ຫົງເລັງດຶງດາວລຸ້ງຊາເກຣັບເສີມທັບຊ່ວງຕະຫຼາດຮອບສອງ

 

ສື່ອັງກິດຕີຂ່າວ ລີເວີພູ ຫວັງທີ່ຈະດຶງໂຕ ອັນເຕ ໂຄຣິດ ມິດຟິວດາວໂລດ ດິນາໂມ ຊາເກຣັບ ມາຮ່ວມທີມຊ່ວງເດືອນມັງກອນນີ້ ຂະນະທີ່ ແມນເຊສເຕີ ຊີຕີ ກໍຫວັງຍາດໂຕເຂົາເຊັ່ນກັນ.

 

ລີເວີພູ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນຂ່າວເມື່ອວັນພະຫັດທີ່ຜ່ານມາວ່າກຽມທີ່ຈະອອກລ່າໂຕ ອັນເຕ ໂຄຣິດ ກອງກາງດາວລຸ້ງຂອງ ດິນາໂມ ຊາເກຣັບ ສະໂມສອນດັງໃນລີກໂຄເອເຊຍມາເສີມທັບຊ່ວງຕະຫຼາດນັກເຕະຮອບສອງເດືອນມັງກອນນີ້.

 

ເດິ ຊັນ ສື່ຊັ້ນນຳຂອງອັງກິດລາຍງານວ່າ “ຫົງແດງ” ຫວັງທີ່ຈະຊິງຕັດໜ້າທີມຄູ່ແຂ່ງເລັ່ນດຶງ ໂຄຣິດ ມາເສີມທັບທັນທີທີ່ເປີດຕະຫຼາດນັກເຕະຊ່ວງເດືອນມັງກອນນີ້ ເຊິ່ງນອກຈາກ ລີເວີພູ ແລ້ວ ແມນເຊສເຕີ ຊີຕີ ເປັນອີກທີມທີ່ກຳລັງຈັບຕາເບິ່ງສະຖານະການຂອງ ດາວເຕະໂຄແອັດຢ່າງໃກ້ຊິດ.

 

ທັງນີ້ ໂຄຣິດ ຊິ່ງກ່ອນໜ້ານີ້ມີຂ່າວກ່ຽວພັນກັບທັງ ບາເຊໂລນາ ແລະ ເຣອັນ ມາດຣິດ ຖືກເບິ່ງວ່າມີສະຕາຍການຫຼິ້ນຄ້າຍກັບ ລູກາ ໂມດຣິດ ມິດຟິວທີມຊາດໂຄເອເຊຍຂອງ “ລາຊາຊຸດຂາວ”.