ອົດຍ້າຍ!!ບາຊາລົ້ມແຜນຄູຕີ້ຮັບກຳຢູ່ຫົງຕໍ່

 

ບາເຊໂລນາ ຕົກເປັນຂ່າວວ່າລົ້ມແຜນດຶງ ເຟລິບເປ້ ຄູຕິນໂຢ ມິດຟິວຕົວເກ່ັງຂອງ ລິເວີພູ ແລ້ວຫຼັງຖືກ “ຫົງແດງ” ບອກປັດຂໍ້ສະເໜີມາ 3 ຄັ້ງຕິດຕໍ່ກັນ ແລະ ຫຼ້າສຸດທີມດັງຈາກແອນຟິວບໍ່ຄິດທີ່ຈະເຈລະຈາກັບ “ບາຊາ” ໃນເລື່ອງນີ້ອີກຕໍ່ໄປ.

ບາຊາ ພະຍາຍາມຢ່າງໜັກທີ່ຈະດຶງ ຄູຕິນໂຢ ມາເສີມທັບໃນຊ່ວງຊຳເມີນີ້ແຕ່ວ່າ ລິເວີພູ ກໍຍັງແຂງມາຕະຫຼອດວ່າຈະບໍ່ຂາຍສະຕາທີມຊາດເບຣຊິນຢ່າງແນ່ນອນໂດຍ “ຫົງແດງ” ໄດ້ປະຕິເສດຂໍ້ສະເໜີທີ່ ບາຊາ ຍື່ນຊື້ເຖິງ 3 ເທື່ອໃນລາຄາ 72, 90 ແລະ 118 ລ້ານປອນຕາມລຳດັບ.

ຫຼ້າສຸດມີຂ່າວວ່າ ບາຊາ ພະຍາຍາມທີ່ຈະຫາທາງຕົກລົງກັບ ລິເວີພູ ດ້ວຍການຍື່ນຂໍ້ສະເໜີໃໝ່ຫຼ້າສຸດ ແຕ່ກໍບໍ່ໄດ້ຮັບຄຳຕອບຈາກ ໄມເຄິນ ເອັດເວິດ ຜູ່ອຳນວຍການກິລາ “ຫົງແດງ” ແຕ່ຢ່າງໃດ.

ລາຍງານລະບຸວ່າທີມດັງຈາກແຄວ້ນກາຕາລັນຍອມຮັບໃນສິ່ງທີ່ ລິເວີພູ ບອກພວກເຂົາມາຕະຫຼອດທັງຊຳເມີນີ້ແລ້ວວ່າ ຄູຕິນໂຢ ຈະບໍ່ຍ້າຍໄປໃສແຕ່ ເຈີເກັນ ຄັອບ ຜູ່ຈັດການທີມ “ຫົງແດງ” ອາດຈະຕ້ອງໃຊ້ເວລາໃນການປະສານຮອຍແຕກໃນທີມ.