ອິວຄາຍບໍ່ປິດໂອກາດກັບເສືອເຫຼືອງ

 

ອິວຄາຍ ກຸນໂດກັນ ກອງກາງມາດເຂັ້ມຂອງ ແມນເຊສເຕີ ຊີຕີ ລະບຸຊັດເຈນວ່າບໍ່ປິດໂອກາດກັບໄປຢູ່ ດອດມຸນ ໃນອະນາຄົດແຕ່ຢຳ້ຕອນນີ້ກຳລັງຄິດການໃຫຍ່ກັບ “ເຮືອໃບສີຟ້າ”.

 

ອິວຄາຍ ກຸນໂດກັນ ກອງກາງເລືອດເບຍຂອງ ແມນເຊສເຕີ ຊີຕີ ສະໂມສອນຈ່າຝູງຂອງ ພຣີເມຍລີກ ເປີດເຜີຍວ່າຕົນເອງບໍ່ປິດໂອກາດທີ່ຈະຍ້າຍໄປຢູ່ກັບ ໂບຣຸສເຊຍ ດອດມູນ ສະໂມສອນຍັກໃຫຍ່ຂອງ ບຸນເດສລີກາ ອີກຄັ້ງໃນອະນາຄົດ.

 

ຫ້ອງເຄື່ອງທີມຊາດເຢຍລະມັນຍ້າຍຈາກ “ເສືອເຫຼືອງ” ມາຮ່ວມທັບກັບ “ເຮືອໃບສີຟ້າ” ດ້ວຍຄ່າໂຕ 20 ລ້ານປອນເມື່ອຊ່ວງຊຳເມີທີ່ຜ່ານມາ ແລະ ຫຼ້າສຸດຫາກໍຍິງປະຕູໄດ້ໃນເກມລີກນັດທີ່ ແມນຊີຕີ ເປີດບ້ານອັດ ບອນມັດ 4-0 ເມື່ອວັນເສົາທີ່ຜ່ານມາ.

 

“ຖ້າມັນເກີດຂຶ້ນໃນປີ ຫຼື ສອງປີຂ້າງໜ້ານີ້ຂ້ອຍຕ້ອງບໍ່ແຮັບປີ້ແນ່ນອນເພາະນັ້ນໝາຍຄວາມວ່າຂ້ອຍລົ້ມເຫຼວກັບທີ່ນີ້ ຫຼື ບໍ່ກໍບໍ່ສາມາດພັດທະນາຝີຕີນໄດ້ ແຕ່ຖ້າມື້ນັ້ນຂ້ອຍອາຍຸ 29 ຫຼື 30 ແລ້ວຂ້ອຍກໍບໍ່ຮູ້ຄືກັນວ່າ ດອດມູນ ຍັງຕ້ອງການຂ້ອຍຢູ່ ຫຼື ບໍ່ ເຊິ່ງຂ້ອຍກໍບໍ່ປິດກັ້ນໂອກາດໃນທຸກໆຄວາມເປັນໄປໄດ້ ແຕ່ສຳລັບຕອນນີ້ຂ້ອຍມີເປົ້າໝາຍໃຫຍ່ຢ່າງອື່ນ” ກຸນໂດກັນ ກ່າວ.