ອ້າຍຢືນຢັນ ຮິກວາອິນ ມີຄວາມສຸກກັບ ນາໂປລີ

 

ຢືນຢັນ ກອນຊາໂລ ຮິກວາອິນ ກອງໜ້າຂອງ ນາໂປລີ ມີຄວາມສຸກກັບກັບຫຼິ້ນໃນຖິ່ນ ເປົາໂລ ພ້ອມເຊື່ອວ່າ “ອັດຊູລາ” ຈະໄດ້ແຊມ ກັນໂຊ ອີກດ້ວຍ.

 

ນິໂກລັສ ຮິກວາອິນ ນາຍໜ້າ ແລະ ອ້າຍຂອງ ກອນຊາໂລ ຮິກວາອິນ ດາວຍິງໂຕເກັ່ງຂອງ ນາໂປລີ ສະໂມສອນດັງໃນ ກັນໂຊ ຊີຣີ ອາ ອອກມາເປີດເຜີຍວ່ານັກເຕະມີຄວາມສຸກກັບຕົ້ນສັງກັດ ແລະ ໝັ້ນໃຈວ່າ “ອັດຊູລາ” ຈະໄດ້ແຊມລີກອີຕາລີໃນລະດູການນີ້.
 

ນາຍໜ້າຂອງກອງໜ້າທີມຊາດອາເຈັນຕິນາກ່າວວ່າ “ທຸກຄົນຮູ້ວ່າແຟນບານຂອງ ນາໂປລີ ຢູ່ໃກ້ຊິດທີມຕະຫຼອດ ກອນຊາໂລ ຫຼິ້ນໃນເອີຣົບມາ 10 ປີ ແລະ ຍິງປະຕູທີ່ດີມາຕະຫຼອດ ເຂົາເຫັນຕົ້ນຕໍຂອງຄວາມສຸກ ແລະ ເຂົາຮູ້ສຶກມີຄວາມສຸກກັບທີ່ນີ້ແທ້ໆ ເຈົ້າພຽງຕ້ອງການເຫັນສິ່ງທີ່ເກີດຂຶ້ນເມື່ອມີສຽງໝາກຫວີດດັງຂຶ້ນ ເຊິ່ງມັນວິເສດຫຼາຍທີ່ໄດ້ຮັບຄວາມຮັກຈາກແຟນບານໃນແນວທາງທີ່ເຂົາຢູ່່ທີ່ນີ້ ເມົາຣິຊິໂອ ຊາຣີ ເຮັດວຽກໄດ້ດີກັບ ກອນຊາໂລ ໂດຍສະເພາະເລື່ອງຈິດວິທະຍາ ເມົາຣິຊິໂອ ໄດ້ໃຈຜູ້ຄົນ ແລະ ຂ້ອຍຂອບໃຈເຂົາໃນເລື່ອງນັ້ນ”.

 

“ມັນບໍ່ແມ່ນແຕ່ກັບ ຮິກວາອິນ ແຕ່ກັບ ຈໍຈິນໂຢ ແລະ ຄາລິດູ ກູລິບາລີ ນຳ ຂ້ອຍຫວັງວ່າ ກອນຊາໂລ ຈະຢູ່ໃນແນວທາງນີ້ຕໍ່ໄປ ຍິງປະຕູໃຫ້ ອາເຈັນຕິນາ ແລະ  ມີຟອມການຫຼິ້ນທີ່ດີທີ່ສຸດເທົ່າທີ່ຈະເປັນໄດ້ກັບ ນາໂປລີ ພວກເຂົາຈະໄດ້ ສະກູເດັດໂຕ ຫຼື ບໍ່? ແນ່ນອນ ເຮົາໄດ້ຮັບຄວາມຊ່ວຍເຫຼືອຈາກພະເຈົ້າ ດັ່ງນັ້ນ ດ້ວຍຄວາມຊ່ວຍເຫຼືອຈາກເພິ່ນຈະເຮັດໃຫ້ເຮົາໄດ້ ສະກູເດັດໂຕ” ນິໂກລັສ ກ່າວ.

 

ທັງນີ້ ຮິກວາອິນ ຍ້າຍຈາກ ເຣອັນ ມາດຣິດ ມາຫຼິ້ນໃຫ້ກັບ ນາໂປລີ ເມື່ອປີ 2013 ແລະ ກາຍເປັນກຳລັງສຳຄັນຂອງ ນາໂປລີ ນັບຕັ້ງແຕ່ນັ້ນມາ.