ຫົງເລັງດຶງປາວອນເສີມຄົມ

 

ລີເວີພູ ຕົກເປັນຂ່າວວ່າສົນດຶງໂຕ ຄຣິສຕຽນ ປາວອນ ປີກຂອງ ໂບຄາ ຈູເນຍ ຮ່ວມທີມໃນຊ່ວງປີໃໝ່ນີ້ ຫຼັງຈາກທີ່ຕ້ອງເສຍ ແດນນີ ອິງ ໄປທັງລະດູການ ຂະນະທີ່ ຊາດິໂອ ມາເນ ຈະຕ້ອງໄປຮັບໃຊ້ຊາດໃນລາຍການ ອາຟຣີກັນ ເນຊັນ ຄັບ ເດືອນມັງກອນນີ້.

 

“ຫົງແດງ” ລີເວີພູ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນຂ່າວວ່າສົນໃຈທີ່ຈະເຊັນສັນຍາດຶງໂຕ ຄຣິສຕຽນ ປາວອນ ປີກຈະຫຼວດຂອງ ໂບຄາ ຈູເນຍ ສະໂມສອນຍັກໃຫຍ່ຂອງລີກອາເຈັນຕິນາມາເສີມທັບໃນຊ່ວງເປີດຕະຫຼາດຊື້ຂາຍນັກເຕະເດືອນມັງກອນນີ້ ຈາກການລາຍງານເມື່ອວັນທີ 10 ພະຈິກທີ່ຜ່ານມາ.

 

ກ່ອນໜ້ານີ້ ແດນນີ ອິງ ກອງໜ້າ ລີເວີພູ ມີບັນຫາອາການບາດເຈັບໜັກທີ່ຫົວເຂົ່າເຮັດໃຫ້ເຂົາຈະໝົດສິດລົງຫຼິ້ນໄປຈົນຈົບລະດູການນີ້ ແລະ ເຈີເກັນ ຄັອບ ຜູ້ຈັດການທີມກໍໝົດສິດໃຊ້ງານ ຊາດິໂອ ມາເນ ເປັນເວລາ 1 ເດືອນໃນຊ່ວງການແຂ່ງຂັນລາຍການ ອາຟຣີກັນ ເນຊັນ ຄັບ ມັງກອນນີ້ເຊັ່ນກັນ.

 

ຍ້ອນເຫດນີ້ເຮັດໃຫ້ ຄັອບ ຈຳເປັນຕ້ອງເບິ່ງຫາຕົວເລືອກໃໝ່ໃນຕຳແໜ່ງເກມບຸກ ແລະ ຫຼ້າສຸດກໍມີລາຍງານວ່າເຂົາເລັງດຶງ ຄຣິສຕຽນ ປາວອນ ຫຼັງຈາກນັກເຕະໄດ້ໂຊຝີຕີນກັບທີມຊາດອາເຈັນຕິນາໃນລາຍການ ໂອລິມປິກ ເກມ 2016 ທີ່ນະຄອນຣິໂອ ເດ ຈາເນໂຣ ທັງໝົດ 3 ນັດ.

 

ນັກເຕະເຮັດໃຫ້ຜົນງານໄດ້ຢ່າງໂດດເດັ່ນໃນລະດູການນີ້ໂດຍຍິງໄປແລ້ວ 8 ປະຕູຈາກ 13 ນັດກັບ ໂບຄາ ຈູເນຍ ເຮັດໃຫ້ກາຍເປັນເປົ້າໝາຍຂອງ ລີເວີພູ ແຕ່ຂະນະດຽວກັນກໍມີລາຍງານວ່າ “ຫົງແດງ” ຍັງໄດ້ຈັບຕາເບິ່ງ ຊາດາ ອາສມູນ ກອງໜ້າຂອງ ເອຟຊີ ຣອສຕອຟ ສະໂມສອນດັງຂອງລັດເຊຍເຊັ່ນກັນ ຫຼັງນັກເຕະໂຊຟອມໜ້າປະທັບໃຈໃນ ຢູຟາ ແຊມປຽນ ລີກ ລະດູການນີ້.