຮ່ວມ​ມື ​ກັບ​ແຂວງ​ກວາງຊີ ສອງ​ຝ່າ​ຍ​ເຫັນ​ດີ ​ໃຫ້​ມີ​ກົນ​ໄກ ການ​ພົບ​ປະ ​ຮ່ວມ​ມື​ ປະຈຳ​ປີ ​ເພື່ອ​ຊຸກ​ຍູ້ ​ແລະ ​ເສີມ​ຂະຫຍາຍ ​ກາ​ນຮ່ວມ​ມື​ ເພື​່ອການ​ພັດທະນາ ລວມທັງ​ການ ​ຮ່ວມ​ມື​ ດ້ານ​ການ​ຄ້າ-ການ​ລົງທຶນ ​ແລະ ການທ່ອງທ່ຽວ ​ໃຫ້​ກວ້າງ​ຂວາງ​ຍິ່ງ​ຂຶ້ນ. ນອກ​ນັ​້ນ ຍັງ​ໄດ້​ໄປ​ຢ້ຽມຢາມ ​ເຂດ​ເສດຖະກິດ​ ໜານ​ໜິງ ​ແລະ ​ໂຮ​ງຮຽນ 67 ​ເຊິ່ງມີ​ປະຫວັດ ​ຄວາມ​ເປັນ​ມາ ​ອັນ​ຍາວ​ນານ ​ແລະ ຕິດ​ພັນ​ກັບ​ ປະຫວັດສາດ ​ກາ​ນພົວພັນ ຮ່ວມ​ມື​ ລະຫວ່າງ ລາ​ວ-ຈີນ.   ທີ່ມາ http://kpl.gov.la/