ຮອງນາຍົກລັດຖະມົນຕີ ລົງຕິດຕາມຄວາມຄືບໜ້າ ໂຄງການຊົນລະປະທານ ຫ້ວຍພະແລງ

ເພື່ອ​ເປັນ​ການ​ ກະຕຸກ​ຊຸກຍູ້ ​ແລະ ຕິດຕາມ​ ການຈັດຕັ້ງ ປະຕິບັດ​ ໂຄງການ​ຄ້ຳປະກັນ ​ສະບຽງອາຫານ ​ແລະ ຜະລິດ​ເປັນ​ສິນຄ້າ ໃຫ້​ໄດ້​ຮັບ ທັງ​ປະສິດ ທິພາບ ​ແລະ ປະສິດທິ​ຜົນ. ດັ່ງນັ້ນ, ​ໃນ​​ວັນ​ທີ 12 ກັນຍາ 2015  ນີ້ ທ່ານ ສົມ​ສະຫວາດ ​ເລັ່ງສະຫວັດ ຮອງ​ນາຍົກ ລັດຖະມົນຕີ ຜູ້​ຊີ້ນຳ​ວຽກງານ​ ເສດຖະກິດ​ ການ​ຜະລິດ ​ແລະ ຈໍລະ​ຈອນ ພ້ອມ​ດ້ວຍ​ ຄະນະ ​ໄດ້​ເດີນທາງ​ໄປ​ເຄື່ອນ​ໄຫວ ຢ້ຽມຢາມ ​ແລະ ​ເຮັດ​ວຽກ ທີ່​ແຂວງ​ ສະຫວັນ​ນະ​ເຂດ ​ເຊິ່ງມີ​ ທ່ານ ດຣ. ສຸພັນ​ ແກ້ວ​ມີ​ໄຊ​ ເຈົ້າ​ແຂວງໆ ສະ​ຫວັນນະ​ເຂດ, ກາ​ນນຳ​ແຂວງ ​ແລະ ອຳນາດ​ ການ​ປົກຄອງ ທ້ອງ​ຖິ່ນ ​​ໃຫ້ການ​ຕ້ອນຮັບ.

ໃນ​​ໂອກາດ​ດັ່ງກ່າວ ທ່ານ ​ຮອງ​ນາຍົກ ລັດຖະມົນຕີ ​ແລະ ຄະນະ ໄດ້​ໄປ​ຕິດ​ຕາມ ​ຄວາມ​ຄືບໜ້າ ຂອງ​ໂຄງການ​ ຊົນລະປະທານຫ້ວຍ​ພະ​ແລງ ​ເມືອງ​ຈຳ​ພອນ ​ແຂວງ​ສະຫວັນ​ນະ​ເຂດ ​ເຊິ່ງ​​ເປັນ​ ຊົນລະປະທານ​ ແບບ​ນ້ຳ​ໄຫລ ເຂົ້າ​ເອງ ໄດ້​ເລີ່​ມລົງມື ກໍສ້າງ​ມາ​ແຕ່​ເດືອນ​ພະຈິກ 2012 ປະກອບ​ດ້ວຍ​ ເນື້ອທີ່​ອ່າງ​ໂຕ່ງ 45 ກິ​ໂລ​ຕາ​ແມັດ, ​ເນື້ອທີ່​ ອ່າງ​ເກັບ​ນ້ຳ ກວ່າ 18 ພັນ​ເຮັກຕາ, ລະບົບ ​ຄອງ​ເໝືອງ​ແມ່ ມີ​ຄວາມ​ຍາວກວ່າ 16 ກິ​ໂລ​ແມັດ ​ແລະ ອີກ 62 ກວ່າ​ກິ​ໂລ​ແມັດ​ ເປັນ​ຄອງ​ເໝືອງ ຂັ້ນ 2, ຂັ້ນ 3 ​ແລະ ຄອງ​ລະບາຍ​ນ້ຳ. ສາມາດ​ ຕອບ​ສະໜອງນ້ຳ​ ໃຫ້​ແກ່​ນາປີ 2 ພັນ​ເຮັກຕາ, ນາ​ແຊງ 1 ພັນ​ເຮັກຕາ ​ແລະ ປູກ​ພືດ​ລະດູ​ແລ້ງ 1 ພັນ​ເຮັກຕາ ກວມ 7 ບ້ານ ຄິດ​ເປັນ​ມູນ​ຄ່າ ​ກໍ່ສ້າງ​ກວ່າ 200 ຕື້ກີບ. ປັດຈຸບັນ, ສໍາເລັດ​ແລ້ວກວ່າ 30 ສ່ວນ​ຮ້ອຍ. ​ໂອກາດ​ນີ້, ທ່ານ​ ສົມ​ສະຫວາດ ​ເລັ່ງສະຫວັດ ໄດ້​ຊີ້ນຳ​ ໃຫ້​ຄະນະ​ ຮັບຜິດຊອບ ຕ້ອງ​ໄດ້​ເບິ່ງ​ຄືນ ​ໃນ​ການ​ນຳ​ໃຊ້​ນ້ຳ​ ໃຫ້​ເກີດ​ປະ​ໂຫຍ​ດ ສູງ​ສຸດ, ​ໂດຍ​ສະ​ເພາະ ນ້ຳຈາກ​ ຊົນລະປະທານ ທີ່​ມີ​ຄວາມ ​ອາດສາມາດ ຕອບ​ສະໜອງ​ ໄດ້ຫລາຍກວ່າ 29 ລ້ານ​ແມັດ​ກ້ອນ ​ແຕ່​ນຳ​ໃຊ້​ ຕົວ​ຈິງ​ພຽງ 20 ລ້ານ​ແມັດ​ກ້ອນ ​ເຊິ່ງ​ອາດ​ຈະ​ມີ​ການ ​ບຸກ​ເບີກ​ເນື້ອທີ່ ​ທຳ​ການ​ຜະລິດ ​ຕື່ມ​ອີກ.

ນອກຈາກ​ນີ້, ທ່ານ​ ຮອງ​ນາຍົກ ລັດຖະມົນຕີ ຍັງ​ໄດ້​​ເດີນທາງໄປ​ຢ້ຽມຢາມ ​ແລະ ຕິດຕາມ​ ການ​ສຶກສາ​ສຳຫລວດຄວາມ​ເປັນ​ໄປ​ໄດ້​ ຂອງ​ການກໍ່ສ້າງ​ຊົນລະປະທານ ຫ້ວຍ​ສົມ​ປ່ອຍ ທີ່​ບ້ານ​ສົມ​ສະອາດ ເມືອງ​ໄກສອນ ພົມວິຫານ ​ເຊິ່ງເປັນ​ອີກ​ໂຄງການໜຶ່ງທີ່​ເປັນ​ ຊົນລະ​ປະທານ​ແບບ​ນ້ຳ​ໄຫລເຂົ້າ​ເອງ​ ເຊັ່ນ​ກັນ ສາມາດ​ຕອບ​ສະໜອງນ້ຳ​ ໃຫ້​ແກ່​ການ​ຜະລິດ​ໄດ້​ປະມານ 2-3 ພັນ​ເຮັກຕາ. ພ້ອມ​ນີ້, ທ່ານຮອງ​ນາຍົກ ລັດຖະມົນຕີ ຍັງ​ໄດ້ຊີ້ນຳ​ ໃຫ້​ຜູ້​ສຶກສາຄົ້ນຄວ້າ​ເບິ່ງ​ຄືນ​ກ່ຽວກັບ​ ການ​ສຶກສາຜົນ​ກະທົບ​ດ້ານ​ສິ່ງ​ແວດ​ລ້ອມ ​ແລະ ສັງຄົມ, ຄວາມ​ອາດ​ສາມາດ​ ໃນ​ການ​ບຸກ​ເບີກເນື້ອທີ່​ທຳ​ການ​ຜະລິດ ​ເພື່ອ​ຮອງ​ຮັບ​ ການສະໜອງນ້ຳ ຂອງ​ຊົນລະປະທານ ​ແລະ ການກະກຽມ ລະອຽດດ້ານ​ຕ່າງໆ ​ເພື່ອ​ເຮັດ​ໃຫ້ ການ​ຈັດຕັ້ງປະຕິບັດ​ໂຄງການ ​ໄດ້​ຮັບຜົນ​ປະ​ໂຫຍ​ດສູງ​ສຸດ.

ທີ່ມາ http://kpl.gov.la