ຮອງນາຍົກລັດຖະມົນຕີ ຕ້ອນຮັບຄະນະຜູ້ແທນຢາເສບ ຕິດໄທ

ໃນ​ວັນ​ທີ 16 ກັນຍາ 2015 ນີ້ ທ່ານ​ ອາຊາ​ງ ລາວ​ລີ ຮອງ​ນາຍົກລັດຖະມົນຕີ ຜູ້​ຊີ້​ນຳ​ວຽກງານ​ການ​ປົກຄອງ ​ໄດ້​ໃຫ້ກຽດຕ້ອນຮັບ​ການ​ເຂົ້າ​ຢ້ຽມຄຳນັບ​ຂອງ​ທ່ານ ພົນ​ເອກ ​ໄພບູນ ຄຸ້ມ​ສາຍາ ລັດຖະມົນຕີ​ວ່າ ການ​ກະຊວງ​ຍຸຕິ​ທຳ ​ແຫ່ງຣາຊະ​ອານາຈັກ​ໄທ ​ແລະ ຄະນະ, ​ໃນ​ໂອກາດ​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກຢູ່ ສປປ ລາວ ​ແຕ່​ວັນ​ທີ 16-17 ກັນຍາ 2015.

ທ່ານ
ຮອງ​ນາຍົກລັດຖະມົນຕີ ອາຊາ​ງ ລາວ​ລີ ໄດ້​ກ່າວ​ສະ​ແດງຄວາມ​ຍິນ​ດີ​ຕ້ອນຮັບ ​ແລະ ຊົມ​ເຊີຍຕໍ່ຄະນະ​ຜູ້​ແທນ ກະຊວງ​ຍຸຕິ​ທຳ​ຂອງ​ໄທ ກໍ​ຄື ທ່ານ ພົນ​ເອກ ​ໄພບູນ ຄຸ້ມ​ສາຍາ ທີ່​ໄດ້​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກຢູ່ ສປປ ລາວ ​ເຊິ່ງ​ເປັນ​ຂີດໝາຍອັນ​ສຳຄັນ ​ໃນ​ການ​ເພີ່ມ​ທະວີ​ການ​ຮ່ວມ​ມື ລະຫວ່າງ ​ລັດຖະບານລາວ-​ໄທ ກໍ​ຄື ​ສອງອົງການ​ຄວບ​ຄຸມ​ຢາ​ເສບ​ຕິດຂອງ​ທັງ​ສອງ​ປະ​ເທດ ​ໃຫ້​ມີ​ຄວາມ​ສະໜິດ​ແໜ້ນ ​ແລະ ມີ​ປະສິດທິ​ຜົນ​ສູງ​ກວ່າ​ເກົ່າ.

ໃນ​ວັນ​ດຽວກັນ ​ໄດ້​ມີ​ພິທີການ​ພົບ​ປະ​ຫາລືສອງ​ຝ່າຍ
 ລະຫວ່າງ ​ທ່ານ ກຸ ຈັນ​ສີນາ ປະທານ​ຄະນະ​ກຳມະການ​ແຫ່ງ​ຊາດ ​ເພື່ອ​ກວດກາ ​ແລະ ຄວບ​ຄຸມ​ຢາ​ເສບ​ຕິດ ​ແຫ່ງ ສປປ ລາວ ​ແລະ ທ່ານ ພົນ​ເອກ ​ໄພບູນ ຄຸ້ມ​ສາຍາ, ​ພ້ອມຄະນະ ທີ່​ນະຄອນຫລວງ​ວຽງຈັນ. ​ເພື່ອ​​ທົບ​ທວນ​ການ​ຮ່ວມ​ມື ​ໃນ​ໄລຍະ​ຜ່ານ​ມາ ​ແລະ ​ເສີມຂະຫຍາຍ​ການ​ພົວພັນ​ຮ່ວມ​ມື​ ໃນ​ການ​ຕ້ານ ​ແລະ ຄວບ​ຄຸມ​ຢາ​ເສບ​ຕິດ ​ໂດຍ​ສະ​ເພາະ​ ຢູ່​ໃນ​ບໍລິ​ເວນ​ຊາຍ​ແດນ​ສອງ​ປະ​ເທດ​ໃຫ້​ນັບ​ມື້​ດີ​ຂຶ້ນ.

ພ້ອມ​ນັ້ນ ສອງ​ຝ່າຍຍັງ​ໄດ້​ຫາລືການ​ຮ່ວມ​ມື​ແລກປ່ຽນ ດ້ານ​ຂໍ້​ມູນ​ຂ່າວສານຂອງ​ກຸ່ມ​ຄົນ​ບໍ່ດີ​ທີ່​ລັກລອບ​ຄ້າຂາຍ​ຢາ​ເສບ​ຕິດ ຕາມ​ບໍລິ​ເວນ​ຊາຍ​ແດນ​ຂອງ​ສອງ​ປະ​ເທດ, ການ​ສະກັດ​ກັ້ນ​ຢາ​ເສບ​ຕິດ​ຈາກ​ປະ​ເທດໜຶ່ງ ທີ່​ຖືກ​ນຳ​ໃຊ້​ເປັນ​ທາງ​ຜ່ານ​ໄປ​ສູ່​ປະ​ເທດ​ອື່ນ, ການ​ຮ່ວມ​ມື​ໃນ​ການ​ປິ່ນປົວ-ຟື້ນຟູ​ສຸຂະພາບຂອງ​ຜູ້​ເສບ​ຢາ​ເສບ​ຕິດ,  ລວມ​ທັງ​ການ​ຊ່ວຍ​ເຫລືອ​ດ້ານ​ວິຊາ​ການ ​ໃນ​ການ​ປູກ​ພືດ​ເປັນ​ສິນຄ້າ​ເພື່ອ​ທົດ​ແທນ​ການ​ປູກ​ຝິ່ນ ​ແລະ ການ​ຊ່ວຍ​ເຫລືອ​ດ້ານອຸປະກອນ​ເພື່ອ​ຮັບ​ໃຊ້​ວຽກງານ​ຄວບ​ຄຸມ​ຢາ​ເສບ​ຕິດ

ທີ່ມາ http://kpl.gov.la