ຫຼາຍພາກສ່ວນ ຮ່ວມປຶກສາຫາລື ເພື່ອລຶບລ້າງ ຄວາມຮຸນແຮງ ຕໍ່ແມ່ຍິງ

 

ໃນວັນທີ 25 ພຶດສະພາ 2017 ທີ່ ນະຄອນຫລວງວຽງຈັນ, ຄະນະກຳມາທິການເພື່ອຄວາມກ້າວໜ້າແມ່ຍິງ, ແມ່ ແລະ ເດັກ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບອົງການຈັດຕັ້ງ ທີ່ເປັນຄູ່ຮ່ວມພັດທະນາໄດ້ຈັດກອງປະຊຸມ ແລກປ່ຽນບົດຮຽນ ກ່ຽວກັບການຈັດຕັ້ງປະຕິບັດ  ສົນທິສັນຍາ ຊີດໍ ໂດຍການເປັນປະທານ ຂອງທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທັງເປັນປະທານຄະນະກຳມະການ ເພື່ອຄວາມກ້າວໜ້າ ແມ່ຍິງ ແລະ ວຽກງານແມ່ ​ແລະ ເດັກ ມີສຳມະນາກອນຈາກອົງການຈັດຕັ້ງສາກົນ ແລະ ພາກສ່ວນກຽວຂ້ອງເຂົ້າຮ່ວມ.

ກອງປະຊຸມດັ່ງກ່າວ, ເພື່ອຍົກລະດັບຄວາມຮູ້, ຄວາມເຂົ້າໃຈໃຫ້ພະນັກງານ ໃນຂະແໜງ ຖວທ ໃຫ້ເຂົ້າໃຈໃນການຈັດຕັ້ງປະຕິບັດ ແນວທາງນະໂຍບາຍ, ກົດໝາຍ, ສົນທິສັນຍາສາກົນ  ໃນການຈັດຕັ້ງປະຕິບັດສົນທິສັນຍາຊີດໍໃນລາວ, ພ້ອມທັງຈະໄດ້ຮັບຟັງ ແລະ ແລກປ່ຽນນໍາກັນເພື່ອສ້າງຄວາມເຂົ້າໃຈຕໍ່ບັນຫາດັ່ງກ່າວ.

ທ່ານ ສະຫວັນຄອນ ລາຊະມຸນຕີ ກ່າວວ່າ: ການຈັດຕັ້ງປະຕິບັດ ຄວາມສະເໝີພາບຍິງ-ຊາຍ, ການ ສ້າງຄວາມເຂັ້ມແຂງ ໃຫ້ແມ່ຍິງ ແມ່ນຖືເປັນບຸລິມະສິດສຳຄັນອັນໜຶ່ງ ຂອງປະເທດພວກເຮົາ ກໍຄື ບັນດາປະເທດ ກຳລັງພັດທະນາ ໃນທົ່ວໂລກ ພາຍຫລັງປີ 2015. ໃນໄລຍະຜ່ານມານີ້ ເຫັນໄດ້ວ່າ ສະພາບແວດລ້ອມຂອງ ພາກພື້ນ ແລະ ສາກົນ ໄດ້ມີການຫັນປ່ຽນຢ່າງຕັ້ງໜ້າ ເຊິ່ງມີທັງກາລະໂອກາດ ແລະ ສິ່ງທ້າທາຍຕໍ່ການພັດ ທະນາເສດຖະກິດ-ສັງຄົມ ໂດຍສະເພາະແມ່ນການປະຕິບັດແຜນ ຍຸດທະສາດ ໃນການສົ່ງເສີມຄວາມກ້າວໜ້າ ຂອງແມ່ຍິງ ແລະ ເດັກ, ລຶບລ້າງທຸກຮູບແບບ ຂອງການໃຊ້ຄວາມຮຸນ ແຮງຕໍ່ແມ່ຍິງ ແລະ ເດັກ, ເຊິ່ງໃນການ ເຊື່ອມໂຍງອາຊຽນຜ່ານມາ ກໍຄື ກັບການເຊື່ອມໂຍງກັບໂລກ ໄດ້ ເຮັດໃຫ້ປະເທດຂອງພວກເຮົາໄດ້ມີໂອກາດ ເຮັດບົດບາດ ໃນການພັດທະນາດ້ານຕ່າງໆ ໂດຍສະເພາະ ແມ່ນວຽກງານກ່ຽວກັບແມ່ຍິງ ໃຫ້ເປັນໄປຕາມແນວ ທາງ, ຕາມຍຸດທະສາດວິໄສທັດ ຂອງພັກ-ລັດຖະບານ ເຊິ່ງຍາມໃດພັກປະຊາຊົນປະຕິວັດລາວ  ກໍໄດ້ເອົາໃຈໃສ່ໃຫ້ຄວາມສຳຄັນທີ່ສຸດ ກ່ຽວກັບສິດທິ ຄວາມສະ ເໝີພາບ ແລະ ຄວາມກ້າວໜ້າຂອງແມ່ຍິງ.

ນອກຈາກນີ້, ທ່ານຮອງລັດຖະມົນຕີ ຖວທ ໄດ້ຍົກໃຫ້ເຫັນວ່າ: ໃນໄລຍະຕໍ່ສູ້ກູ້ຊາດ ແມ່ຍິງ ແມ່ນກຳລັງ ປະກອບອາວຸດທີ່ສຳຄັນ ຕໍ່ສູ້ຄ່ຽງບ່າຄ່ຽງໄຫລ່ກັບຜູ້ຊາຍ, ແມ່ຍິງເປັນເພດທີ່ມີຄວາມສາມາດ ມີບົດບາດ ໃນການປະຕິບັດພາລະກິດປົດປ່ອຍຊາດ ແຕ່ໃນເວລາດຽວກັນນັ້ນ ແມ່ຍິງຊ້ຳພັດ ໄດ້ຮັບ ຜົນກະທົບ ຈາກການໃຊ້ຄວາມ ຮຸນແຮງຈາກເພດຊາຍ. ພາຍຫລັງປະເທດຊາດໄດ້ຮັບການປົດປ່ອຍ  ມີການເຊື່ອມໂຍງກັບອາຊຽນ ແລະ ເຊື່ອມໂຍງກັບໂລກ ໄດ້ເປີດໂອກາດ ໃຫ້ປະເທດຂອງພວກເຮົາ ໄດ້ມີບົດບາດໃນເວທີສາກົນຫລາຍຂຶ້ນ ແລະ ໄດ້ເຊື່ອມ ໂຍງເຂົ້າກັບກົນໄກການສົ່ງເສີມ ຄວາມສະເໝີພາບ ຍິງ-ຊາຍ ແລະ ການລົບລ້າງທຸກຮູບການຈຳແນກ ຕໍ່ແມ່ຍິງ ຂອງສາກົນ, ພັກ-ລັດຖະບານລາວ ໄດ້ສົ່ງເສີມຄວາມຮູ້ຄວາມເຂົ້າໃຈ ແນວທາງນະໂຍບາຍ, ການຈັດຕັ້ງປະຕິບັດ ລະບຽບກົດໝາຍ, ສົນທິສັນຍາສາກົນ ແລະ ພາກພື້ນ, ວິທີການປ້ອງກັນ ແລະ ການແກ້ໄຂ ຂອງພັກ-ລັດຖະບານກ່ຽວກັບການຈັດຕັ້ງ ປະຕິບັດກົດໝາຍ ທີ່ຕິດພັນກັບການຈັດຕັ້ງ ປະຕິບັດພັນທະຂອງສົນ ທີສັນຍາ ຊີດໍ, ລວມທັງຢືນຢັນເປົ້າໝາຍ ແລະ ຄຳໝັ້ນສັນຍາຂອງອາຊຽນ ເພື່ອລົບລ້າງການໃຊ້ຄວາມຮຸນແຮງ ຕໍ່ແມ່ຍິງ ເຊິ່ງໄດ້ລະບຸໄວ້ ໃນຖະແຫລງການວ່າດ້ວຍການລຶບລ້າງ ການໃຊ້ຄວາມຮຸນແຮງຕໍ່ແມ່ຍິງ-ເດັກໃນພາກພື້ນອາຊຽນ ທີ່ໄດ້ຮັບຮອງຢູ່ກອງປະຊຸມລັດຖະມົນຕີ ຕ່າງປະເທດ ອາຊຽນ ຄັ້ງທີ 37.

ທ່ານ ກ່າວຕື່ມວ່າ: ຜ່ານມາກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ເອົາໃຈໃສ່ ໃນການໂຄສະນາເຜີຍແຜ່ ສ້າງຈິດສໍານຶກ, ສ້າງຈີນຕະນາການໃໝ່, ປຸກລະດົມແນວຄວາມຄິດເກົ່າຫລ້າຫລັງ  ໃນການຈໍາແນກຕໍ່ແມ່ຍິງ ຫັນໄປສູ່ຈິນຕະນາການໃໝ່ ໃຫ້ສັງຄົມຮັບຮູ້ ແລະ ເຂົ້າໃຈເຖິງບົດບາດ ແລະ ຄວາມສະເໜີພາບຍິງຊາຍ, ປ່ຽນທັດສະນະຄະຕິ ໃນການຈໍາແນກແມ່ຍິງ ລຶບລ້າງການ ໃຊ້ຄວາມຮຸນແຮງ ຕໍ່ແມ່ຍິງ.

Cr: ຂ່າວສານປະເທດລາວ