ອຸດົມໄຊ ສະຫຼຸບຄວາມຄືບໜ້າໂຄງການລົດໄຟລາວ-ຈີນ

ກອງປະຊຸມສະຫຼຸບຄວາມຄືບໜ້າການຈັດຕັ້ງປະຕິບັດວຽກງານໂຄງການກໍ່ສ້າງເສັ້ນທາງລົດໄຟ ລາວ ຈີນ ຊ່ວງແຂວງອຸດົມໄຊ ປະຈຳເດືອນມິຖຸນາ 2017 ຈັດຂຶ້ນໃນວັນທີ 5 ກໍລະກົດ 2017 ຜ່ານມາທີ່ ຫ້ອງປະຊຸມພະແນກ ຍທຂ ແຂວງ.

ໂດຍການເປັນປະທານຂອງທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງ ຍທຂ,ຫົວໜ້າຄະນະຄຸ້ມຄອງການກໍ່ສ້າງທາງລົດໄຟລາວ-ຈີນຂັ້ນສູນກາງ, ມີບັນດາຄະນະປະຈໍາພັກແຂວງ, ກຳມະ ການພັກແຂວງ, ສອງກອງບັນຊາການ ປກຊ-ປກສ, ເຈົ້າເມືອງຕະຫຼອດຮອດບັນດາພະແນກການທີ່ກ່ຽວຂ້ອງທີ່ນອນຢູ່ໃນຄະນະກໍາມະການຄຸ້ມຄອງການກໍ່ ສ້າງທາງລົດໄຟຂັ້ນແຂວງ ແລະເມືອງເຂົ້າຮ່ວມຢ່າງພ້ອມພຽງ.

ໃນກອງປະຊຸມບັນດາຜູ້ເຂົ້າຮ່ວມ ໄດ້ຮັບຟັງການສະຫຼຸບລາຍງານຜົນຂອງການເຄື່ອນໄຫວຈັດຕັ້ງປະຕິບັດວຽກງານຂອງແຕ່ລະພາກສ່ວນໃນໄລຍະເດືອນມິຖຸນາ 2017 ຜ່ານມາ ໂດຍສະເພາະແມ່ນຄວາມຄືບໜ້າຂອງການກໍ່ ສ້າງເສັ້ນທາງລົດໄຟລາວ-ຈີນ ຊ່ວງແຂວງອຸດົມໄຊ ທີ່ມີຄວາມຍາວ 126,6 ກິໂລແມັດ ໃນນັ້ນ ປະກອບມີຂົວ 57 ແຫ່ງ, ອຸໂມງ 34 ຈຸດ ແລະສະຖານີ 9 ແຫ່ງ ເຊິ່ງມາຮອດປັດຈຸບັນ ເຫັນວ່າວຽກງານແຕ່ລະດ້ານແມ່ນພວມເລັ່ງຈັດຕັ້ງປະຕິບັດ ແລະບາງໜ້າວຽກແມ່ນໄດ້ສຳເລັດ ໃນເບື້ອງຕົ້ນແລ້ວ ແລະພວມສືບຕໍ່ຈັດຕັ້ງປະຕິບັດໃນຂັ້ນຕອນຕໍ່ໄປ.

ໃນນັ້ນ ປະກອບມີການແຕ່ງ ຕັ້ງຄະນະຮັບຜິດຊອບ, ການປະສານສົມທົບກັບພາກສ່ວນທີ່ກ່ຽວຂ້ອງ, ການປັກຫຼັກໝາຍ, ວຽກງານຜົນກະທົບສິ່ງແວດ ລ້ອມ-ສັງຄົມ ການເວນຄືນໃຫ້ແກ່ປະຊາຊົນທີ່ໄດ້ຮັບຜົນກະທົບ, ວຽກງານການກວດກູ້ລະເບີດ ກໍໄດ້ມີການສຳຫຼວດ ແລະແບ່ງອອກເປັນ 3 ຈຸດໃຫຍ່ ລວມທັງວຽກງານການກໍ່ສ້າງ ແລະຂຸດເຈາະອຸໂມງຂອງບໍລິສັດຜູ້ຮັບເໝົາການກໍ່ສ້າງຂອງຈີນໃນແຕ່ລະຊ່ວງ ກໍໄດ້ຂຸ້ນຂ້ຽວກໍ່ສ້າງເພື່ອເຮັດໃຫ້ສໍາເລັດທັນຕາມທິດທາງແຜນການ ແລະເວລາທີ່ກຳນົດໄວ້.

ນອກຈາກວຽກງານທີ່ຄະນະຮັບຜິດ ຊອບແຕ່ລະຂັ້ນເຄື່ອນໄຫວຈັດຕັ້ງໄປ ຕາມທິດທາງແລ້ວ ກໍຍັງມີບາງວຽກທີ່ເຫັນວ່າຍັງສັບສົນ ແລະບໍ່ສາມາດເຄື່ອນ ໄຫວໄດ້ຕາມເປົ້າໝາຍ ແລະພາລະບົດບາດເປັນຕົ້ນແມ່ນວຽກງານການຄຸ້ມຄອງແຮງງານຕ່າງປະເທດ, ການສະໜອງສະບຽງອາຫານ, ການລົງປະຈຳການຂອງເຈົ້າ ໜ້າທີ່ ປກສ ແລະອື່ນໆ ເພື່ອຊອກຫາແນວທາງແກ້ໄຂບັນຫາດັ່ງກ່າວ ແລະເຮັດໃຫ້ວຽກງານໂຄງການກໍ່ສ້າງເສັ້ນທາງລົດໄຟລາວ-ຈິນ ຊ່ວງແຂວງອຸດົມໄຊດຳເນີນໄປຢ່າງເປັນລະບົບຕໍ່ເນື່ອງໃນຕໍ່ໜ້າ.

ຂໍ້ມູນຈາກ: ເສດຖະກິດ-ສັງຄົມ