ຫົງເອິກຫັກ!!! ເກິດເຊຢັນຢູ່ເສືອໃຕ້ຕໍ່

 

ຄວາມຫວັງໃນການດຶງ ມາຣິໂອ ເກິດເຊ ມາເສີມທັບຂອງ “ຫົງແດງ” ເບິ່ງແລ້ວຄືສິພັງລົງຫຼັງຈາກທີ່ນັກເຕະກໍາລັງຕັ້ງໜ້າຕັ້ງຕາລໍຖ້າລົງສະໜາມໃຫ້ກັບ ບາເຢິນ ໃນລະດູການໜ້າ ບອກວ່າຈະທຸ່ມເທທຸກຢ່າງເພື່ອກັບຄືນສູ່ຄວາມເດັດຂາດອີກເທື່ອໜຶ່ງ ໃນການຊ້ອມຄັ້ງຕໍ່ໄປກັບ ຄາໂລ ອັນເຊລັອດຕິ ນາຍໃຫຍ່ຄົນໃໝ່.

 

ມາຣິໂອ ເກິດເຊ ມິດຟິວຈາກ ບາເຢິນ ມິວນິກ ແຊມ ບຸນເດສລີກາ ອອກມາຢືນຢັນວ່າ ຕ້ອງການລົງສະໜາມໃຫ້ຕົ້ນສັງກັດພາຍໃຕ້ການຄຸມທັບຂອງ ຄາໂລ ອັນເຊລັອດຕິ ໃນລະດູການໜ້າ ກັບກະແສລາຍງານຂ່າວວ່າ ລີເວີພູ ແລະ ດອດມູນ ສົນໃຈດຶງໄປຮ່ວມທັບ.

ກ່ອນໜ້ານີ້ມີລາຍງານວ່າ ອັນເຊລັອດຕິ ອະນຸຍາດໃຫ້ນັກເຕະຍ້າຍອອກຈາກທີມເນື່ອງຈາກວ່າບໍ່ຢູ່ໃນແຜນການເຮັດທີມຂອງຕົນ ຂະນະທີ່ ເດຊັນ ສື່ຂອງອັງກິດຕີຂ່າວວ່າ “ຫົງແດງ” ພາຍໃຕ້ການນໍາທັບຂອງ ເຈີເກັນ ຄັອບ ທີ່ເຄີຍຮ່ວມງານກັບ ເກິດເຊ ໃນທັບ “ເສືອເຫຼືອງ” ຈໍ່ໄດ້ນັກເຕະໄປເສີມເກມບຸກດ້ວຍຄ່າໂຕ 20 ລ້ານປອນ.

 

ຢ່າງໃດກໍຕາມ ເກິດເຊ ທີ່ມີອາການບາດເຈັບສົ່ງຜົນໃຫ້ໝົດສິດລົງສະໜາມໃນເກມທີ່ຊະນະ ດອດມູນ ແລ້ວໄດ້ແຊມ ເດເອຟເບ ໂພຄານ ເມື່ອວັນເສົາທີ່ຜ່ານມາກ່າວຜ່ານ ບິວ ສື່ດັງຂອງເມືອງເບຍວ່າ “ຂ້ອຍກຳລັງຕັ້ງໜ້າລໍຖ້າລະດູການໃໝ່ໃນ ມິວນິກ ແລະ ຈະທຸ່ມເທທຸກວີທີທາງເພື່ອກັບຄືນສູ່ຄວາມເດັດຂາດອີກເທື່ອໜຶ່ງລະຫວ່າງການຊ້ອມເທື່ອທຳອິດຂອງຂ້ອຍພາຍໃຕ້ການຄຸມທີມຂອງ ອັນເຊລັອດຕິ”.