ອາເມລິກາຂູ່ຂວ້ຳບາດທາງເສດຖະກິດຕໍ່ເວເນຊູເອລາ

 

ປະທານາທິບໍດີສະຫະລັດຂູ່ຈະໃຊ້ມາດຕະການຂວ້ຳບາດທາງເສດຖະກິດ “ແບບສາຍຟ້າແມບ” ຕໍ່ກັບເວເນຊູເອລາໃນຂະນະທີ່ພັກຝ່າຍຄ້ານກຽມປະທ້ວງໃນວັນພະຫັດ ຫວັງເພີ່ມແຮງກົດດັນໃຫ້ລັດຖະບານລົ້ມແຜນການຮ່າງລັດຖະທຳມະນູນສະບັບໃໝ່.

ສຳນັກຂ່າວຕ່າງປະເທດລາຍງານຈາກວໍຊິງຕັນປະເທດອາເມລິກາເມື່ອວັນທີ 17 ກໍລະກົດວ່າ ປະທານາທິບໍດີ ໂດໂນ ທຣໍາ ກ່າວເມື່ອວັນຈັນວ່າ ສະຫະລັດຈະບໍ່ມີທາງເມີນເສີຍຕໍ່ກັບສະຖານະການໃນເວເນຊູເອລາທີ່ “ກຳລັງຈະຫຼົ້ມສະຫຼາຍ” ໂດຍປະນາມປະທານາທິບໍດີ ໂຄລັສ ມາດູໂຣ ວ່າເປັນ “ຜູ່ນຳທີ່ປ່າເຖື່ອນ ແລະ ຝັນຈະເປັນຜະເດັດການ” ທັງນີ້ ທຣໍາ ຍັງບໍ່ໄດ້ກ່າວຢ່າງຊັດເຈນວ່າຈະໃຊ້ມາດຕະການໃດຕໍ່ກັບລັດຖະບານກາຣາກັສ ແຕ່ເຜີຍວ່າອາດຈະໃຊ້ “ມາດຕະການສາຍຟ້າແມບທາງເສດຖະກິດ” ມີແນວໂນ້ມຈະຍິ່ງສົ່ງຜົນກະທົບແກ່ສະຖານະການທາງການເມືອງ ແລະ ເສດຖະກິດຂອງເວເນຊູເອລາທີ່ຢູ່ໃນຂັ້ນວິກິດຢູ່ແລ້ວ.

ເຖິງວ່າເປັນໄມ້ເບື່ອໄມ້ເມົາກັນຢູ່ເວທີການເມືອງລະຫວ່າງປະເທດມາໂດຍຕະຫຼອດ ແຕ່ລາຍງານຂອງກະຊວງພະລັງງານສະຫະລັດລະບຸວ່າ ຍັງຄົງມີການນຳເຂົ້ານ້ຳມັນດິບຈາກເວເນຊູເອລາປີລະ 270 ລ້ານບາເຣວໃນຮອບທົດສະວັດຫຼ້າສຸດ ແຕ່ເປັນປະລິມານທີ່ຫຼຸດລົງປະມານ 1 ໃນ 3 ເມື່ອທຽບກັບຊ່ວງ 10 ປີທີ່ຜ່ານມາ ຢ່າງໃດກໍຕາມທ່ານ ຊອນ ສະໄປເຊີ ໂຄສົກທຳນຽບຂາວກ່າວວ່າ ຄຳເຕືອນຂອງ ທຣຳ ທີ່ມີຕໍ່ ມາດູໂຣ ຖືເປັນການສະແດງຈຸດຢືນຂອງລັດຖະບານວໍຊິງຕັນວ່າເຮັດແທ້ຕໍ່ກັບສະຖານະການໃນເວເນຊູເອລາ ທາງດ້ານທ່ານນາງ ເຟເດຣິກາ ໂມເກຣິນີ ຫົວໜ້າຝ່າຍນະໂຍບາຍຕ່າງປະເທດຂອງສະຫະພາບເອີຣົບ (ອີຢູ) ກ່າວຮຽກຮ້ອງໃຫ້ລັດຖະບານເວເນຊູເອລາລົ້ມເລີກແຜນການແກ້ໄຂລັດຖະທຳມະນູນ.

ນອກຈາກນີ້ຖ້ອຍຄຳຖະແຫຼງການດັ່ງກ່າວຂອງຜູ່ນຳສະຫະລັດໃນເວລາດຽວກັນທີ່ພັນທະມິດພັກຮ່ວມຝ່າຍຄ້ານຂອງເວເນຊູເອລາປະກາດປະທ້ວງເປັນເວລາ 24 ຊົ່ວໂມງໃນວັນພະຫັດທີ່ຈະມາຮອດນີ້ ເພື່ອເປັນການເພີ່ມແຮງກົດດັນໃຫ້ແກ່ ມາດູໂຣ ເຊິ່ງຍັງຄົງຍຶດໝັ້ນຈັດການເລືອກຕັ້ງສະມາຊິກສະພາປະຊາຊົນເພື່ອປະຕິຮູບລັດຖະທຳມະນູນໃນວັນທີ 30 ກໍລະກົດນີ້ ຫຼັງພັກຝ່າຍຄ້ານຈັດການລົງປະຊາມະຕິທາງສັນຍະລັກເມື່ອວັນອາທິດທີ່ຜ່ານມາ ເພື່ອຄັດຄ້ານການເດີນໜ້າດັ່ງກ່າວຂອງລັດຖະບານ ໂດຍມີປະຊາຊົນເຂົ້າຮ່ວມການລົງຄະແນນຫຼາຍເຖິງ 7.6 ລ້ານຄົນ ທ່າມກາງການປະທ້ວງຂັບໄລ່ລັດຖະບານທີ່ຍືດເຍື້ອຍາວນານຕັ້ງແຕ່ເດືອນເມສາທີ່ຜ່ານມາ ແລະ ມີຜູ່ເສຍຊີວິດແລ້ວຫຼາຍກວ່າ 100 ຄົນ.