ອັບເດດສະຖານະການບອມເມືອງຄາບູນຫຼ້າສຸດຕາຍແລ້ວ 80 ລາຍເຈັບສາຫັດອີກຢ່າງໜ້ອຍ 350 ຊີວິດ

 

ລາຍງານສະຖານະການຫຼ້າສຸດເຫດລະເບີດຄັ້ງໃຫຍ່ຢູ່ໃຈກາງເມືອງຄາບູນເມືອງຫຼວງຂອງອັບການິດສະຖານເຮັດໃຫ້ມີຜູ້ເສຍຊີວິດແລ້ວ 80 ຄົນ ແລະ ໄດ້ຮັບບາດເຈັບອີກຢ່າງໜ້ອຍ 350 ຄົນ ເຈົ້າໜ້າທີ່ຄາດວ່າຈະມີຈຳນວນຜູ້ເສຍຊີວິດ ແລະ ໄດ້ຮັບບາດເຈັບເພີ່ມຂຶ້ນອີກຫຼັງຈາກນີ້.

ມີລາຍງານເບື້ອງຕົ້ນວ່າ ເຫດລະເບີດເກີດຂຶ້ນເມື່ອເວລາປະມານ 8:25 ຕາມເວລາທ້ອງຖິ່ນໃນບໍລິເວນຈະຕຸລັດຊານບັກໃກ້ກັບສະຖານທູດຕ່າງປະເທດ ແລະ ທຳນຽບປະທານາທິບໍດີ ໂດຍທີ່ຄົນຮ້າຍວາງລະເບີດໄວ້ໃນລົດບັນທຸກ ເຊິ່ງແຮງຂອງລະເບີດສ້າງຄວາມເສຍຫາຍໃຫ້ກັບອາຄານບ້ານເຮືອນເປັນບໍລິເວນກວ້າງລວມທັງອາຄານທີ່ຢູ່ຫ່າງອອກໄປຫຼາຍຮ້ອຍແມັດ.

ພາບທີ່ມີຜູ້ເຜີຍແພ່ທາງສື່ສັງຄົມອອນລາຍ ສະແດງໃຫ້ເຫັນກຸ່ມຄວັນທີ່ໜາທຶບລອຍຂຶ້ນເທິງຟ້າຈາກບ່ອນເກີດເຫດ ລວມທັງພາບຊາກລົດຫຼາຍຄັນທີ່ຖືກທຳລາຍດ້ວຍແຮງລະເບີດອີກດ້ວຍ ຕອນນີ້ຕຳຫຼວດໄດ້ເຂົ້າປິດລ້ອມບໍລິເວນບ່ອນເກີດແລ້ວ ແລະ ກຳລັງນຳຄົນບາດເຈັບສົ່ງໂຮງໝໍ.

ທັງນີ້ສຳນັກຂ່າວຣອຍເຕີ້ລາຍງານໂດຍອ້າງເຈົ້າໜ້າທີ່ຕຳຫຼວດທ້ອງຖິ່ນວ່າເຫດລະເບີດເກີດຂຶ້ນໃກ້ກັບສະຖານທູດເຢຍລະມັນ ແຕ່ຍັງຍາກທີ່ຈະບອກໄດ້ວ່າການລະເບີດຄັ້ງນີ້ແມ່ນຕັ້ງເປົ້າໂຈມຕີສະຖານທີ່ໃດເນື່ອງຈາກວ່າມີຖານທີ່ສຳຄັນຫຼາຍແຫ່ງຢູ່ໃນບໍລິເວນດັ່ງກ່າວ ແລະ ຍັງບໍ່ມີກຸ່ມໃດອອກມາອ້າງຄວາມຮັບຜິດຊອບວ່າເປັນຜູ້ບົງການກໍ່ເຫດດັ່ງກ່າວ ແຕ່ວ່າເມື່ອເດືອນທີ່ຜ່ານມາກຸ່ມຕາລີບັນໄດ້ປະກາດວ່າຈະເລີ່ມການໂຈມຕີຊ່ວງລະດູໃບໄມ້ປົ່ງຄັ້ງໃຫຍ່ ໂດຍຈະມຸ່ງເປົ້າໂຈມຕີກອງກຳລັງຕ່າງຊາດໂດຍໃຊ້ວິທີການຫຼາກຫຼາຍ ທັງການຊຸ່ມໂຈມຕີແບບກອງໂຈນໄປຈົນຮອດການໃຊ້ລະເບີດຂ້າຕົວຕາຍ.