ຫຼີກເວັ້ນເສັ້ນທາງບັນຫາລົດແອອັດໃນໄລຍະບຸນທາດຫຼວງ

ກອງບັນຊາການ ປກສ ນະຄອນຫຼວງວຽງຈັນ ໄດ້ອອກແຈ້ງການກ່ຽວກັບລະບຽບ ຂໍ້ຫ້າມ ແລະການນຳໃຊ້ເສັ້ນທາງຂອງມວນຊົນທີ່ຈະເຂົ້າມາທ່ຽວຫຼີ້ນບຸນນະມັດສະການພະທາດຫຼວງ , ຊຶ່ງປີນີ້ເຈົ້າໜ້າທີ່ໄດ້ກຳນົດການຈັດງານບຸນແລະ ງານວາງສະແດງສິນຄ້າ ແຕ່ວັນທີ 19 ຫາ 25 ພະຈິກ 2015.

ເພື່ອເຮັດໃຫ້ງານບຸນ ໄດ້ດໍາເນີນໄປດ້ວຍບັນຍາກາດມ່ວນຊື່ນ ຮັກສາເອກະລັກວັດທະນະທຳອັນດີງາມຂອງຊາດລາວ , ຮັບປະກັນຄວາມເປັນລະບຽບຮຽບຮ້ອຍ ແລະ ຄວາມສະອາດສວຍງາມ ເຈົ້າໜ້າທີ່ຄາດວ່າຈະມີປະຊາຊົນເຂົ້າມາທ່ຽວຊົມເປັນຈຳນວນຫຼາຍ ເນື່ອງຈາກເປັນການຈັດງານໃຫ່ຍ ເພື່ອສະຫຼອງ ວັນຊາດທີ 2 ທັນວາ ຄົບຮອບ 40 ປີ , ສະນັ້ນ ກອງບັນຊາການ ປກສ ນະຄອນຫຼວງວຽງຈັນ ຈິ່ງໄດ້ກໍານົດທາງຫຼາຍເສັ້ນໃນການສັນຈອນເພື່ອຫຼີກບັນຫາລົດແອອັດ ສະເພາະລົດທີ່ແລ່ນມາຈາກເສັ້ນທາງເລກທີ 13 ໃຕ້ , ເສັ້ນທາງເລກ 10 ຫຼືເສັ້ນທາງດອນໜູນ ເຊື່ອມຕໍ່ໄປເສັ້ນທາງໄກສອນ ຖ້າບໍ່ມີຈຸດປະສົງໄປງານບຸນ ແມ່ນໃຫ້ລ້ຽວໄປເສັ້ນທາງບ້ານໜອງໜ່ຽງ ເຊື່ອມຕໍ່ບ້ານວັງຊາຍ ແລ້ວໄປຕາມຈຸດປະສົງ , ສຳລັບລົດບັນທຸກທີ່ແລ່ນມາແຕ່ເສັ້ນທາງເລກ 13 ເໜືອ ມີຈຸດປະສົງໄປຂົວມິດຕະພາບໃຫ້ແລ່ນຕາມເສັ້ນທາງໜອງບຶກ-ດົງໂດກ ເຊື່ອມຕໍ່ໄປເສັ້ນທາງ 450ປີ ແລ້ວໄປຕາມຈຸດປະສົງ , ສະເພາະ ເສັ້ນທາງທີ່ຫ້າມຈອດ ປະກອບມີເສັ້ນທາງໄກສອນພົມວິຫານແຕ່ສາມແຍກໂພນພະເນົາ ເຖິງປະຕູໄຊ , ເສັ້ນທາງໜອງບອນ ແຕ່ໄຟແດງທາດຝຸ່ນເຖິງສາມແຍກນາໄຊ ແລະສາມແຍກນາໄຊເຖິງວົງວຽນ 450 ປີ , ສາມແຍກສະຖານທູດຫວຽດນາມເຖິງສີ່ແຍກໄຟແດງຂົວຮ່ອງແຊງເຖິງສາມແຍກໄຟແດງໂພນທັນ.