ອາເບລົວກຽມລາຂຸນຄ້ອນມັງກອນນີ້

 

ສື່ສະເປນລະບຸ ເອົາບາໂຣ ອາເບລົວ ແບັກຂວາຕົວເກົ໋າຂອງ ເວສແຮມ ຢູໄນເຕັດ ກຽມອຳລາທີມຊ່ວງເດືອນມັງກອນນີ້ຫຼັງຈາກທີ່ສໍ່ແວວວ່າບໍ່ລຸ້ງກັບທີມ ເຜີຍກຳລັງໄດ້ຮັບຄວາມສົນໃຈຈາກຫຼາຍສະໂມສອນໃນແດນກະທິງ.

 

ເອົາບາໂຣ ອາເບລົວ ແບັກຂວາສະເປນຂອງ ເວສແຮມ ຢູໄນເຕັດ ສະໂມສອນດັງຂອງເວທີ ພຣີເມຍລີກ ກຽມທີ່ຈະເກັບເຄື່ອງອຳລາຖິ່ນ ລອນດອນ ສະເຕດຽມ ຊ່ວງເດືອນມັງກອນນີ້ເຖິງວ່າຫາກໍຍ້າຍມາຮ່ວມທັບ “ຂຸນຄ້ອນ” ເມື່ອຊ່ວງຊໍາເມີທີ່ຜ່ານມາກໍຕາມ ຕາມການລາຍງານຈາກ ມຸນໂດ ເດປໍຕິໂບ ສື່ກິລາຊັ້ນນຳແດນກະທິງເມື່ອວັນພະຫັດທີ່ຜ່ານມາ.

 

ເວສແຮມ ສາມາດຕັດໜ້າຫຼາຍໆທີມດຶງໂຕ ອາເບລົວ ມາຮ່ວມທີມແບບຟຣີໆເມື່ອຊ່ວງຊຳເມີທີ່ຜ່ານມາຫຼັງຈາກທີ່ນັກເຕະຖືກປ່ອຍອອກຈາກ ເຣອັນ ມາດຣິດ ຢ່າງໃດກໍຕາມອະດີດແຄ່ງ ລີເວີພູ ເຮັດຜົນງານໄດ້ບໍ່ໜ້າພໍໃຈເທົ່າໃດໃນລະດູການນີ້ ແລະ ຫາກໍລົງຫຼິ້ນເກມລີກພຽງນັດດຽວເທົ່ານັ້ນ.

 

ຫຼ້າສຸດ ມຸນໂດ ເດປໍຕິໂບ ລະບຸວ່ານາຍໜ້າຂອງ ອາເບລົວ ກຳລັງຕິດຕໍ່ຢູ່ກັບຫຼາຍສະໂມສອນ ແລະ ກໍເຊື່ອກັນວ່າເວລານີ້ດາວເຕະເລືອດກະທິງອາຍຸ 33 ປີກຳລັງໄດ້ຮັບຄວາມສົນໃຈຈາກຫຼາຍສະໂມສອນໃນສະເປນ.

 

ທັງນີ້ ອາເບລົວ ເຄີຍຫຼິ້ນກັບ ລີເວີພູ ຊ່ວງລະຫວ່າງປີ 2007-2009 ກ່ອນຍ້າຍກັບໄປ ເຣອັນ ມາດຣິດ ຕົ້ນສັງກັດທໍາອິດໃນອາຊີບນັກເຕະ.