ອາເຊນອນມຶນ!! ມຸສຕາຟີເຈັບຈາກເກມທີມຊາດສໍ່ພັກຍາວ

ໂຢອາຄິມ ເລີບ ເທຣນເນີທີມຊາດເຢຍລະມັນ ອອກມາເຜີຍວ່າ ຊາໂຄດຣານ ມຸສຕາຟີ ເຊັນເຕີແບັກຕົວເກັ່ງ ມີບັນຫາກ້າມຊີ້ນຕົ້ນຂາຂວາດ້ານຫຼັງຈີກ ໃນເກມບານໂລກ 2018 ຮອບຄັດເລືອກທີ່ພວກເຂົາເປີດບ້ານຖະຫຼົ່ມ ອາເຊີໃບຈານ 5-1 ເມື່ອວັນອາທິດທີ່ຜ່ານມາ ຕາມລາຍງານເມື່ອວັນຈັນທີ 9 ຕຸລາ.

ກອງຫຼັງຂອງ ອາເຊນອນ ເຈັບຈົນນຳໄປສູ່ຈັງຫວະຕີສະເໝີຂອງ ອາເຊີໃບຈານ ໃນເຄິ່ງທຳອິດ ແລະ ຕ້ອງຖືກປ່ຽນຕົວອອກໂດຍ ມັດທິອັສ ກິນເຕີ ລົງມາແທນ ແລະ ພາຍຫຼັງການແຂ່ງຂັນ ເລີຟ ຢືນຢັນວ່າ ນັກເຕະອາຍຸ 25 ປີກ້າມຊີ້ນຈີກ ແລະ ອາດຈະຕ້ອງພັກຍາວ.

“ສຳລັບ ມຸສຕາຟີ ເບິ່ງແລ້ວວ່າເປັນບັນຫາກ້າມຊີ້ນຈີກ ແລະ ອາດຈະເຮັດໃຫ້ເຂົາຕ້ອງພັກເປັນເວລາດົນກວ່າທີ່ຄາດການເອົາໄວ້ໃນຕອນທຳອິດ” ເລີຟ ກ່າວ.

ນອກຈາກນີ້ ນິຄລາສ ຊືເລ ກອງຫຼັງຈາກ ບາເຢິນ ມິວນິກ ກໍມີອາການບາດເຈັບບໍລິເວນກ້າມຊີ້ນຕົ້ນຂາຊ້າຍ ຈົນຕ້ອງຖືກປ່ຽນຕົວອອກໃນຊ່ວງເຄິ່ງເວລາທຳອິດແຕ່ ເຢຍລະມັນ ກໍຍັງສາມາດເກັບ 3 ຄະແນນໄດ້ຢ່າງບໍ່ຍາກພ້ອມກັບເຮັດສະຖິຕິຊະນະຕິດ 100% ໃນຮອບຄັດເລືອກ.