ອົງການນານາລັດອາເມລິກັນເຕືອນເວເນຊູເອລາສ່ຽງເກີດນອງເລືອດ

 

ເລຂາທິການອົງການນາໆລັດອາເມລິກາເຕື່ອນວ່າວິກິດການໃນເວເນຊູເອລາໃກ້ບານປາຍເປັນເຫດນອງເລືອດ ຫຼັງຝ່າຍຕໍ່ຕ້ານເພີ່ມແຮງກົດດັນໂດຍການປະທ້ວງຄັ້ງໃໝ່ ໃນຂະນະທີ່ລັດຖະບານກໍຍັງຢືນຢັນຈັດການເລືອກຕັ້ງສະພາຮ່າງລັດຖະທຳມະນູນຕາມກຳນົດ.

ສຳນັກຂ່າວຕ່າງປະເທດລາຍງານຈາກນະຄອນກາຣາກັສປະເທດເວເນຊູເອລາເມື່ອວັນທີ 20 ກໍລະກົດວ່າ ຊາວເວເນຊູເອລາຫຼາຍລ້ານຄົນເຂົ້າຮ່ວມການປະທ້ວງທົ່ວປະເທດເປັນເວລາ 24 ຊົ່ວໂມງເມື່ອວັນພະຫັດເພື່ອຫວັງເພີ່ມແຮງກົດດັນໃຫ້ປະທານາທິບໍດີ ນິໂຄລັສ ມາດູໂຣ ຍຸຕິການຈັດການເລືອກຕັ້ງສະພາປະຊາຊົນເພື່ມຮ່າງລັດຖະທຳມະນູນສະບັບໃໝ່ໃນວັນທີ 30 ກໍລະກົດນີ້ ແລະ ລາອອກຈາກຕໍາແໜ່ງຈາກຄວາມລົ້ມເຫຼວໃນການແກ້ໄຂວິກິດເສດຖະກິດ ແລະ ການຟື້ນຟູຄວາມປອງດອງພາຍໃນປະເທດໂດຍມີລາຍງານຜູ່ປະທ້ວງເສຍຊີວິດອີກຢ່າງໜ້ອຍ 2 ຄົນໃນກາຣາກຸສ ແລະ ເມືອງວາເລັນເຊຍເພີ່ມຈຳນວນຜູ່ເສຍຊີວິດຈາກເຫດຊຸມນຸມທີ່ຍືດເຍື້ອຕັ້ງແຕ່ເດືອນເມສາເປັນຢ່າງໜ້ອຍ 99 ຄົນແລ້ວ.

ຢ່າງໃດກໍຕາມປະຊາຊົນທີ່ມີຈຸດຢືນສະໜັບສະໜູນລັດຖະບານ ມາດູໂຣ ຍັງຄົງໄປເຮັດວຽກກັນຕາມປົກກະຕິ ດ້ານຜູ່ນຳເວເນຊູເອລາເຕືອນຜູ່ປະກອບການທີ່ຢຸດໃຫ້ບໍລິການ ຫຼື ອະນຸຍາດໃຫ້ພະນັກງານເຂົ້າຮ່ວມການປະທ້ວງຕາມຄວາມຕ້ອງການຂອງຝ່າຍຄ້ານຈະຕ້ອງພົບກັບ “ມາດຕະການຕອບໂຕ້” ຈາກພາກລັດ ແລະ ເຊື່ອວ່າການໃຫ້ບໍລິການທັງໃນສ່ວນຂອງພາກລັດ ແລະ ເອກະຊົນ “ສ່ວນໃຫຍ່” ຈະບໍ່ໄດ້ຮັບຜົນກະທົບຈາກການປະທ້ວງທີ່ເກີດຂຶ້ນ.

ຂະນະທີ່ທ່ານ ຫຼຸຍ ອາວມາໂກຣ ເລຂາທິການອົງການນາໆລັດອາເມິກັນ (ໂອເອເອສ) ກ່າວວ່າ ວິກິດການເມືອງ ແລະ ເສດຖະກິດໃນເວເນຊູເອລາທີ່ຍັງບໍ່ມີແນວໂນ້ມວ່າຈະຢຸດອາດຈະບານປາຍກາຍເປັນ “ການນອງເລືອດ” ແລະ ປະນາມ ມາດູໂຣ ເປັນຜູ່ນຳທີ່ “ມືເປື້ອນເລືອດ” ໃນເວລາດຽວກັນທ່ານ ຣາຟາເອັງ ຣາມິເຣດ ເອກອັກຄະລາຊະທູດເວເນຊູເອລາປະຈຳສະຫະປະຊາຊາດ (ຢູເອັນ) ສັ່ງປົດ ໄອເຊສ ເມດິນາ ອອກຈາກຕໍາແໜ່ງເອກອັກຄະລາຊະທູດທີ່ປຶກສາຫຼັງຈາກ ເມດິນາ ອອກມາຮຽກຮ້ອງໃຫ້ ມາດູໂຣ ລາອອກຈາກຕຳແໜ່ງປະທານາທິບໍດີທັນທີ ແລະ ກ່າວວ່າບໍ່ສາມາດປະຕິບັດໜ້າທີ່ໃຫ້ກັບລັດຖະບານທີ່ທຳຮ້າຍປະຊາຊົນ ແລະ ລະເມີດສິດທິມະນຸດໄດ້ອີກຕໍ່ໄປເຊິ່ງ ຣາມິເຣດ ວິຈານວ່າເປັນການສະແດງຈຸດຢືນທີ່ “ບໍ່ຊື່ສັດ”.