ອັດສະຈັນ!! ໝໍຫວຽດນາມ ລືມເຄື່ອງມືແພດໄວ້ໃນທ້ອງຄົນເຈັບ ດົນເຖິງ 18 ປີ ແຕ່ຍັງມີຊີວິດຢູ່ໄດ້

         ສຳນັກຂ່າວຣອຍເຕີ້ ລາຍງານໃນວັນທີ 3​ ມັງກອນ 2017 ທີ່ຜ່ານມານີ້ວ່າ ທ້າວ ມາ ວັນ ເຍິ໊ດ ອາຍຸ 54 ປີ ໄດ້ເຂົ້າຮັບການຜ່າຕັດ ເພື່ອເອົາເຄື່ອງມືທາງການແພດ (ແປ໋ງ) ທີ່ຖືກລືມໄວ້ໃນທ້ອງ ລະຫວ່າງການຜ່າຕັດເມື່ອ 18 ປີກ່ອນໜ້ານີ້ ຫລັງຈາກທີ່ຜູ້ກ່ຽວມີອາການເຈັບທ້ອງ ໂດຍທີ່ບໍ່ຮູ້ເລີຍວ່າ ມີສິ່ງແປກປອມຢູ່ໃນຮ່າງກາຍມາດົນເກືອບ 20 ປີ.

          ທ້າວ ເຍິ໊ດ ໄດ້ເຂົ້າຮັບການຜ່າຕັດ ໃນປີ  1998 ເນື່ອງຈາກປະສົບອຸບັດເຫດ ຊຶ່ງໃນໄລຍະຜ່ານມາ ຜູ້ກ່ຽວຮູ້ສຶກເຈັບທ້ອງເປັນບາງຄັ້ງຄາວ ແລະ ທາງຄລີນິກ ໄດ້ສັ່ງຢາສຳລັບປິ່ນປົວບາດແຜໃນກະເພາະອາຫານໃຫ້ກິນ, ແນວໃດກໍຕາມ ເມື່ອທ້າຍປີ 2016 ທີ່ຜ່ານມາ ຜູ້ກ່ຽວໄດ້ຕັດສິນໃຈເຂົ້າສ່ອງໄຟຟ້າເບິ່ງ (ເອັກສະເຣ) ຈຶ່ງພົບວ່າ ມີແປ໋ງຍາວ 15 ຊັງຕີແມັດ ຢູ່ໃນສະພາບແຕກຫັກແຍກສ່ວນ ຕິດຢູ່ພາຍໃນທ້ອງຂອງຕົນ, ເຮັດໃຫ້ແພດປະຈຳໂຮງໝໍເທບທ້າຍຫງວຽນ ຫ່າງຈາກນະຄອນຫລວງຮ່າໂນ້ຍ ໄປທາງທິດເໜືອປະມານ 80 ກິໂລແມັດ ໄດ້ດຳເນີນການຜ່າຕັດ ໃຊ້ເວລາປະມານ 3 ຊົ່ວໂມງ ເພື່ອເອົາແປ໋ງອອກ ເມື່ອທ້າຍອາທິດຜ່ານມານີ້ ຊຶ່ງປັດຈຸບັນຜູ້ກ່ຽວມີອາການດີຂຶ້ນເທື່ອລະກ້າວ.

        ຜູ້ອຳນວຍການ ໂຮງໝໍບັ໊ກບັນ ທ່ານ ຈິງ ຖິ ເລືອງ ຊຶ່ງເປັນບ່ອນທີ່ ເຍິ໊ດ ເຂົ້າຮັບການຜ່າຕັດໃນປີ 1998 ໄດ້ກ່າວໃຫ້ສຳພາດຕໍ່ ສະຖານີໂທລະພາບ VTV ວ່າ ປັດຈຸບັນເຈົ້າໜ້າທີ່ ກຳລັງພະຍາຍາມສືບສວນວ່າ ແມ່ນໃຜເປັນຜູ້ຖິ້ມເຄື່ອງມືແພດໄວ້ໃນຮ່າງກາຍຂອງຄົນເຈັບ, ເຖິງແມ່ນວ່າແພດຄົນນັ້ນຈະກະສຽນເຂົ້າຮັບບຳນານແລ້ວກໍຕາມ ແຕ່ພວກເຮົາຈະແຈ້ງເລື່ອງນີ້ໃຫ້ແກ່ເຂົາ ແລະ ນີ້ຖືເປັນບົດຮຽນຂອງແພດທຸກຄົນ.​

ແຫຼ່ງຂ່າວ: ລາວໂພດສ໌