ອິນໂດ ແລະ ມາເລເຊຍຮຽກຮ້ອງໃຫ້ຖອນສະຕາບັກອອກຍ້ອນເຫດສະໜັບສະໜູນເພດດຽວກັນ

 

ກຸ່ມຜູ່ນຳທາງສາສະໜາທີ່ເລີ່ມຈາກໃນອິນໂດເນເຊຍ ຕາມມາດ້ວຍມາເລເຊຍ ຕ້ອງການໃຫ້ລັດຖະບານຂອງຕົນຖອນໃບອະນຸຍາດ “ສະຕາ ບັກ” ເພາະມີຈຸດຢືນສະໜັບສະໜູນເພດທີ່ສາມເຊິ່ງເປັນ “ເລື່ອງຕ້ອງຫ້າມ” ທາງສາສະໜາ.

ສຳນັກຂ່າວຕ່າງປະເທດລາຍງານຈາກກຸລາລຳເປີປະເທດມາເລເຊຍເມື່ອວັນທີ 5 ກໍລະກົດວ່າ ອົງກອນທາງສາສະໜາ “ປຣີບູມີ ເປີກາຊາ” ໃນມາເລເຊຍ ອອກຖະແຫຼງການຮຽກຮ້ອງໃຫ້ລັດຖະບານ “ທົບທວນ” ການອອກໃບອະນຸຍາດປະກອບທຸລະກິດການຄ້າໃຫ້ກັບບໍລິສັດທີ່ມີແນວນະໂຍບາຍສະໜັບສະໜູນການແຕ່ງງານລະຫວ່າງຄົນເພດດຽວກັນ ແລະ ການສະໜັບສະໜູນກຸ່ມເພດທີ່ສາມ ຫຼື ບຸກຄົນທີ່ມີຄວາມຫຼາກຫຼາຍທາງເພດ.

ຄວາມເຄື່ອນໄຫວດັ່ງກ່າວຂອງອົງກອນທາງສາສະໜາໃນມາເລເຊຍ ເກີດຂຶ້ນພຽງບໍ່ເທົ່າໃດມື້ຫຼັງ “ຮຳມາດິເຢາະ” ເຊິ່ງເປັນອົງກອນທາງສາສະໜາຂະໜາດໃຫຍ່ອັນດັບ 2 ຂອງອິນໂດເນເຊຍອອກຖະແຫຼງການຢ່າງກົງໄປກົງມາວ່າ ຮຽກຮ້ອງໃຫ້ລັດຖະບານ “ຖອນ” ໃບອະນຸຍາດຂອງບໍລິສັດແຫ່ງໃດກໍຕາມທີ່ສະໜັບສະໜູນກຸ່ມຄົນເພດດຽວກັນ ເຖິງວ່າຖະແຫຼງການຂອງ ຮຳມາດິເຢາະ ບໍ່ໄດ້ພາດພິງເຖິງບໍລິສັດແຫ່ງໃດຢ່າງຊັດເຈນ ແຕ່ ທ່ານ ຢູນາຮາ ອິວຢາສ ໜຶ່ງໃນສະມາຊິກລະດັບສູງຂອງ ຮຳມາດິເຢາະ ກ່າວຮຽກຮ້ອງໃຫ້ອິນໂດເນເຊຍເຊົາອຸດໜູນສິນຄ້າຂອງ ສະຕາບັກ ເພື່ອບໍ່ໃຫ້ເຄືອຮ້ານກາເຟລາຍໃຫຍ່ລະດັບໂລກຈາກອາເມລິກາແຫ່ງນີ້ມີລາຍໄດ້ໄປໃຊ້ສະໜັບສະໜູນແຄມເປນເພື່ອກຸ່ມເພດທີ່ສາມ.

ເຖິງວ່າລົດສະນິຍົມຮັກເພດຽວກັນບໍ່ແມ່ນພຶດຕິກຳທີ່ຜິດກົດໝາຍຕາມລັດຖະທຳມະນູນຂອງອິນໂດເນເຊຍ ຍົກເວັ້ນສະເພາະເຂດປົກຄອງພິເສດອາເຈາະທີ່ຢູ່ພາຍໃຕ້ກົດໝາຍຊາຣີອະ ແຕ່ລົດສະນິຍົມດັ່ງກ່າວຖືເປັນ “ເລື່ອງຕ້ອງຫ້າມ” ແລະ ມີຄວາມລະອຽດຢ່າງຫຼາຍໃນສັງຄົມອິນໂດເນເຊຍ ແລະ ມາເລເຊຍເຊັ່ນກັນ.