ຫົງແດງ ເລັງເທ 30 ລ້ານເອີໂຣເພື່ອສອຍ ຮຸມເມວ ຮ່ວມທັບ

ລີເວີພູ ຕົກເປັນຂ່າວວ່າຕ້ອງການດຶງ ມັສ ຮຸມເມວ ກອງຫຼັງຂອງ ເສືອເຫຼືອງ ດອດມູນ ມີຮ່ວມທີມໃນຊ່ວງປີໃໝ່ນີ ແລະ ຄາດວ່າສະເໜີ 30 ລ້ານເອີໂຣຈະພຽງພໍໃນການດຶງໂຕ ຫຼັງຈາກ “ຫົງແດງ” ພົບກັບບັນຫາເກມຮັບຕົກຕ່ຳທີ່ສຸດໃນລະດູການນີ້.

 

“ຫົງແດງ” ລີເວີພູ ສະໂມສອນຍັກໃຫຍ່ຈາກ ພຣີເມຍລີກ ອັງກິດ ຕົກເປັນຂ່າວວ່າຕ້ອງການທີ່ຈະເຊັນສັນຍາດຶງໂຕ ມັສ ຮຸມເມວ ກອງຫຼັງຂອງ “ເສືອເຫຼືອງ” ໂບຣຸສເຊຍ ດອດມູນ ສະໂມສອນດັງຈາກ ບຸນເດສລີກາ ມາເສີມທັບໃນຊ່ວງເປີດຕະຫຼາດຮອບສອງນີ້ ແລະ ຂໍ້ສະເໜີມູນຄ່າ 30 ລ້ານເອີໂຣກໍອາດຈະພຽງພໍສຳລັບການດຶງມາຮ່ວມຖິ່ນ ແອນຟິວ ຈາກການລາຍງານເມື່ອວັນທີ 23 ທັນວາ.

 

ຮຸມເມວ ປະເດີມກັບ ດອດມູນ ເມື່ອປີ 2009 ໃນຊ່ວງທີ່ ເຈີເກັນ ຄັອບ ຄຸມທີມ “ເສືອເຫຼືອງ” ແລະ ນາຍໃຫຍ່ຕ້ອງການທີ່ຈະດຶງລູກທີມເກົ່າມາຮ່ວມງານອີກເທື່ອໜຶ່ງໃນ ແອນຟິວ.

 

ດອດມູນ ປະສົບຄວາມສຳເລັດຢ່າງຫຼວງຫຼາຍໃນຊ່ວງທີ່ ຮຸມເມວ ກັບ ຄັອບ ເຮັດວຽກຮ່ວມກັນໃນປີ 2009-2015 ໂດຍທີ່ທັງຄູ່ໄດ້ແຊມ ບຸນເດສລີກາ 2 ສະໄໝ, ເດເອຟເບ ໂພຄານ ແລະ ເຂົ້າເຖິງຮອບຊິງໃນລາຍການ ຢູຟາ ແຊມປຽນລີກ ປີ 2012.

 

ຢ່າງໃດກໍຕາມ ຮຸມເມວ ແລະ ດອດມູນ ມີຟອມການຫຼິ້ນທີ່ບໍ່ດີປານໃດໃນຊ່ວງລະດູການທີ່ຜ່ານມາ ຈົນເຮັດໃຫ້ພວກເຂົາຈົບພຽງອັນດັບ 7 ໃນ ບຸນເດສລີກາ ຂະນະທີ່ ຄັອບ ຢາກໄດ້ນັກເຕະທີມຊາດເຢຍລະມັນມາເສີມແນວຮັບ ລີເວີພູ ເປັນການດ່ວນຫຼັງຈາກທີ່ຫາກໍປລາໄຊ ວັດຝອດ 0-3 ໃນເກມລີກ ເມື່ອທ້າຍອາທິດຜ່ານມາ ຈົນເຮັດໃຫ້ຖືກຍິງໄປແລ້ວ 22 ລູກ ຈາກ 17 ເກມໃນລີກລະດູການນີ້.