ອັນເລັນກຽມກວດຮ່າງກາຍຍ້າຍໄປສະໂຕກ

 

ໂຈ ອັນເລັນ ກອງກາງທີມຊາດເວວໃຫ້ຍ້າຍຈາກ ລີເວີພູ ໄປຢູ່ກັບ ສະໂຕກ ແລ້ວຫຼັງນັກເຕະກຽມເຂົ້າຮັບການກວດຮ່າງກາຍທີ່ ບຣິທາເນຍ ແລ້ວຍ້ອນວ່າບໍ່ຢູ່ໃນແຜນຂອງ ເຈີເກັນ ຄັອບ ເຖິງວ່າເຂົາຈະໂຊຟອມໂດດເດັ່ນໃນ ຢູໂຣ 2016 ກໍຕາມ.

 

ໂຈ ອັນເລັນ ກອງກາງ ລີເວີພູ ກຽມເຂົ້າຮັບການກວດຮ່າງກາຍກັບ ສະໂຕກ ຊີຕີ ຄູ່ແຂ່ງຮ່ວມ ພຣີເມຍລີກ ກ່ອນຍ້າຍເຂົ້າຖິ່ນ ບຣິທານເນຍ ສະເຕດຽມ ດ້ວຍຄ່າໂຕ 13 ລ້ານປອນຢ່າງເປັນທາງການຕໍ່ໄປຕາມການລາຍງານຈາກ “ເດິ ມິນເລີ” ສື່ເມືອງຜູ້ດີ ເມື່ອວັນຈັນນີ້.

 

ອັນເລັນ ຍ້າຍມາຈາກ ສະວອນຊີ ຊີຕີ ດ້ວຍຄ່າໂຕ 15 ລ້ານປອນເມື່ອປີ 2012 ແລະ ຫາກໍເຮັດຜົນງານໄດ້ຢ່າງໂດດເດັ່ນຊ່ວຍໃຫ້ທີມຊາດເວວຜ່ານເຂົ້າຮອດຮອບຮອງຊະນະເລີດໃນ ຢູໂຣ 2016 ທີ່ປະເທດຝຣັ່ງ.

 

ຢ່າງໃດກໍຕາມ ອັນເລັນ ບໍ່ໄດ້ຮັບປະກັນຕົວຈິງຈາກ ເຈີເກັນ ຄັອບ ຜູ້ຈັດການທີມ “ຫົງແດງ” ໃນລະດູການໜ້າ ແລະ ຈາກການທີ່ຍັງເຫຼືອສັນຍາໃນຖິ່ນ ແອນຟິວ ອີກແຕ່ປີດຽວເທົ່ານັ້ນເຮັດໃຫ້ສະໂມສອນຕອບຮັບຂໍ້ສະເໜີກ່ອນທີ່ຈະເສຍນັກເຕະໄປແບບບໍ່ມີຄ່າໂຕຖ້າປ່ອຍໃຫ້ໝົດສັນຍາໃນປີໜ້າ.