ອາຊຽນ ທົບທວນຄືນການຮ່ວມມືດ້ານຖະແຫລງຂ່າວ

 ຂປລ. ກອງປະຊຸມອານຸກຳມະການຖະແຫລງຂ່າວອາຊຽນ ຄັ້ງທີ 17 ໄດ້ໄຂຂຶ້ນຢ່າງເປັນທາງການ ທີ່ນະຄອນຫລວງວຽງຈັນ, ວັນທີ 20 ກໍລະກົດ 2016 ເພື່ອທົບທວນຄືນການຈັດຕັ້ງປະຕິບັດບັນດາ ໂຄງການຮ່ວມມືດ້ານຖະແຫລງຂ່າວ ຂອງອາຊຽນ ໃນໄລຍະຜ່ານມາ ແລະ ສືບຕໍ່ສະເໜີບັນດາກິດຈະກຳ ແລະ ບັນດາໂຄງການໃໝ່ໃນຂອບເຂດຖະແຫລງຂ່າວອາຊຽນ ເພື່ອນຳໄປຈັດຕັ້ງປະຕິບັດໃນສົກປີ 2017. ໂດຍການເປັນປະທານຂອງທ່ານ ປິ່ນປາດຖະນາ ພັນທະມາລີ ຫົວໜ້າກົມສື່ມວນຊົນ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ກຽດເຂົ້າຮ່ວມໂດຍທ່ານ ສະຫວັນຄອນ ລາຊະມຸນຕີ ຮອງລັດ ຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ຕົວແທນຈາກຄະນະອານຸກຳມະ ການຖະແຫລງຂ່າວ 10 ປະເທດອາຊຽນເຂົ້າຮ່ວມ. ທ່ານ ສະຫວັນຄອນ ລາຊະມຸນຕີ ກ່າວວ່າ: ພວກເຮົາໄດ້ມີການປະກອບສ່ວນສະໜັບສະໜູນຢ່າງເຕັມທີ່ ຂອງການຈັດກອງປະຊຸມອານຸກຳມະການຖະແຫລງຂ່າວອາຊຽນ ເຊິ່ງໄດ້ເຮັດໃຫ້ມີສ່ວນຮ່ວມໃນການພັດທະນາ ແລະ ການປະຕິບັດໄລຍະຂອງໂຄງການທີ່ສໍາຄັນ ຢູ່ພາຍໃຕ້ຂະແໜງການຖະແຫລງຂ່າວ. ທ່ານ ກ່າວຕື່ມວ່າ: ໃນບັນດາຜົນສໍາເລັດທີ່ສໍາຄັນໃນໄລຍະປີທີ່ຜ່ານມາ ແມ່ນມີໂຄງການແລກປ່ຽນຂ່າວທາງໂທລະພາບອາຊຽນ (ATN) ແລະ ວິທະຍຸ ອາຊຽນ (AIA), ໃນປັດຈຸບັນ ເປັນທີ່ຮູ້ຈັກກັນດີ ໃນນາມສຽງຂອງອາຊຽນ, ສ່ວນໂຄງການຖາມ-ຕອບ ອາຊຽນ ເຊິ່ງເປັນໂຄງການທີ່ເກີດຂຶ້ນ ແລະ ໄດ້ຮັບການຈັດຕັ້ງປະຕິບັດມາເປັນສອງທົດສະວັດ.

====================

ພາບແລະຂ່າວ: Pathedlao Lao

ບົດຄວາມໃຫມ່ໆ