ອັນຕະລາຍກຳລັງຈະເກີດຂຶ້ນກັບ ເຮຕິ ເມື່ອນັກໂທດແຫກຄຸກ 174 ຄົນ

       ຕາມ​ຂ່າວ​ຕ່າງປະ​ເທດ​ລາຍ​ງານ​ວ່າ: ​ເຈົ້າໜ້າ​ທີ່​ເຮ​ຕິ​ໃນ​ເມືອງ​ອາຄາ​ເຮ ​ເມືອງ​ແຄມ​ຝັ່ງ​ທາງ​ພາກ​ເໜືອ​ຂອງ​ເຮ​ຕິ ​ເລັ່ງລະດົມ​ ກຳລັງ​ຮ່ວມ​ກັບ​ທະຫານ​ຮັກສາ​ສັນຕິພາບ​ຂອງ​ສະຫະ​ປະຊາ​ຊາດ(ຢູ​ເອັນ)ອອກ​ໄລ່​ລ່າ​ນັກ​ໂທດ 174 ຄົນ​ທີ່​ຫຼົບໜີ​ອອກ​ຈາກ​ຄຸກ​ໃນ​ວັນ​ທີ 22 ຕຸລາ​ທີ່​ຜ່ານມາ ​ໂດຍ​ໄດ້​ມີ​ການ​ຕັ້ງ​ດ່ານ​ສະກັດ​ກັ້ນ​ໃນ​ເສັ້ນທາງ​ສາຍ​ຕົ້ນຕໍ​ທີ່​ເຊື່ອມ​ຕໍ່​ຈາກ​ຄຸກ ​ແລະ ຄວບ​ຄຸມ​ຜູ້​ຕ້ອງ​ສົງ​ໄສ​ໄດ້​ຈຳນວນ​ໜຶ່ງ​ທີ່​ບໍ່​ມີ​ບັດປະຈຳຕົວ. ​ເຫດການ​ເກີດ​ຂຶ້ນ​ໃນ​ໄລຍະ​ເວລາ​ອາບ​ນ້ຳ ກຸ່ມ​ນັກ​ໂທດ​ໄດ້​ບຸກ​ເຂົ້າ​ໄປ​ພື້ນ​ທີ່​ສຳລັບ​ເຈົ້າ​ໜ້າ​ທີ່​ເຝົ້າ​ຄຸກ​ລັກ​ເອົາ​ປືນ​ຢ່າງ​ໜ້ອຍ 5 ກະບອກ ຍິງ​ໃສ່​ເຈົ້າ​ໜ້າ​ທີ່​ເຮັດ​ໃຫ້​ເສຍ​ຊີວິດ 1 ຄົນ ​ແລະຫຼົບໜີ​ອອກ​ໄປ ​ໃນ​ລະ​ຫວ່າງ​ວຸ່ນວາຍ​ມີ​ນັກ​ໂທດ​ຖືກ​ຄວບ​ຄຸມ​ຕົວ​ໄວ້​ໄດ້ 11 ຄົນ ​ໄດ້​ຮັບ​ບາດ​ເຈັບ 3 ຄົນ ​ແລະ ມີ 1 ຄົນ​ຕົກລົງ​ມາ​ເສຍ​ຊີວິດ ຂະນະ​ທີ່​ພະຍາຍາມ​ປີນ​ກຳ​ແພງ​ຫຼົບໜີ ​ແລະມີ​ເຈົ້າໜ້າ​ໄດ້​ຮັບ​ບາດ​ເຈັບ​ຈຳນວນ​ໜຶ່ງ.

     ຄຸກ​ໃນ​ເຮ​ຕິ​ມີ​ຄວາມ​ແອ​ອັດ​ຫຼາຍ ຊຶ່ງ​ຈຳນວນ​ບໍ່​ໜ້ອຍ​ຖືກ​ຄວບຄຸມເປັນ​ໄລຍະ​ເວລາ​ດົນ​ຫຼາຍ​ປີ​ລະ​ຫວ່າງ​ລໍຖ້າ​ການ​ດຳ​ເນີນ​ຄະດີ ຂະນະທີ່​ສຳນັກງານຣອຍ​ເຕີ​ເຜີຍ​ວ່າ ນັກ​ໂທ​ດໃນ​ຄຸກ​ແຫ່ງ​ນີ້​ບໍ່​ໄດ້​ໃສ່​​ເຄື່ອງ​​ແບບ ຈຶ່ງ​ເປັນ​​ເລື່ອງ​ຍາກ​ທີ່​ຈະ​ລະ​ບຸ​ຕົວ ທັງ​ເຈົ້າ​ໜ້າ​ທີ່​ໄດ້​ອອກ​ປະກາດ​ເຕືອນ​ໃຫ້​ປະຊາຊົນ​ເຝົ້າ​ລະວັງ ​ແລະປະຕິບັດ​ຕາມ​ຄຳ​ແນະນຳ​ຂອງ​ເຈົ້າ​ໜ້າ​ທີ່​ຢ່າງ​ເຄັ່ງ​ຄັດ​ຂະນະ​ທີ່​ການ​ຊອກ​ຫາ​ຍັງ​ດຳ​ເນີນ​ຕໍ່​ໄປ.

ແຫຼ່ງຂ່າວ: ໜັງສືພິມເສດຖະກິດ-ສັງຄົມ.

ບົດຄວາມໃຫມ່ໆ