ອີບາ ຮັບຄິດຮອດ ເຮຍມູ ກອ່ນເກມຟັດກັບ ເຊວຊີ

 

ສະລາຕັນ ອີບາຮິໂມວິດ ຫົວຫອກຂອງ ປາຣີ ແຊັງ-ແຊັກແມັງ ເປີດໃຈຄິດຮອດ ໂຊເຊ ມູຣິນໂຢ ກຸນຊືໜ້າຄຽດ ກ່ອນເກມແຊມປຽນລີກຮອບ 16 ທີມນັດທຳອິດພົບກັບ ເຊວຊີ ອັງຄານນີ້ ໝັ້ນໃຈວ່າອີກບໍ່ດົນ “ເດິ ສະເປຊຽວ ວັນ” ຈະກັບມາວົງການລູກໜັງໄວໆນີ້.

 

ສະລາຕັນ ອີບາຮີໂມວິດ ກອງໜ້າຂອງ ເປເອັດເຊ ສະໂມສອນດັງຈາກ ລີກ ແອັງ ຝຣັ່ງອອກມາເຜີຍວ່າຮູ້ສຶກແປກໆ ແລະ ຄົງຄິດຮອດ ໂຊເຊ ມູຣິນໂຢ ຜູ້ຈັດການທີມຄົນເກັ່ງບໍ່ໜ້ອຍເມື່ອຕົ້ນສັງກັດເປີດ ປາກ ເດິ ແພຣັງ ຮັບການມາຢາມຂອງ ເຊວຊີ ສະໂມສອນຍັກໃຫຍ່ຈາກ ພຣີເມຍລີກ ອັງກິດ ໃນເກມ ຢູຟາ ແຊມປຽນລີກຮອບ 16 ທີມສຸດທ້າຍນັດທຳອິດວັນອັງຄານທີ 16 ກຸມພານີ້ ແຕ່ພັດບໍ່ມີນາຍໃຫຍ່ຄົນດັງນຳທັບມານຳ.

 

ທັງສອງສະໂມສອນຕ່າງຖືກຈັບສະຫຼາກມາພົບກັນໃນຮອບຕັດເຊືອກຕະຫຼອດສອງລະດູການຫຼັງສຸດ ໂດຍທັງສອງເທື່ອມີ “ເດ ສະເປຊຽວ ວັນ” ເປັນຄົນຄຸມ ເຊວຊີ ແຕ່ໃນລະດູການນີ້ ກຸສ ຮິດດິງ ນາຍໃຫຍ່ທີ່ເຂົ້າມາເຮັດວຽກແທນ ມູຣິນໂຢ ທີ່ຖືກໄລ່ອອກໄປຕັ້ງແຕ່ເດືອນທັນວາທີ່ຜ່ານມາຈະເປັນຄົນນຳທັບ ເຊວຊີ ມາຟັດກັບ “ເປເອັດເຊ”.

 

ດາວຍິງທີມຊາດສະວີເດັນເຊິ່ງເຄີຍເຮັດວຽກຮ່ວມກັບ ມູຣິນໂຢ ສະໄໝຢູ່ ອິນເຕີ ມິລານ ນຳກັນລະຫວ່າງປີ 2008-2009 ກ່າວວ່າ “ຂ້ອຍຄິດວ່າທຸກຄົນຕ້ອງຄິດຮອດ ມູຣິນໂຢ ແຕ່ຂ້ອຍກໍຍັງເຊື່ອວ່າເຂົາຈະກັບມາສູ່ວົງການລູກໜັງໃນໄວໆນີ້ຖ້າເຈົ້າອົດທົນອີກຈັກໜ້ອຍກໍຈະໄດ້ເຫັນເຂົາຄຸມທີມອື່ນ”.

 

“ຂ້ອຍແປກໃຈທີ່ເຫັນເຂົາຖືກໄລ່ອອກບໍ່? ບໍ່ຮູ້ຄືກັນເພາະທຸກຢ່າງມັນຂຶ້ນຢູ່ກັບຜົນການແຂ່ງຂັນ ແລະ ນັ້ນເປັນສ່ວນທີ່ບໍ່ດີທີ່ສຸດໃນວົງການບານເຕະ ເມື່ອເຈົ້າເຮັດຜົນງານບໍ່ດີກໍຕ້ອງຖືກລົງໂທດ ແລະ ນັ້ນແມ່ນສິ່ງທີ່ນາຍໃຫຍ່ຕ້ອງຮັບຜິດຊອບຫຼາຍກວ່າໃຜ ນັກເຕະຄືເຮົາບໍ່ໄດ້ຖືກຍື່ນຊອງຂາວຄືກັບນາຍນັ້ນເອງ” ອີບາ ລະບຸ.