ຫ້າງຢາເຮ!!ເລໂນ້ຂະຫຍາຍສັນຍາ 4 ປີ

 

ແຟນບານ ໄບເອີ ເລເວີກູເຊັນ ໄດ້ຮັບຂ່າວດີເມື່ອຫຼ້າສຸດ ແບຣນ ເລໂນ້ ນາຍທະວານເລືອດເບຍໄດ້ຂະຫຍາຍສັນຍາສະບັບໃໝ່ກັບທີມຈົນຮອດປີ 2020 ດ້ານ ໂຣເຈີ້ ສະມິດ ນາຍໃຫຍ່ຂອງ “ຫ້າງຢາ” ຍົກຍ້ອງມືກາວເປັນຜູ້ຮັກສາປະຕູທີ່ດີເຖິງວ່າອາຍຸຍັງນ້ອຍກໍຕາມ.

 

“ຫ້າງຢາ” ໄບເອີ ເລເວີກູເຊັນ ສະໂມສອນດັງຂອງ ບຸນເດສລີກາ ເຢຍລະມັນ ປະກາດຢືນຢັນວ່າ ແບຣນ ເລໂນ້ ຜູ້ຮັກສາປະຕູມືໜຶ່ງຂອງທີມໄດ້ຈັດການຂະຫຍາຍສັນຍາກັບຕົ້ນສັງກັດອີກ 4 ປີເປັນທີ່ຮຽບຮ້ອຍແລ້ວສົ່ງຜົນໃຫ້ເຂົາຈະຫຼິ້ນໃນຖິ່ນ ໄບ ອາຣີນ້າ ຈົນຮອດປີ 2020.

 

ນາຍດ່ານເຢຍລະມັນອາຍຸ 24 ປີລົງສະໜາມໃຫ້ຕົ້ນສັງກັດເກີນ 150 ນັດໃນ ບຸນເດສລີກາ ແລະ ໄດ້ລົງເຝົ້າເສົາທັງ 3 ນັດທຳອິດຂອງລະດູການນີ້ ຫຼ້າສຸດເຂົາໄດ້ຝາກອະນາຄົດໃນຮັງ ໄບ ອາຣີນ້າ ໄປຈົນຮອດປີ 2020 ແລ້ວຫຼັງຈາກທີ່ສອງນັກເຕະເພື່ອນຮ່ວມທີມຄື ເວນເດວ ກັບ ຄາຣິມ ເບວລາຣາບີ້ ຫາກໍຂະຫຍາຍສັນຍາໄປໃນກ່ອນໜ້ານີ້.

 

ດ້ານ ໂຣເຈີ້ ສະມິດ ນາຍໃຫຍ່ຂອງທີມທີ່ຫາກໍພາທີມເອົາຊະນະ ຮຳບຸຸກ ເອສເຟົາ 3-1 ໃນເກມລີກເມື່ອວັນເສົາທີ່ຜ່ານກ່າວວ່າ “ແບຣນ ຄອງຕຳແໜ່ງຜູ້ຮັກສາປະຕູຂອງ ໄບເອີ ເຖິງວ່າເຂົາຈະຍັງນ້ອຍແຕ່ເຂົາກໍເກັ່ງຂຶ້ນທຸກໆປີ ແລະ ສົມຄວນກາຍເປັນສ່ວນສຳຄັນຂອງທີມຊາດເຢຍລະມັນຊຸດໃຫຍ່ ເຂົາເປັນນາຍທະວານທີ່ສົມບູນແບບເຖິງວ່າເຂົາຍັງມີສະກະຍະພາບທີ່ພັດທະນາໄດ້ອີກກໍຕາມ ຖ້າເຈົ້າສາມາດດຶງນັກເຕະເອົາໄວ້ໄດ້ນັ້ນກໍເປັນສັນຍານທີ່ດີສຳຫຼັບສະໂມສອນ ແລະ ເຮົາໃນຖານະທີມ”.